Kelesia 3 - Hano Niu Testamen

Vatavuha mwa mai nin Binihimwasigi Garagusi

¹ Kimiu ata Kelesia nu vevean melmeloi lalai kimiu huri mateanan Jisas Kraes alun volovolo. Take kimiu ira taltaleana; gim lin̄ atatu vwate mwa ruruhigo.

² Vevea lalaiau ginau gaituvwa geki kunhanigi haḡea gom lai Vui Sabuga? Gom lai Vui Sabuga huribe gom huri silo? Sigai, gom lai Vui Sabuga bwatuna be gom ron̄ Roroi Tavuha i gom binihimwasigi aluna.

³ Gom dau bwatun rahumwa alun Kraes gin Vui Sabuga. Kadogaha gom lol ron̄oe be gomen lolia men haraharai gin nom muramura sibomwa? Kea taltaleana.

⁴ Nom rovoga n̄oto nu sabweleiana? Nam iloe be sigai!

⁵ Mandovai God mwa lai Vui Sabuga i mwa lol ginau dan̄an̄a lol davolamiu huribe gim huri silo? Sigai, mwa lol ginau kerageki bwatuna be gom ron̄ Roroi Tavuha i gom binihimwasiginia.

⁶ Ravrava Sabuga mwa bev ginau n̄an kunia huri Ebraham: “Ebraham nu vinihimwasigi God, i God mwa laiḡoḡo binihimwasigi garagusi non Ebraham, i binihimwasigi gea mwa lolia mwa bavtutu mai God.”

⁷ I gov iloe be ira mwasin nitun Ebraham kera be ram haḡo binihimwasigi garagusi.

⁸ Ravrava sabuga, mwa bevea huri hano be vi loli lol taro vai atagu, mwa bevea be God vi lolira be ira Lolobon̄i rav vavtutu sivi nora binihimwasigi garagusi. Roroi Tavuha geki nu veveana lalai Ebraham amua ram siv hagainia lalainia. “Kunia be ravrava sabuga mwa bevea be; Ira bwatun Vanua lavoa duluai rav lai vatavuha sivinigo.”

⁹ I kera be ram binihimwasigi kun gabe Ebraham be nu binihimwasigi ram lai vatavuha kun Ebraham n̄ano.

¹⁰ Take kera be ram dogo n̄ano ram huri silo be men lolira ramen vavtutu ram dogo halaten vevegi, bwatuna ravrava sabuga mwa bevea be, “Ihei tehe vi lai vevegi be mwa hav gogonai te hano be nu ravana lol bukan silo.”

¹¹ Kadogaha mwa melmelo be atatu vwate si hav lolian te vavtutu mai God gin silo, bwatuna be ravrava sabuga mwa bevea be, “Kera be ran vavtutu mai God rav rahu ginia be ram dabea.”

¹² Silo be mwa hav tu tehe la binihimwasigi garagusi. Mwa bevea be, “Atatu be mwa dabe ginau kerageki vi rahu bwatuna ginau kerageki.”

¹³ Kraes nu lai dagai silo vevegi be silo nu taua aluda. Mwa leahi ute mai gida i mwa daua sibona halaten vevegi gea. Mwa ravana lol ravrava sabuga be, “Ihei tehe be rebehina mwa seserainia la bwatungai kea vi lai vevegi.”

¹⁴ Kraes mwa lolia kungeki huribe vatavuha non God be nu tatauleo lalai Ebraham be rav mai sivi Kraes Jisas lalai ira Lolobon̄i. Jisas mwa mate huribe gin nonda binihimwasigi garagusi tav lai dum Vui Sabuga be God nu tatauleo huria.

Silo i Tatauleo

¹⁵ Ira tuaku, tan binbinihi lol binihin atatu: Len̄len̄a lol dameana lol davolan atatu gairua nu dadariha. Ataguna be dameana nu loli mai atatu saraḡo gairua, atatu vwate si hav tu te dum ḡoroe sage bulus ginau vwate vai aluna.

¹⁶ God nu lol tatauleo saraḡo lalai Ebraham i lalai sibina. God nu hav vevea tehe be, “i lalai ira sibimwa.” Kea gin binihiva be atatu gaituvwa n̄ano; atatu gea, kea Kraes.

¹⁷ Geki haḡea hano be nam bevea: God nu lol dameana mai Ebraham i nu tatauleo be vi togo wasi aluna. Silo, be nu mai taul vudolua vavasi vena n̄avul gaitolu huba amua, si hav leahi te dum dameana i nu lol kaburai tatauleo non God lalai Ebraham.

¹⁸ Be silo gea vi lai lalai gida vatavuha non Ebraham, vuvuri tatauleo gea si hav vora te ginau vwate. Take kea si hav dumwi tehe, bwatuna God gin sine hagavi mwa lai non vatavuha lalai Ebraham sivi tatauleo be nu lolia.

¹⁹ Haḡe hano haḡea silo huria? Mwa laiana be men seseraiana be ginau hahantai be atatu ram lolia nu hav huri te doroniva non God. I nu loli rahurahu vaivotu raumatan vara, be nu tatauleo ran mai. Silo gea nu laiana sivi ira Enjel be ran haḡo Moses gi nora tamwata be vi lai silo lalai atatu.

²⁰ Take atatun tamwata mwa hav loli tehe batena be tavaluna gaituvwa n̄ano i God kea gaituvwa n̄ano.

Binihiva huri Silo non Moses.

²¹ Mandovai gin binihiva be silo mwa hav dara tehe la tatauleo non God? Sigai hohoigi! Kea vi vora mwasigi n̄ano be silo vi lol gida tav vavtutu. Take God nu hav lai te silo be vi lai dum rahuana.

²² Ninia gea ravrava sabuga mwa lol melmeloinia be ureure mwa bauhi lol vuro. Geki haḡea mulei tatauleo mwa laiana sivi binihimwasigi garagusi lalai atatu be ram binihimwasigi lol Jisas Kraes.

²³ Amua binihimwasigi garagusi geki nu mai, gida duluai tan togo kun gabe atat vauhi gin silo. Tan hav maribwesi tehe vaivotu be God mwa bagahi gida gin halan binihimwasigi garagusi be ram mai.

²⁴ La avoan dolua, silo kea nonda gitaḡoro be mwa domuai gida vai aben Kraes bwatuna be tav lol vavtutu dum mai God sivi binihimwasigi.

²⁵ Kadogaha halan binhimwasigi garagusi nu mai, tam hav togo tehe halaten gitaḡoro.

^26-27 Kimiu n̄oto gin garuhisabuga lol Kraes, i gin saga kimiu gin Kraes. Geki gin binihiva be kimiu duluai ira nitun God sivi binihimwasigi garagusi lol Kraes Jisas.

²⁸ Lol Kraes nu hav vora te dolua lol davolan ira varan ira Jius mai ira Lolobon̄i, atat vauhi i atat maribwesi, atamwani i vavine, kimiu n̄oto gin dadariha lol Kraes Jisas.

²⁹ Be giḡo lalai Kraes, i giḡo vara ata la Ebraham. Giḡo gov lai tanoi duluai lol vatavuha non God bwatuna tatauleo be God nu laia lalai Ebraham.