Leo Tavuha gabe Jon nu Ravae 7 - Hano Niu Testamen

Jisas mai Ira Tuana

¹ Ataguna geki, Jisas mwa lago lol vanua Kalili; nuhav doron tehe be vi lago lol vanua Judia, bwatuna be ira lalavoa ata Jius ram doron be rav wehia.

² Haḡe mahavana huri gubwen̄in Samsamwaran imwa Valdogi mwa abena,

³ i kunia ira tuan Jisas ram bevea lalainia be, “Mwalue nin teti ba ban vai Judia, huribe nom roron̄tai rav gita rovoga be gom lolira.

⁴ Ihei tehe mwa doron be vi roroa, sihav tahuli te havanau gabe mwa lolia. Mahavana be gom lol ginau duluai kera geki, gov lolia be ureure duluai vi iloe hurigo!”

⁵ (Vwate nin ira tuana mulei mwa hav vinihi te mwasiginia.)

⁶ Jisas mwa bevea lalainira be, “Mwasin tarona mwa hav mai te radu huriau. Ta lalai kimiu vataha mahavana ha nu tavuha.

⁷ Haḡe ureure sihav varihai te kimiu, take vi varihaiau, bwatuna be nam bev ḡaoḡaoinia be hala be mwa rovo aluna ran hav tavuha tehe.

⁸ Giv vano alolon samsamwara. Inau nasav vano tehe lol samsamwara geki, bwatuna be mwasin tarona mwa hav mai te huriau.”

⁹ Jisas mwa bev ginau geki lalainira, mahavana nu togo Kalili.

Jisas lol Samsamwaran Imwa Valdogi

¹⁰ Ataguna be ira tuana ram bano vai lol samsamwara, Jisas mulei mwa bano; nu hav vano tehe kun be vi gigilaga, take nu la rav tagu.

¹¹ Haḡe ira lavoa non ira Jius ram hiḡea lol samsamwara. I ram hudaligi ram bevea be, “Kea halabehe?”

¹² Haḡe sinombu rituai ram bin̄utun̄utu huria ram bevea be, “Kea atat tavuha,” take rituai ram bevea be, “Sigai, kea mwa bataltal sinombu.”

¹³ Take tuara vwate ninira mwa hav vev te maragainia, bwatuna be ram matagun ira lavoa non ira Jius.

¹⁴ Haḡe samsamwara mwa du tuhibobona huba mahavana be Jisas mwa haroro lol Imwa Tataro i mwa dau bwatuna mwa bagahi.

¹⁵ Ira lavoa non ira Jius ram dan̄an̄a butbutui, ram bevea be, “Kunhanigi be wani geki mwa ilo ute kunia, be nu hav van te lol sikulu?”

¹⁶ Jisas mwa bwaliura be, “Havanau gabe nam bagahi huria mwa hav vora te noḡu, take mwa mai nin God, gabe nu horau.

¹⁷ Be ihei tehe mwa samsamwara be men lol doroniva non God, vi iloe be havanau nam bagahi huri mwa mai nin God, sage nam avo gin noḡu muramura siboku.

¹⁸ Atatu gabe mwa avo gin non roron̄o sibona, wani gea mwa lol ron̄oe be vi lol roroainia sibona. Take wani gabe mwa doron be vi lol roroai wani be nu horae, kea mwa lol ginau mwasigi i kea mwa hav lol te ginau vahala.

¹⁹ Matu Moses nu hav lai te Silo lalai kimiu? Vwate nin kimiu mwa hav tabe te Silo keragea. Huri hano gim lol ron̄oe be giv wehiau?”

²⁰ Haḡe sinombu ram bwaliua ram bevea be, “Tomuai non ira vui hantai alolomwa! Ihei mwa lol ron̄oe be men wehigo?”

²¹ Jisas mwa bwaliura mwa bevea be, “Nan lol rovoga dan̄an̄a vwate i kimiu duluai gin dan̄an̄a.

²² Bwatuna be Moses nu vevea lalai kimiu be giv tav dovon̄ana alun ira nitumiu atamwani (nuhav vora te Moses take ira sibimiu ran tau bwatuna), i gim dav dovon̄ana alun naturigi lol gubwen̄ mambuharai.

²³ Be naturigi vi lai tav dovon̄ana la gubwen̄ mambuharai huri be Silo non Moses sihav masalili tehe, huri hano gim lol horoiau bwatuna be nam lol atatu mwa rahu tavuhai la gubwen̄ mambuharai?

²⁴ Gisav mom bevegi te atatu la alen̄a be gim ḡitae n̄an take giv vevegi alun mwasigi.”

Matu Kea Kraes?

²⁵ Atatu rituai ata Jerusalem ram bevea be, “Matu wani geki mwa hav vora te kea gabe ira lalavoa ram doron be rav wehia?

²⁶ Gin gitae! Kea mwa avo lolmatan ute, i atatu vwate mwa hav mom bev te hano vai aluna! Matu ke ira tomuai rav ilo dumwia be kea Kraes?

²⁷ Take batena be Kraes vi mai, atatu gaituvwa sihav iloe tehe be kea ata behe. I gida duluai tam ilo ute be wani geki mwa mai aia.”

