Jemes 3 - Hano Niu Testamen

Tav Vwalau nonda Avoana Duluai

¹ Ira tuaku duluai be nam dabera, mwa hav tu tehe be kimiu ivusi giv mai gi vagahi, bwatuna be gom iloe be gida be tam bagahi, vagahi vi lai vevegi wasi maragai nin atat dodolua.

² Gida duluai tam lol vahalana ivusi. Kebe atatu rasav vev te ginau vahala, kera rav vavtutu i rav vwalau dum rebehira sibora.

³ Batena be gom dau gao lol bwan̄on hos be men ron̄ gida, tam bwalau rebehina duluai.

⁴ Mulei giv vinihi waḡa gaivua maragai lan̄i wasi mwa sogai dum luae; take vohe kolo mwa bwalau waḡa gaivua, mwa lolia mwa bano lol ute duluai be atatuna mwa doronia.

⁵ Mean atatu nuḡun ginau geki: i kea ginau kolo vwate lol rebehi take mwa avo ravravwega huri ginau lalavoa. Tavihen manono vwate vi oda dum kaburai utmetue.

⁶ Mea nuḡun gabi, nuḡun ureure be nu masiri gin bwatigoro lol rebehida. Ira ginau hahantai nin meanda mwa lon̄ahi rebehida. Gabin meanda mwa dogo lol tanon vevegi, i mwa dau bwativun gabi be mwa leahi n̄oto rahun atatu.

⁷ Atatu ram lol dum ira ginau turu ram mamavu, kun manu, teltele, i ige, i ram lolira ram mamavu huba.

⁸ Take atatu vwate sihav lol te dum meana be vi mamavu. Kea nu lala, nu hantai i nu masiri gin ginau hantai.

⁹ Tam ḡogonai God tamanda, gin meanda, take tam balahe gin bwan̄oda lalai atatu be God nu lolira kunia sibona.

¹⁰ Avoan hantai avoan tavuha mwa mai nin bwan̄o gaituvwa n̄ano! Ira tuaku duluai, ginau geki sihav loli tehe!

¹¹ Wai i tahi raru si hav mwalue tehe dum nin matavuravuran wai gaituvwa n̄ano.

¹² Ira tuaku duluai, gai vik vwate sihav vwae te dumwi gi oliv; i sage gaon taligaon waen sihav vwae te dumwi gi vik, i mulei lulun wai vwate be nu masiri gin tahi si hav lai te dum wai mwinu tavuha.

Mwasin Mataisao nin Amare

¹³ Atatu rituai abena alolomiu be ran iloute i ran mataisaoga? Ras lol seserai ginau geki gin rahuan tavuha, i rav lol ginau tavuha gin maḡemu be mwa mai nin mataisao.

¹⁴ Kebe gov bugurai gov sine hantai lol irubwimwa, gosav avo tehe ravravwega. Ira avoan ravravwega geki kea tenteneana be mwa dahuli mwasigi.

¹⁵ Lalan̄an mataisao kun geki mwa hav mai te nin amare. Take nin ureure, kea nu hav vorate non vui, kea mwa mai nin atmate.

¹⁶ Sinombu be sine hantai i bugurana, ram bilen̄alen̄a i ram lol ginau hantai.

¹⁷ Take mataisao be mwa mai nin God kea muan ginau be nu melmelo. Ataguna tamwata, silo gogonai, i nu maron̄ron̄o be vi ron̄ mwahantai. Mataisao geki mwa lol vatuvwai be vi bului kera be ram dogo ririhai i vi lol tavuha lalai kera dodolua. Kea nu vavtutu i nu mwasigi.

¹⁸ Atatu be ram riv birin tamwata rav harahara ginau tavtavuha huri rahuan tavuha.