Leo Tavuha gabe Jon nu Ravae 1 - Hano Niu Testamen

Avoan Mataisao non God

¹ Amua nin bwatun ureure, Avoana nu togo huba, kea nu togo mai God, i kea kun God.

² Nin bwativuna radui avoana nu togo mai God huba.

³ God nu lol ginau duluai ginia; ginau vwate lol tauva nu hav tauana te dagai ninia.

⁴ Avoana uhu kea bwatun rahuana, i rahuana geki mwa lai gigita lalai atatu duluai.

⁵ Haḡe gigita mwa ḡigita lol ute meto, ta ute meto mwa hav tu te ḡoro dumwia.

⁶ God nu hora non horata vwate, ihana Jon,

⁷ kea nu mai be men vev luae lalai sinombu huri gigita geki, huribe atatu duluai rav ron̄ roroi huria ba binihimwasigi.

⁸ Kea sibona nu hav vora te gigita; ta nu mai n̄an be men vevsera huri gigita.

⁹ Geki haḡea mwasin gigita, gigita uhu mwa mai lol ureure i mwa ḡigitai atatu duluai.

¹⁰ Avoan mwa dogo lol ureure, i God nu tau ureure ginia, take ureure mwa hav gita te batoia.

¹¹ Kea nu mai lol mwasin vanuana, take non sinombu sibona ran hav lai te ḡoḡoe.

¹² Ta kera rituai gabe ran lai ḡoḡoe, ram binihimwasiginia; i mwa lolira ram mai gi ira nitun God mwasigi.

¹³ Ran hav mai tehe gi ira nitun God hurin alen̄an ureure, kun gabe, naturirigi ram bora nin ira tamara lol ureure geki; ta God sibona mwa doron be vivora Tamara.

¹⁴ Haḡe Avoana mwa bora atatu, mwa masiri gin hogoi i mwasigi, i mwa dogo mai gida. Tam ḡita sarisarina, sarisari gabe nu laia kun gabe Nitun vora gaituvwa non Tamana.

¹⁵ Jon nu avo huria. Nu vev luae be, “Geki haḡea wani gabe nan avo huria nan vevea be, ‘Kea vi mai ataguku, ta kea lavoa niniau, bwatuna kea nu togo amua nam siv vora.’ ”

¹⁶ Kea mwa lol bamasiri gida duluai gin non hogoi tavuha, i mwa lai lalan̄an vatavuha vatvataha gida.

¹⁷ God nu lai Silo sivi Moses, take God mwa lai hogoi i mwasigi sivi Jisas Kraes.

¹⁸ Atatu vwate mwa hav gita te radui God. Nituna vora gaituvwa, gabe kea kun God sibona i mwa dogo hurin Tamana, kea mwa seserainia lalai gida.

Jon Garuhisabuga mwa Bev Lua Roroi huri Jisas

¹⁹ Ira tomuai ḡoro ata Jius nin Jerusalem ram hora ira tataroi maira ata la varan Livae vai aben Jon, ram hudalinia be, “Giḡo ihei?”

²⁰ Jon mwa hav busbusi tehe be men vwaliura, take mwa bev lua didininia mwa bevea be: “Nam hav vora te Kraes.”

²¹ Haḡe ram hudalinia be, “Matu giḡo ihei? Giḡo Elaija?” Take Jon mwa bwaliura be, “Sigai, nam hav vora te Elaija.” Haḡe ram hudali muleinia be, “Giḡo Atatun Vevsera?” Take mwa bwaliura be, “Sigai.”

²² Haḡe ram bevea lalainia be, “Kunia vevea lalai kamai be giḡo ihei. Bwatuna be gav lai avoan vwaliu mulei lalainira be ran hora kamai. Take giḡo sibomwa gom bevego be ihei?”

²³ Jon mwa bwaliura gin avoana non atatun vevsera Aesaia mwa bevea be: “Inau ‘silon wani gabe mwa ulo la vanua vuroi be: Giv lol bavtutui halan Ratahigi huri non lagoana!’ ”

²⁴ Ira horata, gabe ira Varise ran horara,

²⁵ ram hudali Jon be, “Be giḡo gom hav vora te Kraes sa Elaija sa Atatun Vevsera, huri hano gom garuhisabuga?”

²⁶ Jon mwa bwaliura be, “Nam garuhisabuga gin wai, take atatu vwate mwa du bul mai kimiu gim hav iloe tehe.

²⁷ Kea mwa mai ataguku, take inau siboku nam hav dadariha tehe be nav tugu gaon non sus.”

²⁸ Ginau geki nu loli Betani, haltavlun wai Jodan batoi halan al tavwaga, lol ute gea be Jon mwa garuhisabuga aia.

