Kelesia 2 - Hano Niu Testamen

¹ Atagun taul han̄vul domwan gaivasi nan van Jerusalem mulei, kadogaha mai Banabas. Nan lai Taetus mulei maiau.

² Nan vano bwatuna be God nu lol melmeloinia mulei lalaiau be nas vano. Nan sogari ira binihimwasigi aia, i gin hala dahuligi nan vevea lalai ira nora tomuai huri Roroi Tavuha be nan toretore huria lalai ira Lolobon̄i. Nan hav doroni tehe be noḡu rovoga ata amua mai rovoga be nan lolia kadogaha vi sabweleiana.

³ Taetus nu togo maiau take nu hav garoiana tehe be vi lai tav dovon̄ana, kunia be kea ata Krik.

⁴ Gam bev ginau vahala geki bwatuna be atat binihimwasigi tentene rituai ran mai dahuligi lol nomai tatan̄ana. Ran mai kun gabe atat gita surai be ramen tul burigai mwasigi lol Kraes Jisas. Ran doron be ramen lol kamai i ira turin rovoga.

⁵ Take gan hav lin̄ te taro lalai ira binihimwasigi dentene geki. Gan doron mwasigi huri Roroi Tavuha be vi van rahurahu huri kimiu.

⁶ Ira tomuai keragea be ran lol ron̄oe kun gabe kera raumatan atatu liu ihei ram hav leahi te Roroi Tavuha be nan toretore huria. (Nan hav laia te kun gabe kera ira “atat lavoa” sage sigai. Lalai God atatu n̄oto dadariha.)

⁷ Take ira tomuai ran lol melmeloinia be nu lai lalaiau rovoga be nai vev lua Roroi Tavuha lalai ira Lolobon̄i, kunia be Pita kea non rovoga lalainira be vi vevea lalainira ira Jius.

⁸ God nu lai lalaiau muramura be vi lol rovoga kun gabe hala huri ira Lolobon̄i, kunia be nu lol Pita gi hala lalai ira Jius.

⁹ Semes, Pita mai Jon, be ram bora ira tomuai, ram ilo melmeloinia rovoga be God nu hogoinia lalaiau. I ram haḡo limamaru gi dovon̄ana be kamaru gaituvwa n̄an maira. Tam iloe be Banabas maiau gav lol rovoga aben ira Lolobon̄i mai ira Jius.

¹⁰ Ginau n̄an be ram hudali gida be tav vinihi dumwia be tav bului ira hiru ginia be ram doron maragai be nav lolia.

Pol mwa lol Seserainia be Pita mwa Bahala.

¹¹ La mahavana be Pita mwa mai vai Antiok, nam bev bora ginau lolmatana, bwatuna kea mwa bahala.

¹² Amua atatu rituai be Semes nu horara ram bisirai aia, Pita nu gan ginau maira Lolobon̄i. Take lol taro be ram bisirai, Pita mwa mambui ginaganiana maira Lolobon̄i, i mwa dogo dagai ninira, bwatuna be mwa matagun ira varan ira Jius huribe ram doretore huri tavdovon̄a.

¹³ I Pita nu lol alen̄an ira hoḡoiḡoro mai ira atat binihimwasigi rituai be ran togo maia. Mulei Banabas nu lumuhia gin hano be ira binihimwasigi ira Jius ran lolia.

¹⁴ Lol taro be nan gitae be nan hav huri te mwasigi non Roroi Tavuha, nan avo mai Pita la lolmatara duluai. Nan vevea be, “Pita, giḡo vara ata Jiu, take gom hav togo te kun gabe giḡo varan Jiu. Gom dogo kun ira Lolobon̄i. I huri hano be kadogaha gom lol ron̄oe be gomen garoinira Lolobon̄i be ramen togo kun gabe varan ira Jius?”

Ira Jius mai ira Lolobon̄i ram rahu gin Binihimwasigi Garagusi

¹⁵ Gida tan vora gi varan ira Jius take vorate “Lolobon̄i vuroga,” be mwa uloiana kunia.

¹⁶ Radu, tam iloe be atatu mwa lolian bavtutu mai God vorate huria be mwa huri silo, take be mwa dau binihimwasigi garagusi alun Jisas Kraes. I gida mulei, tan tau nonda binihimwasigi alun Kraes Jisas, huribe tav vavtutu mai God bwatuna be tam binihimwasigi garagusi alun Kraes. Nu hav vora te bwatuna be tam huri silo, bwatuna be atatu vwate si hav vavtutu tehe lolmatan God gabe mwa huri silo.

¹⁷ Lol taro be kamai ira Jius gam siro hala be gav lol tavuha lalai God, gam habwea be kamai atat vuroga mulei. Geki gin binihiva be Kraes mwa lol kamai gam buroga? Sigai!

¹⁸ Take inau nav vahala be nav tau bwatuna be nav vagahi mulei ginau be nan lin̄ira huba.

¹⁹ Kea silo haḡea be nu tauau lol mateana, i nan mate lalai silo gea huribe kadogaha nav togo huri God.

²⁰ Ran tauau huri mateana alun volovolo huri Kraes, i nam mom dogo te mulei kea Kraes be mwa dogo aloloku. Nam dogo radu lol rebehiku, take nam dogo lol binihimwasigi garagusi alun nitun God be mwa dabeau i mwa lin̄ muleinia be men varahuau.

²¹ Be nam bev ginau kerageki nam hav vano tehe alun hogoi non God, kea mateanan Kraes vi vora ginau vuroi n̄ano.