Jemes 1 - Hano Niu Testamen

Semes Rahun ira Binihimwasigi

¹ Inau Semes atatun rovoga non Ratahigi i Jisas Kraes: Avoan helheloi i mwa bano lalai sinombu non God be ram du vataha ute lol ureure.

Binihimwasigi Garagusi i Mataisao

² Ira tuaku lol taro be gim dogo ririhai giv masiri gin samwarana,

³ bwatuna be gim iloe be taro ririhai geki ram haḡo ron̄ nomiu binihimwasigi garagusi, i geki vi lai ron̄ mwan̄ava.

⁴ Lol taro be atatu ram lol gita rahumwa gov seserai ron̄ mwan̄ava. Vuvuri gov vavtutu tavuha i vi haraharai i gov haḡo ginau duluai be gom doronia.

⁵ Take be ihei mwa doron mataisao vi hudali God huria. Kea nu maḡemu i samsamwara be vi laia lalai sinombu, i kea vi laia lalainigo mataisao.

⁶ Take batena be gom hudali God mwa du be gov binihimwasigi take gosav binihi te gairuruai. Atatu be mwa binihi gairuruai kea kun navo lol tahi be lan̄i mwa hereinia.

^7-8 Atatu be ram binihi gairuruai, ram binihi ginau gaivua vaituvwa, rasav vinihi tuhi te dum huri hano be ram lolia. Rasav vinihia tehe be God vi lai ginau vwate lalainira.

Mwasin Roso

⁹ Ira binihimwasigi be ira hiru mwa du be rav ravwega, bwatuna God mwa lolira ram ratahigiga lol vui.

¹⁰ Kera be ram rosoga mwa du be rav ravwega, bwatuna God nu seserainia lalainira be ram hiruga lol vui. Ira roso rav mate kun virangai lol mwanea.

¹¹ Alo mwa domare mai hahavwan wasi mwa lol ririvuana ram ḡoru. Virangai ram hovi i gulina nu vano. La hala kunia atat rosoga rav mate lol taro be ram ḡitaḡoro radu nora rovoga.

God mwa hav Ḡal te Atatu

¹² Taro be sinombu kalkaliana mwa haḡo ron̄ora ram du wasi rahurahu, mwa du be rav samwara. Ataguna be ram seserai nora binihimwasigi God vi tavwera gin rahuana vai tuai. God nu tatauleo lalainira duluai be ram dabea.

¹³ Lol taro be sinombu ram do lol kalkaliana rasav vevea tehe be God mwa ḡaliau, “Hantai sihav ḡal te dum God,” i God sibona mwa hav ḡal te ihei.

¹⁴ Take sinombu ram lai kalkaliana batena nora doroniva sibora mwa domuainira i ram vidi aluna.

¹⁵ Doroniva uhu mwa mauri i mwa lai mateana.

¹⁶ Ira tuaku be nam dabe kimiu gisav vora te kun taltaleana huria.

¹⁷ Lalaḡov tavuha duluai i hogoi tavuha duluai ram mai nin God. Ginau tavtavuha keragea ram mai nin God be nu lol alo, vula, ira visiu, i kea mwa hav leahi tehe kun gigitan ginau keragea be ram leahi.

¹⁸ God nu vinihi tuhi be vi lai rahuana sivi avoan mwasigi be tai vora raumatan ginau duluai lol ginau duluai be nu lolia.

Roron̄tai i Tabe Silo

¹⁹ Ira mwasin tuaku be nam dabe kimiu, mwa du be gov roron̄tai i gov maḡemu lol avoana. Gosav lolhoro te vilvilehi,

²⁰ bwatuna be lolhoro si hav bului te dum rahumwa be vi vavtutu kunia be God mwa doronia.

²¹ Vuro i alen̄ deḡeteḡe gov tau dagainia nin rahumwa. Gin ron̄ maḡemu gov lai ḡoḡo silo vagahi non God i gov rivua lol irubwimwa. Silo vagahi geki vi varahu rahumwa.

²² Gov lol hano be silo vagahi non God mwa bevea; batena be gom roron̄tai gom hav lol te ginau vwate huria, gom dentene lalainigo sibomwa.

²³ Kera be ram ron̄ silo vagahi take ram hav lol te ginau vwate huria, ran ḡun atatu be ram ḡitara lol kilasi.

²⁴ Ram ḡita lolmatara i ram ban dagai vilvilehi ram binihi malioi nora gitava.

²⁵ Take kera be atat ron̄ mwandavuha mwasigi kera haḡea ram hiḡehiḡe tavuha huri silo vavtutu non God be mwa lol sinombu ram maribwesi, i ram hiḡehiḡe rahurahu huri avoana non God. Ram hav vinihi te malioi hano be ran ron̄oe, take ram dabe havanau be silo vagahi non God mwa bevea. Kera be ram lol ginau geki rav samsamwara maragai.

Mwasin Halan Gogonai huri God

²⁶ Kimiu gim binibe gim haḡo wasi nomiu binihimwasigi? Batena be gom hav vwalau te tavuhai meamwa, nom binihimwasigi kea ginau vuroi n̄ano, i gim dentene mulei lalai kimiu.

²⁷ God mwa laiḡoḡo binihimwasigi be nu melmelo, i vahalana sigai binihimwasigi geki mwa domuai atatu be ramen gitaḡoro ira mandue, ira bwero be ram hahagavi huri buluiana i vi lolira rav melmelo dagai nin alen̄an rahuana ata lol ureure.