Leo Tavuha gabe Jon nu Ravae 13 - Hano Niu Testamen

Jisas mwa Bwaga Bwalagera non Roron̄tai

¹ Haḡe gubwen̄i amua mwasivora gubwen̄in Samsamwaran Halbisḡalau. Jisas nu iloe be tarona mwa mai huria be vi vano nin ureure geki vai aben Tata. Vataha mahavana kea nu tabera gabe ran togo lol ureure kera gabe non atatu sibona, i nu tabera vaivotu nogonana.

² Ute mwa ravravi Jisas mwa ḡan ginau maira non roron̄tai. Haḡe vui hantai nu tau binihiva huba alolon Judas nitun Saemon Iskariot, huribe vi sine Jisas.

³ Jisas nu iloe be Tata nu lai muramura duluai lalainia; nu iloe be kea nu mai nin God i vi vano vai aben God.

⁴ Haḡe kea mwa domare nin tebol, mwa lai dagai non koti, i mwa weswesia gin man̄man̄i.

⁵ I kea mwa dadan̄ wai lol disi, i mwa dau bwatuna mwa bwaga bwalagera non roron̄tai i mwa man̄ira gin man̄man̄i be mwa weswesinia.

⁶ Haḡe mwa mai aben Saemon Pita, i Saemon mwa bevea lalainia be, “Gomen bwaga bwalageku, Ratahigi?”

⁷ Haḡe Jisas mwa bwaliua be, “Gom hav ilo te havanau gabe nam lolia kadogaha, take gov siv iloe atagu.”

⁸ Pita mwa bev luae be, “Sigai gosav bwaga te bwalageku n̄an haḡea!” Haḡe Jisas mwa bwaliua be, “Be nasav bwaga te bwalagemwa, gosav vora te noḡu roron̄tai.”

⁹ Saemon Pita mwa bevea lalainia be, “Ratahigi, gosav bwaga te bwalageku n̄an! Take limaḡu, i bwatuku mulei!”

¹⁰ Jisas mwa bevea be, “Be atatu tehe gabe rebehina nu melmelo huba, mwa hav mom du tehe be vi mom bwagae, take bwalagena n̄ano. Kimiu duluai gin melmelo take gaituvwa n̄an sigai.”

¹¹ (Jisas nu ilo wani huba gabe vi sinea; i bwatuna haḡea mwa bevea be, “kimiu duluai gin melmelo, take gaituvwa n̄an sigai.”)

¹² Ataguna be Jisas mwa bwaga bwalagera, kea mwa saga mulei non koti i mwa bano mulei lol tanona la tebol. Haḡe mwa hudalinira be, “Gim ilo binihiva huri havanau gabe nam siv lolia lalai kimiu kadogaha?

¹³ Gim uloiau be Vagahi i Ratahigi, i mwasigi be gim uloiau kunia, bwatuna gabe inau haḡea nam lai iha gairua gea.

¹⁴ Inau nomiu Ratahigi i Vagahi, nam siv bwaga bwalagemiu, mwa du be giv bwaga mulei bwalagen ira tuamiu.

¹⁵ Nam dau malele lalai kimiu huri be giv lol hano kun gabe nan siv lolia lalai kimiu.

¹⁶ Nam bev mwasigi lalai kimiu be: Turin rovoga mwa hav tomua tehe nin non Ratahigi, i horata mwa hav vora te lavoa nin wani gabe nu horae.

¹⁷ Kadogaha be gim ilo mwasigi geki, giv samsamwara liu be giv lalaḡoinia!”

¹⁸ “Nam hav avo tehe huri kimiu duluai; nam ilo ira hei gabe nan gita luara. Take mwa du be ravrava Sabuga vi visirai gabe mwa bevea be, ‘Atatu gabe mwa ḡan bul maiau vi van burigaiau.’

¹⁹ Nam bev ginau geki lalai kimiu vuvuri gim siv loli, huria be mahavana be vi loli, giv iloe be, ‘Inau nam dogo Vai tuai.’

