Leo Tavuha gabe Jon nu Ravae 8 - Hano Niu Testamen

Vavine mwa Ḡalau Ahoana

¹ Haḡe kera duluai ram databagilu mulei, take Jisas mwa bano vai la vusin gai Oliv.

² Mwa rani mabon̄ gaituvwa mwa dabagilu vai la Imwa Tataro. Haḡe sinombu duluai ram ḡoḡo dalisia, i kea mwa domahuri mwa dau bwatuna mwa bagahira.

³ Haḡe ira vagahin Silo maira Varise ram lai haroroi vavine vwate gabe kea nu ḡalau ahoana, i ram daria mwa du lol matara.

⁴ I ram bevea lalai Jisas be, “Vagahi, vavine geki mwa habweana be mwa bahala maragai bwatuna be mwa maturu mai atamwan dolua.

⁵ Lol nonda Silo Moses nu vevea be vavine kunia mwa du be vi vohan bamate. Be kunia, gom binihi haninia?”

⁶ Ram hudaligi kungeki n̄an be ramen saruruhi Jisas huribe rav tul bonogai dum vai aluna. Take Jisas mwa siolo mwa ravrava lol tano gin bihuna.

⁷ Mahavana be ram du ram lai avoana hudaligi. Jisas mwa ḡarere vai amare mwa bevea lalainira be, “Be ihei abemiu vurona sigai, kea vi derai vatu muana aluna.”

⁸ Kunia mwa siolo mulei mwa ravrava gin bwaruruguna lol tano.

⁹ Mahavana be ram ron̄ avoana geki kera duluai ram biroromaragai gahegahera, mwa dau bwatuna la ira bwatmetua. Ram bano vaivotu Jisas mwa do gahena, mai vavine haḡea mwa du radu aia.

¹⁰ Jisas mwa ḡarere vai amare mwa bevea lalainia be, “Kera duluai behe? Ihei te abena radu be men vevegigo?”

¹¹ Haḡe mwa bwaliua be, “Atatu sigai, Ratahigi.” Jisas mwa bevea be, “Nam hav vevegigo tehe. Gov tabagilu, ta gosav mom bahala te mulei.”

Jisas Gigitan Ureure

¹² Jisas mwa avo lalai ira Varise be, “Inau haḡea gigitan ureure. Be ihei tehe mwa huriau vi lai gigitan rahuana i sihav lago te dum lol ute meto.”

¹³ Haḡe ira Varise ram bevea lalainia be, “Giḡo mahaḡea gom dura mulei nom avoana, be kunia nom avoana sihav tu tehe.”

¹⁴ Jisas mwa bwaliura be, “Sigai, son̄o be nam dura mulei noḡu avoana siboku, havanau be nam bevea nu mwasigi, bwatuna be nam iloe be nam mai nin behe i nam ban vai behe. Take kimiu gim hav ilo te ute be nam mai aia i nai van aia.

¹⁵ Kimiu gim lai silo vevegi lalai atatu hurin alen̄an atatu; take inau nam hav lai te silo vevegi lalai atatu vwate.

¹⁶ Take be nav lai silo vevegi, noḡu vevegi vi vora mwasigi, bwatuna be mwa hav vora te inau gaheku lol ginau geki; take Tata gabe nu horau mai, kea maiau.

¹⁷ Nu ravana lol nomiu Silo be mahavana be atatu gairua ramuru dame la binihiva gaituvwa, havanau gabe ramuru bevea nu mwasigi.

¹⁸ Inau nam do nam dura muleiau gin noḡu avoana i Tamaḡu gabe nu horau mai, kea mulei mwa durau.”

¹⁹ Haḡe ram hudalinia be, “Tamamwa kehibehe?” Haḡe Jisas mwa bwaliura be, “Gim hav iloau tehe i gim hav ilo te Tata mulei.” Mwa bevea be, “Be gis iloau kunia gis ilo Tamaḡu mulei.”

²⁰ Jisas mwa bev ginau duluai kerageki mahavana be mwa bagahi lol Imwa Tataro, lol vwavwan imwa gabe tanon hogoi mwa do aia. Take atatu gaituvwa mwa hav haḡo te batugehia, bwatuna be mahavan tarona mwa hav mai te radu.

