Jemes 4 - Hano Niu Testamen

Mwemwearuana mai Ureure

¹ Gom iloe haḡea kun hanigi bwatun nomiu vigaigaiana i bwaloana? Ram mai nin nomiu binihiv hahantai gabe ram bwalo alolomiu.

² Gom doron ginau duluai, take ram hav mai te lalainigo. Gom dogo la vavaun bwaloana, i gom binihi hantai atat dodolua, take ginau duluai be gom doronia ram hav mai te dum abemwa radu. I gom bigaigai i gom bwalo. Gosav lai te ginau duluai be gom doronia, bwatuna be gom hav hudali te God.

³ Be gov hudaligi, gosav laia tehe bwatuna be gom hudali God gin alen̄ hantai. Gom doron ginau be gov haḡora huri nom doroniva sibomwa.

⁴ Take gom hav mwasigi tehe lalai God! Gom iloe be doronivanan ginau ata lol ureure nuḡun atatu be mwa barihai God? Atatu be mwa doron be men mai gi tuan ureure kea mwa bora ivwalu non God.

⁵ Gom binihia be binihivanan ravrava sabuga sigai be mwa bevea be, “Vui be God mwa daua aloloda nu masiri gin binbinihi hahantai.”

⁶ Take hogoi be God mwa daua aloloda gaivua maragai, kun ravrava sabuga mwa bevea be, “God mwa avo vai alun ravwegana, take mwa lai hogoi lalai ira maḡemu.”

⁷ Lai duluai rebehimwa lalai God. Tu wasigi ḡoro atmate, i atmate vi rovo ginigo.

⁸ Mai sosori vai aben God, i God vi mai sosorigo. Giv bwaga limamiu ira atat vuroga! Giv lol melmeloi irubwimiu, kimiu ira hoḡoiḡoro!

⁹ Gov ron̄ mwahantai, gov gagarui mataruamwa i gov dei! Mwa du maragai be gov leahi nom manana gi deiana i nom samwarana vi mai gi ron̄ mwahantai!

¹⁰ Giv togo lolomohigi lolmatan Ratahigi, i kea vi sagego.

Giḡo vorate Harahara.

¹¹ Ira tuaku duluai, gosav vev te ginau hahantai vai alun atat dolua. Kebe gov avo vai alun ira binihimwasigi dodolua sage gov vevegira, giḡo gom bevegi i gom avo vai alun Silo. Batena be gom bevegi Silo, giḡo gom hav mom borate horata non Silo, take gom mai gi harahara.

¹² God nu lol nogonogoi silo huba i kea harahara. God n̄ano kea vi varahu i vi lol kaburai rahuana. Gom binihia be hiḡo ihei be gom bevegi atat dodolua?

Avoan Wasi huri Binihiv Sage

¹³ Giv roron̄tai, kimiu be gim bevea be, “Garigi sa vaigogo tav vano vai lol bwatutun vanua dodolua. Tav togo aia huri taul gaituvwa, tav lol imwa tahehei huribe tav lai homu.”

¹⁴ Take gom hav iloe tehe be havanau vi loli vaigogo! Rahumwa nuḡun vivivi. Gom ḡitae vilvilehi n̄ano i vi nogonogo.

¹⁵ I mwa du be gov vevea be, “Kebe God mwa doronia tav rahu tav lol ginau geki i kahaḡa.”

¹⁶ Take kadogaha gom ravravwega i gom avo sasagerega. Avoan ravravwega duluai geki ran hantai.

¹⁷ Atatu be mwa ilo ginau vavtutu be vi lolia, take mwa hav lolia tehe, kea mwa buroga.