²⁰ Nam bev mwasigi lalai kimiu be, ihei tehe mwa lai ḡoḡo atatu vwate gabe nan horae mwa lai ḡoḡoau mulei; i ihei tehe mwa lai ḡoḡoau mwa lai ḡoḡoe gabe nu horau.”

Jisas mwa Bev Serae be Judas vi Sinea

²¹ Ataguna be Jisas nu vev vuvuri ginau geki, binihina mwa n̄ala maragai i mwa bev luae mwa bevea be, “Nam bev mwasigi lalai kimiu be: vwate nin kimiu vi sineau.”

²² Haḡe ira roron̄tai ram ḡitagitara, ram binbinihi mamaragai aluna be ihei uhu be mwa avo huria.

²³ Tuara vwate ninira roron̄tai kea gabe Jisas mwa dabea, nu to hurin Jisas.

²⁴ Haḡe Saemon Pita mwa daiwarea mwa bevea be, “Hudalinia be ihei gea mwa bevea.”

²⁵ Haḡe roron̄tai gea mwa dagara sosori Jisas mwa hudaligi be, “Ihei gea, Ratahigi?”

²⁶ Jisas mwa bwaliua be, “Nav ruhu bereti lol beleti ba laia lalainia; wani haḡe gea.” Haḡe kea mwa lai tavihen bereti, mwa ruhua, mwa laia lalai Judas, nitun Saemon Iskariot.

²⁷ Mahavana be Judas mwa lai bereti, Setan mwa haroro alolona. Haḡe Jisas mwa bevea lalainia be, “Goi vilvilehi mai ginau be gov lolia!”

²⁸ Kera duluai gabe ram dogo la tebol ram hav iloe tehe be huri hano Jisas mwa bevea kungeki lalainia.

²⁹ Take bwatuna be Judas mwa ḡitaḡoro tan̄an homu, i ira roron̄tai rituai ram binihia be Jisas mwa bevea lalainia be men van ba bol te ginaganiana be ram doronia, huri samsamwara sage men lai ginau lalai ira hiru.

Leo Horai Gara

³⁰ Judas mwa ḡan bereti gea vuvuri mwa bwihavare darihou. Ute bon̄i huba.

³¹ Ataguna be Judas mwa bano, Jisas mwa bevea be, “Kadogaha Nitun Atatu vi sarisari; sarisarin ihan God vi visirai aluna.

³² Be ihan God mwa roroa bwatuna inau, kunia God vi lol roroaiau inau Nitun Atatu ginia sibona, i vi lol darihounia kunia.

³³ Ira nituku, nasav mom dogo te mai kimiu vain̄ava. Giv hiḡeau; take nai vevea lalai kimiu kadogaha havanau nan vevea lalai ira lavoa ata Jius be, ‘Gisav vano te dum lol ute be nai van aia.’

³⁴ I kadogaha nav lai leohorai gara lalai kimiu: gabe mwa bevea be, giv tabe vatvataha atatu. Kun gabe nam dabe kimiu, kimiu mulei giv tabetabe kimiu.

³⁵ Be giv tabe vatvataha atatu, kunia atatu duluai rav iloe be kimiu noḡu roron̄tai duluai.”

Jisas mwa Seserainia be Pita vi Tugua

³⁶ Haḡe Saemon Pita mwa hudaligi be, “Gomen van halabehe, Ratahigi?” Haḡe Jisas mwa bwaliua be, “Gosav huri te dumwiau kadogaha lol ute gabe nai vano aia, take tiri ḡalia gov siv huriau.”

³⁷ Pita mwa hudaligi be, “Matuke huri hano be nasav huri te dumwigo kadogaha Ratahigi? Nam lol vatuvwai be nav mate hurigo!”

³⁸ Jisas mwa bwaliua be, “Matu gom lol vatuvwainigo mwasigi be gov mate huriau? Nam bev mwasigi lalainigo be: amua toa gim siv totoreto, gov tuguau vatolu.”