Ifisas 2 - Hano Niu Testamen

Gida kadogaha tam lai Rahuana

¹ Tuai huba kimiu gin mate lol Vui bwatuna be vuromiu i ginau be gin lolia vai alun God.

² Uwe, tuai gin togo la rahuana be ureure nu togo aluna, gin huri tomuai non ira Vui hantai gabe ran togo la ulun ureure. Vui n̄an haḡe gea be mwa lol rovoga alolon irahei gabe ram barihai be rav tabe God.

³ Lol taro tuai gida tan togo kunira, tan lol ron̄oe be tamen samwarai nonda doroniva siboda i be tamen lol ginau duluai be rebehida i binihinda mwa doronia. Tas ron̄ ḡagarasi gin lolhoro non God bwatuna alen̄a be tam dogo aluna. Gida tan ḡun sinombu dodolua n̄an mulei.

⁴ Take sine hagavi non God nu liu, i kea mwa dabe maragai gida.

⁵ Mwasigi be gida tan mate lol vui, bwatuna be ginau hantai be tan lolia vai alun God, take kea mwa lai rahuan gara lalai gida mai Kraes. Kimiu gim rahu mai hogoi non God.

⁶ I kea mwa lol domarei gida mai Kraes i mwa lai togotogo lalai gida bul maia lol ute ata amare. Mwa lolia geki hurira lol Kraes Jisas,

⁷ bwatuna huri taro vai non̄oiha duluai kea vi seserai mwasin hogoi be gaivua liu lol non lolotabetabe ginia be kea nu tavuha mai gida lol Kraes Jisas.

⁸ Nam bevea gin binihiva be kimiu gin rahu gin hogoi non God sivi binihimwasigi garagusi. Gin hav varahu te kimiu sibomiu; take kea hogoi non God.

⁹ Kea mwa hav vora te vwain nomiu lalaḡova sibomiu, i kea gisav vwavwa te lalavoa huria.

¹⁰ God nu loli gida be tav togo haḡea kun geki. Lol Kraes Jisas, God nu lol gida be tav lol rovoga tavuha, gabe God mwa lol daua lol non hogoi huri gida be rahuda vi togo mai nonda lalaḡova.

Gaituvwa lol Kraes

¹¹ Gisav vinihi te malioi be kimiu ira Lolobon̄i. Taro vwate ran uloi kimiu be ira “tavdovon̄ana sigai” na kera be ran sasagerega be ran tav dovon̄ara.

¹² I kimiu gin togo n̄an vuroi kunia Kraes sigai. Kimiu gin hav vora te udun dameana mai tatauleo be God nu lolia lalai non sinombu. Nomiu doronhohov sigai, i gin hav ilo te God.

¹³ Take kadogaha lol Kraes Jisas, kimiu be gin togo hautu maragai nin God amua kadogaha mwa lai kimiu sosori sivi dagan Kraes lol mateanana.

¹⁴ Kraes sibona kea nonda tamwata. Kea mwa lol saraḡo sinombu ata Jius mai kera be ram hav vora te sinombu ata Jius ram bora sinombu gaituvwa. Kera ram harabora kun gabe ute bwatu mwa bwat ḡorora, take Kraes mwa salan̄ai kaburai ute bwatun varihaiana gea ginia be mwa lin̄ mwasin rebehina sibona.

¹⁵ Silo non ira Jius mwa haḡo avoan wasi ivusi mai leo horai, take Kraes mwa lol nogonogoi kaburai silo gea. Bwatuna lalainia huri hano kea mwa lol tatan̄ana gairua ramuru bora sinombu gara gaituvwa alolona i la hala geki mwa lol tamwata.

¹⁶ Ita mulei bwatuna Kraes be men lol kaburai silo harabora lol davolan tatan̄ana gairua, be men lolira ramuru bora rebehi gaituvwa, i be men lai muleinira lalai God. Kraes mwa lol ginau duluai geki gin mateanana la volovolo.

¹⁷ Kraes nu mai mwa doretore alun tamwata lalai kimiu gabe gim dogo hautu maragai nin God, i lalainira be ram dogo sosori God.

¹⁸ Uwe, sivi Kraes n̄ano be nonda mwasigi abena be tai mai vai aben Tata lol Vui gaituvwa.

¹⁹ Kadogaha kimiu ira Lolobon̄i gim hav mom bora te ira atat mai sage ira tausala mulei, take kimiu mwasin atatun vanua gaituvwa bul mai sinombu sabuga non God. Kimiu gim bora vara alun God.

²⁰ Kimiu gim bora imwa haḡohaḡo be mwa haḡoana alun vatun siguna non ira hala mai ira atatun vevsera. Kraes Jisas sibona kea mwasin raumatan vatu alun haḡohaḡo imwa gea,

²¹ i haḡohaḡo imwa gea mwa bulu ute gaituvwa lol Kraes. Kea mwa lolira ram mauri i ram bora imwa tataro sabuga lol Ratahigi.

²² I lol Kraes mulei, kimiu mulei mwa haḡohaḡo kimiu hara gaituvwa mai kera dodolua lol ute gabe God mwa dogo sivi Vui.