Leo Tavuha gabe Jon nu Ravae 3 - Hano Niu Testamen

Jisas mwa Avo mai Nikodimas

¹ Atat lavoa vwate non ira Jius ihana Nikodimas, kea Varise.

² La mahavan bon̄i vwate mwa ban vai aben Jisas i mwa bevea lalainia be, “Vagahi gam iloe be giḡo vagahi gabe God nu horago mai. Ihei si hav lol te dum ginau dan̄an̄a gabe gom lolira be God mwa hav to te maia.”

³ Haḡe Jisas mwa bwaliua mwa bevea be: “Nam bev mwasigi lalainigo be: ihei si hav gita te dum Rahuan Gara gabe God mwa Ratahigi alolona be kea si hav vora te mulei.”

⁴ Ta Nikodimas mwa bwaliua mwa hudalinia be, “Atatu be mwa ḡaivuaga huba vi mom bora mulei hanigi? Kea si hav mom dalin̄oro te dum varuana vai lol sibwen̄in ratahina huri be men mom bora mulei varuana!”

⁵ Take Jisas mwa bwaliua mwa bevea be, “Nam bev mwasigi lalainigo be, ihei si hav dalin̄oro te dum lol rahuana gara gabe God mwa ratahigi alolona be kea si hav vora tehe gin wai i vui.

⁶ Atatu be mwa bora gin vihogoi nin tamana, i ratahina kea vihogoi, ta kea gabe mwa bora gin vui, mwa bora Vui.

⁷ Gosav dan̄an̄a tehe huri be nam bevea be goi vora mulei.

⁸ Lan̄i mwa here kun mwa doron; gom ron̄ mwauvwina, ta gom len̄a be mwa mai behe sa mwa ban vai behe. Kera gabe ram bora gin Vui ran ḡunia haḡea.”

⁹ Nikodimas mwa hudalinia mwa bevea be, “Vi loli dum kun hanigi?”

¹⁰ Haḡe Jisas mwa bwaliua mwa bevea be, “Giḡo vagahi lavoa lol vanua Israel gom hav ilo te ginau geki?

¹¹ Nam bev mwasigi lalainigo be: gam bevuri, huri hano be gam iloe i gam bev lua hano be gan ḡitae, haḡe ta ihei nin kimiu vwate mwa hav lai te ḡoḡo nomai avoana.

¹² Be gom hav binihi te mwasigiau batena nam bevuri huri ginau ata lol Ureure geki; gov binihimwasigi dum haniau, batena be nai vevuri lalainigo huri ginau ata amare?

¹³ Ihei tehe mwa hav hae tehe vai lol ute atamare ta inau Nitun Atatu n̄an; gabe nan himai nin amare.”

¹⁴ Kun tuai Moses lol vanua vuroi, nu haḡo domarei nunun teltele gabe ran lolia gin vatmerameraga la gai, kunia mulei inau Nitun Atatu rav haḡo domareiau la gai,

¹⁵ huri be irahei gabe rav binihimwasigiau rav haḡo dum rahuana vai tuai.

¹⁶ Huri God mwa dabe mutai ureure haḡe mwa horau, inau gabe mwasin Nituna vora gaituvwa be irahei gabe rav binihimwasigiau, rasav mate tehe ta rav rahu vai tuai.

¹⁷ God nu hav horau tehe, inau Nituna vai lol ureure be nai vevegi ureure take be nav vora varahun ureure.

¹⁸ Ihei tehe be mwa binihimwasigiau, God si hav vevegi te dumwia; take ihei tehe gabe mwa hav binihi te mwasigiau nu vevegia huba, bwatuna be mwa hav binihi te mwasigiau inau Nitun God vora gaituvwa.

¹⁹ Silo vevegi mwa lalaḡo kun geki: gigita nu mai huba vai lol ureure, take sinombu ram dabe ute meto nin gigita, bwatuna nora lalaḡov hantai.

²⁰ Ihei tehe gabe mwa lalaḡo hantai kea mwa barihai gigita i sihav dalin̄oro tehe vai lol gigita, bwatuna mwa hav doron tehe be non lalaḡov hantai vi maserasera.

²¹ Take ihei tehe gabe mwa lalaḡo vavtutu kea mwa mai vai lol gigita huri be gigita mwa lol bisirainia be hano nu lolia kea nu vora gina gogonai lalai God.

Jon Garuhisabuga mwa Bevuri huri Jisas

²² Ataguna gea Jisas mai non roron̄tai ram bano vai lol vanua Judia, i mwa do aia huri gubwen̄ rituai, i mwa lol garuhisabuga mulei.

²³ Jon mulei mwa garuhisabuga lol vanua Aenon aben ute Salim n̄ano, bwatuna aia wai ivusi. Sinombu ram bano vai abena, i mwa garuhisabugainira.

²⁴ (Geki amua Jon mwa siv togo lol imwa vauvauhi.)

²⁵ Ira roron̄tai non Jon rituai ram daubwatuna ram bigaigai mai ira Jius vwate huri silon bwagabwaga be atatu vi melmelo ginia lolmatan God.

²⁶ I ram bano vai aben Jon ram bevea be, “Vagahi gom binihi dum wani gabe nu to maigo haltavalun Jodan, wani gabe gon vevuri huria? Kekadogaha, kea mwa ḡaruhisabuga i sinombu ram ban vai abena!”

²⁷ Haḡe Jon mwa bwaliura mwa bevea be, “Ihei si hav haḡo te dum hano tehe vaivotu God vi laia lalainia.

²⁸ Kimiu sibomiu gim bora noḡu turatura huri hano nan vevea be, ‘Inau nam hav vora tehe Kraes, God nu horau amua take kea vi siv mai atagu.’

²⁹ Vavine be mwa lagi, kea ha tasalan ahoana; take buluana non ahoana, mwa du n̄an mwa roron̄tai silon non buluana, mwa ron̄ mwandavuha gin silon non buluana.

³⁰ Nav hivhivo ta kea vi haehae.”

Kea Gabe nu Himai nin Amare

³¹ Wani gabe mwa himai nin ute atamare mwa roroa liu nin atatu n̄oto. Ta wani gabe mwa mai lol ureure mwa bora atatu vai lol ureure i mwa avo n̄an huri ginau ata lol ureure, take wani gabe mwa himai nin amare nu holomare liura n̄oto.

³² Mwa bevuri huri hano nu gitae i nu ron̄oe, ita ihei gaituvwa mwa hav lai te ḡoḡo non avoana.

³³ Take ihei tehe gabe mwa lai ḡoḡo non avoana, mwa dovon̄ainia be God kea mwasigi.

³⁴ Wani gabe God nu horae mai, mwa avo alun avoana non God, bwatuna God nu lol bamasirinia gin non Vui Sabuga.

³⁵ God mwa dabe Nituna i mwa lai muramura duluai lalainia.

³⁶ Ihei tehe gabe mwa binihimwasigi Nitun God vi haḡo rahuana vai tuai; take ihei tehe gabe mwa siehi nitun God rahuana sigai alolona, take kea vi togo aten silo vevegi non God.