²⁸ Haḡe mahavana be Jisas mwa bagahi lol Imwa Tataro mwa bevea amare gin silo gaivua be, “Gim iloau mwasigi i gim iloe be inau ata behe? Nam hav mai tehe hurin noḡu doroniva mau. Kea gabe mwa horau, kea haḡea mwasigi. I gim hav iloe tehe,

²⁹ take nam iloe, bwatuna nam mai ninia i nu horau mai.”

³⁰ Haḡe kunia ram lol ron̄oe be rav haḡo batugehia, take liman atatu vwate mwa hav dumwia tehe, bwatuna be mahavana mwa hav mai te huria radu.

³¹ Take atatu ivusi alolon sinombu ram binihi-mwasigi aluna, ram bevea be, “Mahavana be Kraes vi mai, matu kea vi lol ginau dan̄an̄a liu nin wani geki?”

Mwa Horana na Ira Gitaḡoro huri Imwan God be Ramen Haḡo Batugehi Jisas

³² Haḡe ira Varise ram ron̄oe be sinombu ram biavoavo ḡoḡonai huri ginau kera geki alun Jisas, kunia kera maira muai tataroi ram hora ira gitaḡoro rituai be rav haḡo batugehia.

³³ Haḡe Jisas mwa bevea be, “Nav togo mai kimiu huri mahavana vwelvwele mulei, i nai van dagai vai aben wani gabe nu horau.

³⁴ Giv siroau take gisav habweau tehe, bwatuna be gisav van te dum lol ute gabe nav togo aia.”

³⁵ Haḡe ira lavoa ata Jius ram bevea mau ginginira be, “Matuke, kea vi van halabehe gea be tasav habwea tehe? Matu kea vi vano vai la bwatutun vanua duluai lol vanua Krik gabe nonda sinombu ram dogo ram bagahira ata Krik?

³⁶ Kea mwa bevea be, tav hiḡea, ta tasav habwea tehe, i tasav van te dum lol ute be vi van aia. Mwa bevea gin hava binihiva?”

Wai Rovo huri Rahuana

³⁷ La nogonan gubwen̄i gabe gubwen̄ marahi ata lol samsamwara Jisas mwa du amare mwa bevea gin silo gaivua be, “Ihei tehe gabe mwa mandou vi mai huriau ba mwin wai.

³⁸ Kun gabe ravrava Sabuga mwa bevea be, ‘Ihei tehe mwa binihimwasigiau wai rovo huri rahuana vi rov lua nin lolona.’ ”

³⁹ Jisas mwa avo kungeki huri Vui Sabuga, be kera be ram binihimwasiginia, kea vi laia lalainira. Ran hav lai te Vui Sabuga radu lol mahavana gea, bwatuna be Jisas mwa hav hae te mulei radu vai lol non ute Ratahigi.

Sinombu ram do Harabora

⁴⁰ Haḡe atatu rituai alolon sinombu ram ron̄oe be mwa bevea kungeki, ram bevea be, “Wani geki mwasigi kea Atatun Vevsera!”

⁴¹ Rituai ram bevea be, “Kea Kraes!” Take rituai ram bevea be, “Kraes sihav mai te nin Kalili!

⁴² Ravrava Sabuga mwa bevea be, Kraes vi vora la varan Deved, kea vi vora Betlehem, tanon Ratahigi Lavoa Deved.”

⁴³ Haḡe sine harabora mwa dogo lol davolan sinombu bwatuna Jisas.

⁴⁴ Sinombu rituai ram binihia be rav haḡo batugehia, take liman atatu vwate mwa hav sibweria tehe.

Binihiv Gairuruai non Ira Lavoa Ata Israel

⁴⁵ Mahavana be ira gitaḡoro ram dabagilu mulei ira muai tataroi maira Varise ram hudalinira be, “Hurihano be gim hav lai te Jisas be giv mai maia?”

⁴⁶ Kunia ira gitaḡoro ram bwaliura be, “Atatu vwate mwa hav avo te dum kun wani geki?”

⁴⁷ Haḡe ira Varise ram hudalinira ram bevea be, “Kunhanigi, kea mwa saruruhi kimiu mulei?”

⁴⁸ I kera ram hudaligi mulei be, “Matu gim iloe be nonda tomuai te vwate sage Varise vwate mwa binihimwasiginia?

⁴⁹ Sinombu geki ram hav ilo te Silo non Moses, bwatuna gea, lolhoro non God mwa dogo alura!”

⁵⁰ Varise vwate aia ihana Nikodimas, kea haḡea atatu gabe nu vano be men gita Jisas amua. Haḡe Nikodimas mwa bevea lalainira dodolua be,

⁵¹ “Hurin nonda Silo tasav vevegi te atatu be tam hav ron̄oe te ninia sibona, sage tam hav habwe te luae huri havanau gabe nu lolia.”

^52-53 Haḡe kera ram bwaliua ram bevea be, “Kunhanigi, giḡo mulei ata Kalili? Ram bevea be, gov vasogo ravrava Sabuga duluai gov habwea be, atatun vevsera vwate mwa hav mai te nin Kalili.”