Jisas Kun Sipsip Kolo Bilan God

²⁹ Haḡe gubwen̄ dolua Jon mwa ḡita Jisas mwa mai huria, mwa bevea be, “Kea ha kahaḡa be Nitui Sipsip bilan God, gabe mwa lai dagai vuron ureure!

³⁰ Wani haḡe uhu be nan vevea huria be, ‘Atatu vwate vi mai ataguku, ta kea lavoa niniau, bwatuna nu togo amua inau nam siv vora.’

³¹ Nan hav iloe tehe be kea vivora atatu kunhanigi, take nan mai nam garuhisabuga gin wai huribe men lol seserai wani gea lalai sinombu ata Israel.”

³² Jon mwa bev luae be: “Nan gita Vui nu himai nin amare kun manbona vai aluna.

³³ Nam hav iloe te radu be kea haḡea, take God gabe nu horau be nav garuhisabuga gin wai nu vevea lalaiau be, ‘Gov gita wani gabe Vui vi himai aluna; kea haḡea wani gabe vi garuhisabuga gin Vui Sabuga.’ ”

³⁴ Haḡe Jon mwa bevea be, “Nam gitae, i nam bevea lalai kimiu be, kea haḡea Nitun God.”

Ira Muan Roron̄tai non Jisas

³⁵ Haḡe gubwen̄ dolua Jon nu tu aia mulei mai non roron̄tai gairua,

³⁶ batena be mwa ḡita Jisas mwa laḡao, mwa bevea be, “Gitae kea ha kahaḡa be Nitui Sipsip bilan God!”

³⁷ Haḡe ira roron̄tai non Jon gairua ramuru ron̄ avoana geki ramuru huri Jisas.

³⁸ Jisas mwa ban burigai, mwa ḡitara be ramuru huria, mwa hudalinira be, “Gumuru hiḡe havanau?” Ramuru bwaliua be, “Matu gom do behe Rabae?” (Avoana geki binihiva be “Vagahi.”)

³⁹ Jisas mwa bwaliura be, “Giru mai ba ḡitae.” (Mahavana kun alo gaivasi huba atagun bobon alo.) Haḡe ramuru bano bul maia ramuru ḡita ute be mwa dogo aia, i ramuru dogo bul maia huri gubwen̄ duluai.

⁴⁰ Vwate ninira gea Andru, gabe tuan Saemon Pita.

⁴¹ Haḡe mwa habwe darihou tuana Saemon mwa bevea lalainia be, “Gan habwe Mesaea.” (Avoana geki binihiva be, “Kraes.”)

⁴² I kea mwa lai Saemon vai aben Jisas. Jisas mwa ḡarere mwa ḡitae i mwa bevea lalainia be, “Ihamwa Saemon nitun Jon, take vi uloinigo be Kivas.” (Geki kun iha n̄an be Pita binihiva be “Vatu.”)

Jisas mwa Uloi Vilip mai Nataniel

⁴³ Haḡe gubwen̄ dolua Jisas mwa binihia be vi vano vai Kalili. I kea mwa habwe Vilip mwa bevea lalainia be, “Mai ba huriau!”

⁴⁴ (Vilip kea ata Betsaeda, bwatutun vanua be Andru mai Pita ramuru dogo aia.)

⁴⁵ Vilip mwa habwe Nataniel mwa bevea lalainia be, “Gan habwe wani gabe Moses nu ravae huria lol bukan Silo i kera atatun vevsera mulei ran ravae huria. Kea haḡea Jisas nitun Josep ata Nasaret.”

⁴⁶ Haḡe Nataniel mwa hudaligi mwa bevea be, “Matu ginau tavuha te dum abena be vi mwalue nin Nasaret?” Vilip mwa bwaliua be, “Mai ba gitae.”

⁴⁷ Mahavana be Jisas mwa ḡita Nataniel be mwa mai huria, mwa bevea huri Nataniel mwa bevea be, “Geki haḡea mwasin ata Israel; kea atat mwasigi!”

⁴⁸ Nataniel mwa hudalinia be, “Gom iloau kun hanigi?” Jisas mwa bwaliua be, “Nan gitago gon togo aten gai vik amua Vilip mwa siv uloinigo.”

⁴⁹ Nataniel mwa bwaliua be, “Vagahi, giḡo haḡea Nitun God! Giḡo haḡea Ratahigi Lavoa ata Israel!”

⁵⁰ Jisas mwa bevea be, “Matu gom binihimwasigi bwatuna n̄an be nam bevea lalainigo be nan gitago, gon togo aten gai vik? Gov gita ginau lalavoa ivusi ninia geki!”

⁵¹ I kea mwa bevea lalainira be, “Nam bev mwasigi lalai kimiu be: giv gita mahao vi mahavan̄i i ira enjel non God rav hae i rav himai aluku, inau Nitun Atatu.”