Ifisas 6 - Hano Niu Testamen

Naturirigi mai ira Tama i Ratahi

¹ Naturirigi, giv tabe ira tamamiu i ratahimiu kunia be God mwa doronia, bwatuna be kea haḡea ginau vavtutu be vi loliana.

² “Gov tabe tamwamwa i ratahimwa.” Geki haḡea muan leo horai be tatauleo mwa dogo maia:

³ “vuvuri ginau duluai rav vavtutu maigo, i gov haḡo rahuan n̄ava lol ureure.”

⁴ Ira tama i ratahi, gosav lol te ira nitumwa be rav lolhoro, take gov vagahira be rav huhui silo vagahi non God.

Ira Turin Rovoga i ira Ratahigi Lavoa

⁵ Ira turin rovoga, giv tabe ira nomiu ratahigi lavoa lol ureure geki gin mataguana i binihimarahi i gin irubwimiu, kunia n̄ano be gom dabe Kraes.

⁶ Gosav lolia te n̄an kungeki lol taro be atatu ram ḡitago, be gomen lolira ramen ron̄mwandavuha. Gin irubwimwa duluai gov lol hano be God mwa doronia gida atatu be tam ḡogonai Kraes.

⁷ Giv lol nomiu rovoga lol samwarana. Gov lol rovoga kun gabe gom ḡogonai God, take vorate kunia be gom lol rovoga n̄ano lalai ira atamwani i vavine.

⁸ Gov vinihi dumwia be God vi lai tavwe lalai atatu duluai, turin rovoga sage atat vuroi, huri lolian tavuha.

⁹ Ira ratahigi lavoa, la hala n̄an kunia, giv tavuha lalai ira nomiu turin rovoga. Gisav lol te bwarebwarera. Giv vinihi dumwia be kea gabe nom ratahigi lavoa i nora Ratahigi lavoa haḡea be mwa dogo amare, i vi gita atatu duluai la dadarihanan gaituvwa.

Giv saga mwasin Haḡohaḡon Bwaloana non God.

¹⁰ Mulei, giv tu wasigi lol ihan God i lol non muramura lavoa.

¹¹ Giv tau mwasin haḡohaḡon bwaloana non God huribe gov bwalo dumwi mai ira hal viletelete non atmate.

¹² Nonda bwaloana vorate vai alun atatu lol ureure, take tam bwalo vai alun ira vui hahantai ata lol ureure amare, ira gitaḡoro hahantai, i ira muramura hahantai ata lol taro geki.

¹³ Kea haḡea mwa du maragai be gov tau haḡohaḡon bwaloana non God. I lol gubwen̄in atmate giḡo gov tu dum wasi. I lol taro be gov nogoi bwaloana gov tu dum wasi radu.

¹⁴ Giv tu wasigi mai gaiweswesin mwasigi be gom sisia dalis bugimwa i gitaḡoro huri vavtutu lol bwabwamwa.

¹⁵ Lol bwalagemwa gov saru Roroi Tavuha huri tamwata be vi buluigo be gov tu wasigi.

¹⁶ I mulei gov haḡo dovon̄a huri binihimwasigi garagusi be gov tuḡoro ira lio mamagani be ram oda non vui son̄son̄o.

¹⁷ Gov damei varahuva non God kun gabe gaisagan bwatumwa, i gov lai gaisarin Vui Sabuga gabe avoana non God.

¹⁸ Tataro lol Vui Sabuga vataha mahavana gin lalan̄an tataro, gov hudaligi huri ginau n̄oto be gom doronia. Huria be gov lolia kunia gov lol vatuvwai i si hav savigo tehe. Gov tataro vataha mahavana huri sinombu non God.

¹⁹ Giv tataro huriau be nav avo, be God vi hogoi avoana be nav vev dum ute hili huri Roroi Tavuha be mataguana sigai.

²⁰ Nan mai be nai vev lua Roroi Tavuha, i nam lolia kadogaha teti lol imwa vauvauhi. Giv tataro huriau be lol taro be nai vev lua Roroi Tavuha nasav avo tehe gin mataguana, take nav tu wasigi.

Doren Avoan Helheloi.

²¹ Nam hora Tikikas, tuamai be atatun rovoga binihimwasigi lol rovoga non God. Vi vev ginau n̄oto lalai kimiu be mwa lolia maiau. I giv iloe be nam dogo kunhanigi i nam lol havanau.

²² Nam horae lalai kimiu huri binbinihi geki huribe giv iloe be gam dogo kunhanigi, i vi av dura kimiu.

²³ Tamwata i lolotabetabe lalai kimiu nin God Tata i Ratahigi Jisas Kraes mai binihimwasigi garagusi.

²⁴ Hogoi non God lalai kimiu duluai be gim dabe nonda Ratahigi Jisas Kraes gin lolotabetabe be mosmosianana nu sigai.