Jisas mwa avo be men Vamatara ira Lavoa ata Israel

²¹ Haḡe Jisas mwa bev muleinia lalainira be, “Nai van dagai; giv hiḡeau, take giv mate lol vuromiu. Gisav van te dum lol ute gabe nai van aia.”

²² Haḡe kunia ira lavoa non ira Jius ram bevea be, “Kea mwa bevea be, Tasav van te dum lol ute gabe vi van aia. Matu mwa bevea kungeki daga gin binihiva be vi wehi muleinia sibona?”

²³ Jisas mwa bwaliura be, “Kimiu gim mai nin teti ata n̄an, take inau nam himai nin amare. Gim mai nin ureure geki, take inau nam hav mai tehe nin ureure geki.

²⁴ Bwatuna haḡea nam bevea lalai kimiu be giv mate lol vuromiu. I giv mate lol vuromiu be gisav vinihi te mwasigi be, ‘Inau nam dogo Vai tuai.’ ”

²⁵ “Giḡo ihei?” Ram hudalinia kunia. Take Jisas mwa bwaliura be, “Havanau gabe nan vevea lalai kimiu la bwativuna.

²⁶ Ginau ivusi mwa du radu be nai vevea i nav lai silo vevegi huri kimiu. Wani gabe mwa horau mai, kea hiḡea mwasigi, i nam bev ginau n̄an lalai ureure havanau nam ron̄oe ninia.”

²⁷ Take kera ram hav ron̄ te batoia be kea mwa bevea lalainira huri Tata.

²⁸ Haḡe kunia Jisas mwa bevea lalainira be, “Mahavana be gim lol roroaiau Nitun Atatu. Giv siv iloe be, ‘Inau nam dogo Vai tuai’; kunia giv iloe be nam hav lol te ginau la noḡu roron̄o mau, take nam bev hano gabe Tata mwa bagahiau ginia.

²⁹ Haḡe wani gabe nu horau mai kea maiau; mwa hav deraiau te gaheku, bwatuna be nam lol dum non doroniva n̄an vataha mahavana.”

³⁰ Atatu ivusi ram ron̄ Jisas be mwa bev ginau kerageki ram binihimwasiginia.

Atatu be Kraes mwa Ribwesira i Atatu aten Gao Vauvauhi non Setan

³¹ Haḡe Jisas mwa bevea lalainira be ram binihimwasiginia be, “Be kimiu giv tabe noḡu silo vagahi kimiu haḡea mwasin noḡu roron̄tai mwasigi;

³² giv ilo mwasigi i mwasigi vi ribwes kimiu.”

³³ Ram bwaliu Jisas be, “Kamai ira varan Ebraham, i gam hav vora te turin rovoga non atatu vwate. Gom bevea gin hava binihiva gea be, ‘Vi ribwes kimiu’?”

³⁴ Jisas mwa bevea lalainira be, “Nam bev mwasigi lalai kimiu be, atatu duluai gabe ram buroga ram bora turin rovoga non vuro.

³⁵ Turin rovoga kea mwa hav vora te mwasin ata lun imwan vuigina, take nitun vuigin imwa n̄an mwasin atatu vai la imwa.

³⁶ Be inau Nitun God nav ribwes kimiu, giv maribwesi mwasigi.

³⁷ Nam iloe be kimiu ira varan Ebraham. Vuvuri take gim doron be giv wehiau radu, bwatuna be gisav vinihi te mwasigi dum noḡu silo vagahi.

³⁸ Nam avo huri ginau gabe Tamaḡu nu vagahiau ginia, take gim lol havanau gabe tamamiu nu vagahi kimiu ginia.”

³⁹ Haḡe ram bwaliua be, “Tamamai Ebraham.” Jisas mwa bwaliura be, “Be sivora kimiu ira nitun Ebraham mwasigi, gis lol dum rovoga mwasigi kunia gabe kea nu lolia.

⁴⁰ Take ginau duluai gabe nam lol ḡaoḡaoinia huria be men vasinerani kimiu huri mwasigi nan ron̄oe nin God. Take gim lol ron̄oe be giv wehiau radu. Ebraham nu hav lol te ginau kungeki!

