Leo Tavuha gabe Jon nu Ravae 10 - Hano Niu Testamen

Avoan Dalogai huri Radaiḡoro

¹ Jisas mwa bevea be, “Nam bev mwasigi lalai kimiu be: atatu gabe mwa hav haroro tehe la mwasin gatavan sipsip, take mwa ḡalau son̄son̄o, kea haḡea susurana i atat wehiwehi bonogai.

² Atatu gabe mwa haroro n̄an la gatava kea haḡea radaiḡoro sipsip.

³ Wani mwa gitaḡoro matgatava mwa havan̄ gatava huria; i sipsip ram ron̄ silona mahavana mwa uloi mwasin bilan sipsip gin ihara i mwa domuai bwihavareinira.

⁴ Mahavana be mwa lai bwihavareinira, kea mwa domuainira, i sipsip ram huria, bwatuna ram ilo silona.

⁵ Rasav huri te dum ihei dolua; be kunia, rav romaragai nin wani gea, bwatuna ram hav ilo te silona.”

⁶ Jisas mwa bev avoan dalogai geki lalainira, take ram hav lai te batoi binihiva ata alolona.

Jisas Radaiḡoro Tavuha

⁷ Jisas mwa bev muleinia be, “Nam bev mwasigi lalai kimiu be: inau haḡea matgatava huri sipsip.

⁸ Kera dodolua gabe ran mai amua niniau kera susurana i atat wehiwehi bonogai, take sipsip ram hav ron̄ora tehe.

⁹ Inau matgatava. Ihei tehe mwa haroro siviau kea vi rahu; kea vi haroro i vi bwihavare vi habwe gan ginau.

¹⁰ Susurana mwa mai liuhage n̄an be men sura, men wehi bonogai, i men lol kaburai. Nam mai liuhage be giv lai rahuana, rahuana be vi masiri lol ginau tavuha duluai.”

¹¹ “Inau radaiḡoro tavuha, nam lin̄ rahuku be nav mate huri sipsip.

¹² Mahavana be turin rovoga gabe, mwa hav vora te radaiḡoro i sipsip ram hav vora te bilana, mwa ḡita ginau rahu turu mwa mai, mwa derai sipsip mwa romaragai; haḡe ginau rahu turu mwa rais sipsip i mwa derainira.

¹³ Haḡe atatun rovoga mwa romaragai bwatuna be kea atatun rovoga vuroi i mwa hav lai te binbinihi maragai huri sipsip.

^14-15 Inau radaiḡoro tavuha. Kun gabe Tata mwa iloau i nam ilo Tata, kunia mulei nam ilo bilaku sipsip i ram iloau. I nam lin̄ rahuku be nav mate hurira.

¹⁶ Vatugi sipsip dodolua gabe bilaku ram hav togo tehe lol vatugigi geki. Nav laira mulei; rav ron̄ siloku, i rai vora vatugi sipsip gaituvwa mai radaiḡoro gaituvwa.”

¹⁷ “Tata mwa dabeau bwatuna be nam lin̄ rahuku, huria be nav lai muleinia.

¹⁸ Atat vwate sihav lai te dagai rahuku niniau. Nam lin̄ia la noḡu binihiva mau. Noḡu mahaḡea be nav lin̄ia, i noḡu mahaḡea be nav lai muleinia. Geki ginau be Tamaḡu nu vevea lalaiau be nav lolia.”

¹⁹ Mulei harabora mwa dogo lol davolan sinombu bwatuna avoana kerageki.

²⁰ Haḡe kera ivusi ram bevea be, “Mwa dogo mai vui hantai! Kea mwa daltale! Hurihano gim roron̄tainia?”

²¹ Take atatu rituai ram bevea be, “Atatu be mwa dogo mai vui hantai sihav avo te dum kungeki! Vui hantai vi lol matagara be ramen gita mulei ute kun hanigi?”

Ram Bev Dagara Jisas

²² Haḡe lol taron rara, gubwen̄ tovo huri samsamwaran lol melmeloi huri imwan God be vi Sabuga mulei mwa haḡoana Jerusalem.

²³ Jisas mwa lago la malmalun Imwan God be ihana Malmalu non Solomon,

²⁴ mahavana be sinombu ram ḡoḡo dalisia i ram hudaltalinia ram bevea be, “Gov lol kamai gav hohovi huri mahavana kunhanigi? Goi vev mwasigi lalai kamai: be giḡo haḡea Kraes?”

²⁵ Jisas mwa bwaliura mwa bevea be, “Nan vevea huba lalai kimiu, take gim hav vinihi te mwasigiau. Lalaḡova duluai gabe nam lolia lol ihan Tata ram bev seserainia huriau.

²⁶ Take gim hav vinihi te mwasigi aluku, bwatuna be kimiu gim hav vora te bilaku sipsip.

²⁷ Bilaku sipsip ram ron̄ dum siloku; nam ilora, i ram huriau.

²⁸ Nam lai rahuana vai tuai lalainira, i rasav mate tehe. Atatu sihav rais te dagainira ninia.

²⁹ Havanau gabe Tamaḡu nu laia lalaiau gaivua liu ginau duluai, i atatu vwate sihav lai te dagai dumwia nin liman Tamaḡu.

³⁰ Inau mai Tata gaituvwa n̄an.”

³¹ Haḡe kunia sinombu ram hara vatu be ramen vohae ginia.

³² Haḡe Jisas mwa bevea lalainira be, “Nan lol lalaḡova tavuha ivusi lalai kimiu gabe Tamaḡu nu laia lalaiau be nav lolia; take hava lalaḡova ninira geki be gim doron be giv vohau huria?”

³³ Haḡe ram bwaliua be, “Gam hav doron tehe be gav vohago huri nom lalaḡov tavuha duluai, take huri nom avoan hantai! Giḡo atatu n̄an vuroi, take gom loligo sibomwa be gomen vora God!”

³⁴ Jisas mwa bwaliura mwa bevea be, “Nu ravae lol nomiu Silo sibomiu be, God mwa bevea be, ‘Kimiu ira god.’

³⁵ Tam iloe be havanau be ravrava Sabuga mwa bevea kea mwasigi vai tuai; i God mwa uloi atatu kera gea be ira god, atatu kera gea gabe God mwa lai non avoana lalainira.

³⁶ Huriau, Tata nu gita luau i nu horau vai lol ureure. Kunhanigi, gim bevea be nam av hantai huria be nam bevea be inau Nitun God.

³⁷ Gisav mom binihi te mwasigiau kadogaha bwatuna be nan hav lol te havanau gabe Tamaḡu mwa doron be nav lolira.

³⁸ Take be nam lol dumwira, son̄o be gim hav vinihi te mwasigiau, mwa du be giv binihimwasigi noḡu lalaḡova, huribe gimen ilo vatuvwainia vai tuai be Tata mwa dogo aloloku i inau nam dogo lol Tata.”

³⁹ Haḡe ram doron be ramen haḡo batugehi Jisas mulei, take mwa mwalue nin limara.

⁴⁰ Haḡe Jisas mwa bano mulei tuhi wai Jodan vai lol ute gabe Jon nu garuhisabuga aia, i mwa dogo aia.

⁴¹ Haḡe sinombu ivusi ram mai huria ram bevea be, “Jon mwa hav lol te ginau dan̄an̄a, take ginau duluai gabe nu vevea huri wani geki nu mwasigi.”

⁴² Haḡe sinombu gaivua mwa binihimwasiginia.