Ifisas 1 - Hano Niu Testamen

¹ Nin Pol hala non Jisas Kraes. Inau hurihuri bwatuna be kea haḡea havanau gabe God nu doronia. Lalai ira sinombu sabuga non Kraes be ram dogo Ivisas, ram binihi alun Kraes Jisas.

² Hogoi i tamwata lalai kimiu nin God Tamanda i nonda Ratahigi Jisas Kraes.

Vatavuha Sabuga nin Kraes

³ Uloi roron God i Taman nonda Ratahigi Jisas Kraes. Lol Kraes, God nu lai lalai gida ira vatavuha lol vui lol ureure ata amare.

⁴ Kea gin binihiva be, lol Kraes, kea nu gita lua gida amua mwa siv tau ureure huria be gida tai vora non sinombu i sinombu be sihav vitultuli te gida lolmatana.

⁵ Bwatuna be gin non lolotabetabe, God nu vinihi daua huba be vi lol gida ira mwasin nituna gin Jisas Kraes. Kea havanau gabe nu doronia i havanau gabe nu samsamwara ginia,

⁶ i mwa lai roroai lalai God bwatuna be gin non hogoi. God nu lai hogoi gea lalai gida vuroi nan kunia, alolon Kraes, atatu gabe mwa doronia.

⁷ Kraes gida tam maribwesi gin dagan mateanana, i bwatuna gea gida tam lai tugu kaburai vuroda. Hogoi non God nu rosoga maragai,

⁸ gabe nu laia lalai gida liu n̄an vuroi kunia. God, non mataisao duluai be nu masiri i nav iloilo,

⁹ tav ilo bwatuna be mwa lol taritari dahuligi. Geki havanau be God nu doronia, i nu tari halana be vi lolia sivi Kraes.

¹⁰ Nona be vi lol haraharai non taritari duluai, i batena be mwasin tarona mwa mai, be ginau duluai lol mahao i lol ureure rai bulu duluai utegaituvwa lol Kraes kun be bwatu gaituvwa,

¹¹ Lol Kraes mwa gita lua gida be tai vora sinombu non God, bwatuna be la bwativuna radui, God nu tari halana geki gin non taritari. I kea haḡea atatu gaituvwa be nu lol ginau duluai mwa dame alun ginau be kea nu vinihia i nu doronia.

¹² Gida haḡea muan sinombu be tan tau nonda doronhohov alun Kraes, i nu gita lua gida be tav lai roroai lalai God sabuga.

¹³ Haḡe kea mai kimiu mahavana be gin ron̄ mwasin silo vagahi huri Roroi Tavuha be vi lai varahuva lalai kimiu, kimiu gim binihimwasigi alun Kraes. I lol Kraes, God mwa dau mwasin non dovon̄a alun gogonaiana alumiu, ginia be mwa lai non Vui Sabuga gabe nu tatauleo huria.

¹⁴ Be Vui Sabuga kea mwa seserainia be tam lai havanau be God mwa lai ribwesiva be nu haraharai lalainira be bilana be men lai roroai lalai sarisarin God.

Tataro non Pol

¹⁵ Bwatuna haḡea nu tau bwatuna be nam ron̄oe huri nomiu binihimwasigi garagusi lol Ratahigi Jisas i nomiu lolotabetabe huri sinombu non God,

¹⁶ inau nam hav mambu tehe be namen avkari God huri kimiu. Nam binihi dum kimiu vataha mahavana lol noḡu tataro

¹⁷ nam hudali God non nonda Ratahigi Jisas Kraes, Tata be nu roroa liu be vi lai vuin mataisao i visirai lalai kimiu huri be giv ilo tavuhainia.

¹⁸ Mulei nam dataro be giv lai iloilo gaivua lol sibwenimiu huri be giv ilo binihiva huri doronhohov gabe kea nu uloi gida, i be giv iloe huria be kun hanigi nu rosoga i vatavuha non God gaivua be nu tatauleo lalai non sinombu sabuga.

¹⁹ I kimiu giv iloe be muramura non God gaivua maragai huri gida be tam binihimwasigi, Muramura gea kunia n̄an gabe butuana gaivua.

²⁰ God nu lolia be men taua la mwatuana lol ureure.

²¹ God nu tau Kraes liu ira tomuai i ira lalavoa, mai ira muramura, i ira ratahigi lavoa, nu hav vora te lol ureure geki n̄an take lol ureure vwate mulei.

²² God nu tau ginau duluai aten non muramura i nu lolia gi tomuai ḡoro ginau duluai huri uloilua,

²³ kea gabe rebehin Kraes. Uloilua nu masiri latlate gin Kraes, i Kraes nu hogon bamasiri ginau duluai la hala duluai.