⁴¹ Kimiu gim lol ginau n̄an ha kunia be ira tamamiu ran lolia.” Take ram bwaliu Jisas be, “Kamai gam hav vora te nitun utevono. Tamamai gaituvwa n̄an, God sibona.”

⁴² Haḡe Jisas mwa bevea lalainira be, “Be God mwasigi Tamamiu, mwa du be giv tabeau; bwatuna be nan mai nin God i kadogaha inau teti. Nan hav mai tehe alun noḡu doroniva siboku, take kea nu horau.

⁴³ Matuke gim hav ilo te ginau be nam bevea huri hano? Bwatuna haḡea be gim hav doron tehe be giv ron̄ roroi gabe nam bevea.

⁴⁴ Kimiu haḡea ira nitun tamamiu, gabe Setan, i gim doron be giv huri binihiva non tamamiu. La bwativuna kea atat wehiwehi atatu, kea mwa hav vora te mwasigi bwatuna gea mwasigi sigai alolona. Mahavana gabe mwa dentene kea mwa lol ginau hurin mwasin alen̄ana, bwatuna gabe kea tenteneana i taman ira tenteneana duluai.

⁴⁵ Nam bev mwasigi lalai kimiu be, bwatuna higea gim hav vinihi te mwasigiau.

⁴⁶ Ihei tehe alolomiu vi habwe dum mwasigi be nam buroga? Be inau nam bev mwasigi, huri hano be gim hav binihi te mwasigiau?

⁴⁷ Wani gabe mwa mai nin God mwa roron̄tai huri avoana non God. Kimiu geki, kunhanigi te mahaḡea, gim hav vora te nin God, bwatuna gim hav roron̄tai tehe.”

Jisas mai Ebraham

⁴⁸ Haḡe ram hudali Jisas ram bevea be, “Matuke gam hav vev te mwasigi gea batena gam bevea be giḡo ata Samaria vwate i vui hantai alolomwa?”

⁴⁹ Jisas mwa bwaliura be, “Vui hantai sigai aloloku, nam binihi marahi Tamaḡu, take gim hav binihi te marahiau.

⁵⁰ Nam hav hiḡe te binihi marahi huriau siboku. Take atatu vwate be mwa hiḡea i mwa bevegi huriau.

⁵¹ Nam bev mwasigi lalai kimiu be: Ihei tehe gabe mwa dabe noḡu silo vagahi sihav mate tehe.”

⁵² Haḡe ram bevea lalainia be, “Kadogaha gam iloe mwasigi be vui hantai alolomwa! Ebraham nu mate, i ira atatun vevsera ran mate, take gom bev raduinia be, ihei tehe mwa dabe nom silo vagahi sihav mate tehe.

⁵³ Tamamai Ebraham nu mate; matu giḡo gom bevea be giḡo gaivua liu Ebraham? Ira atatun vevsera mulei ran mate huba. Matu gom bevea be giḡo ihei?”

⁵⁴ Jisas mwa bwaliura be, “Be inau nai vinihi marahiau siboku, noḡu binihi marahi siboku vi vora kun ginau vuroi n̄an. Wani gabe mwa binihi marahiau Tamaḡu, wani gabe kimiu gim bevea be nomiu God.

⁵⁵ Kimiu gim hav iloe te n̄an haḡea, take inau nam iloe. Be nas vevea be nam hav iloe tehe, inau nas vora tenteneana mulei, kun kimiu. Take nam iloe, i nam dabe non avoana.

⁵⁶ Tamamiu Ebraham nu samsamwara huribe kea vi gita noḡu maiana; nu gitae i mwa samsamwara.”

⁵⁷ Haḡe ram bevea lalainia be, “Taulumwa mwa hav votui te n̄avul gailima radu, take gon gita Ebraham?”

⁵⁸ Jisas mwa bevea lalainira be, “Nam bev mwasigi lalai kimiu, Ebraham mwa siv vora atagu, ‘Inau nam dogo mau amua.’ ”

⁵⁹ Bwatuna gea ram hara vatu be ramen vohae ginia; take Jisas mwa hili dagai i mwa bwihi avare nin Imwa Tataro.