Ifisas 4 - Hano Niu Testamen

Bulgaituvwa non Rebehi

¹ Inau lol imwa vauvauhi bwatuna be inau bilan Ratahigi. God nu gita lua kimiu be giv vora non sinombu, i nam avdura kimiu kadogaha be giv togo lol rahuana gabe God mwa uloi kimiu huria.

² Giv lin̄ maḡemu vataha mahavana i giv togo ḡoḡonai, i giv ron̄ mwa n̄ava, i giv dame ḡoro vatvataha kimiu lol lolotabetabe.

³ Kimiu giv bulu hara gaituvwa mai tamwata sivi Vui Sabuga, i giv lol dum hala duluai be vi van rahurahu hara gaituvwa la hala geki.

⁴ Aia rebehi gaituvwa i Vui non God gaituvwa, i God nu uloinigo be nom doronhohov gaituvwa n̄ano.

⁵ Aia Ratahigi gaituvwa, binihimwasigi garagusi gaituvwa, i garuhisabuga gaituvwa.

⁶ Aia God gaituvwa i Taman ginau duluai. Kea mwa lavoa i mwa dogo vataha ute i kea lol ginau duluai.

⁷ Kraes mwa lai hogoi vatvataha gida gaitutuvwai, mwa seserainia be kea mwa davuha kun hanigi.

⁸ Bwatuna haḡea mwa bevea lol ravrava sabuga be, “Mahavana be nu hae amare lol mahao, kea mwa domuai ira tatan̄an atat vauvauhi, i kea nu lai hogoi lalai sinombu.”

⁹ Mahavana be mwa bevea be, “Kea nu hae amare, Mwa bevea gin hava binihiva? Mwa bevea gin binihiva be kea nu himai muana vai ataa lol ureure.

¹⁰ Jisas nu himai vai ataa, i kea atatu n̄an haḡe gea radu gabe nu hae la ulun mahao duluai. Kraes nu lolia kunia huri be men ron̄ inau duluai gin rebehina sibona mai non ron̄ova.

¹¹ I Kraes nu lai hogoi lalai sinombu nu lol rituai be rai vora hala, i rituai rav vora atatun vevsera, i rituai be rai vora ira toretore, i rituai be rav haḡo rovoga be ramen haḡoe ba gitaḡoro tavuhai i ba bagahi sinombu non God.

¹² Kraes nu lai hogoi kera gea be men lol vatuvwai ira sinombu sabuga non God huri rovogan lalaḡova, be men lol vamuramurai rebehin Kraes.

¹³ Mwa du be rovoga geki vi van rahurahu vaivotu be gida duluai tai bulu haragaituvwa lol binihimwasigi garagusi iloute alun nitun God. Mwa du be gida tav mai kun gabe atatu be nu metue, tav mauri havava tai mai kun Kraes i tav lai non vavtutu.

¹⁴ I sihav n̄ava tehe gida tas hav mom bora te kun naturigi mulei. Tasav vora te kun waḡa be mwa halahala dadaligi navo mwa bohainia ban mwa mai. Sihav avte lumlum gida gin silo vagahi gara duluai gam ron̄oe non sinombu be ram lol ron̄oe be ramen saruruhi kamai. Ram dari halana i ram lol ron̄ hal saruruhi be men ruruhi sinombu vai alolon halan salana.

¹⁵ Sigai! Avoi mwasigi gin lolotabetabe, kamai gav mauri hae la halan Kraes duluai ihei haḡea bwatuna.

¹⁶ Rebehi duluai mwa du alun Kraes, i ira mavuvun rebehi duluai ram dari i ram bulbulu n̄an utegaituvwa. Vataha mavuvu duluai mwa lalaḡoi mwasin non rovoga be men lol rebehi duluai be vi mauri wasi mai lolotabetabe.”

Hala be mwa du be gov Rahu Aluna

¹⁷ Nam bevea lalainigo geki be la ihan Ratahigi, rahumiu sihav togo rahurahu kun ira len̄len̄aga be nora binbinihi nu hav dadariha tehe.

¹⁸ Ram hav ilo te batoia, i ram hav ilo te havanau, bwatuna be ram hav doron tehe didi roron̄tai, i kera rasav lai te dum rahuana be God nu laia.

¹⁹ Nora busbusiana duluai nu vano ninira, i ram lalaḡoi rahura be ramen lol ginau hahantai. Ram doron maragai be ramen tu ba lalaḡoi rahurahui ginau hahantai.

²⁰ Take havanau be gin huhuinia nin Kraes, nu hav vora te kun geki.

²¹ Nam iloe be gin ron̄oe huria, i kimiu haḡea alolona, i kimiu gin lai silo vagahi huri mwasigi be mwa dogo alolon Jisas.

²² Nu vagahi kimiu be giv lin̄ rahuan bibili be gin togo aluna tuai. Nomiu doroniva sibomiu huri rahuan ata tuai gea mwa hantai liu, bwatuna be sinombu ram daltale gin ginau hahantai be ran doron be rav lolia.

²³ Take kimiu nu vagahi kimiu be giv lol garai kimiu lol sibwen̄imiu,

²⁴ be giv mai gi atatu gara. Atatu gara gea nu loliana be vi vora kun God nu loliana be vi tavuha mwasigi i vi sabuga.

²⁵ Haḡe mwa du be giv lin̄i be gim dentene. Giv vev mwasigi lalai vatvataha kimiu, bwatuna be gida duluai ira ududun vatvataha gida lol rebehi gaituvwa.

²⁶ Mahavana be gim lolhoro, gisav lin̄ te nomiu lolhoro be vi lai kimiu vai lol vuro, i giv gitae be gisav mom lolhoro tehe vuvuri ute gim siv bon̄i.

²⁷ Gosav havan̄ te gatava lalai atmate be vi muramura ḡorogo.

²⁸ Kera gabe ram susura rav lin̄i be ram susura i rav tau bwatuna ba lol rovoga. Mwa du be kera rav haḡo rahuan tavuha hurira sibora i kera rav lai dum ginau abena be rav hogoinia lalainira be ram hiruga.

²⁹ Mahavana be gon avo gosav vev te ira avoana be rav lol ḡagaras atatu, take goi vev havanau gabe mwa du be sinombu vi lai avoana gabe rav bului atat dodolua rav muramuraga ginia. I aia havanau be gom bevea vi lol dum lalaḡova tavuha lalainira be ram roron̄tainigo.

³⁰ I gosav lol te Vui Sabuga be vi ron̄ mwahantai. Vui kea mwasigi non God be kea bilana God nu lai Vui lalainigo be men seserainia be God vi loligo gov maribwesi mahavana be nogonan gubwen̄ vi mai.

³¹ Gosav hantai tehe sa lololhoroga n̄an haḡea, sage gosav vev te ginau be vi lol ḡagaras atat dodolua. Gosav lol te bwatigoro hahantai.

³² Gov tavuha i gov mwemwearu mai atatu dodolua, goi binihi kaburai vuron atat dodolua kunia gabe God nu binihi kaburai vuromwa sivi Kraes.