Hibru 8 - Hano Niu Testamen

Jisas kea nonda Muai Tataroi

¹ Geki haḡea kun be muana huri bwativun nomai avoana duluai. Nonda muai tataroi gaituvwa, be nu vavtutu kun gabe kamai gam bevea. Kea mwa dogo lol ute atamare huba, i mwa dogo la mwatuan God gabe muramura duluai nona.

² Kea mwa dogo mwa lol rovoga non muai tataroi lol Ute Sabuga Liu lol mwasin imwa haohao huri tataroi, be God sibona n̄an nu haḡoe lol ute atamare.

³ Haḡe ira muai tataroi dodolua mulei kera gea, God mwa darira be rav tau ira hogoi lalainia i rav wehi ira ginau rahu ba lol tataroi tuntun be vi lai dagai vuron ira atatu. I la hala n̄an mulei kunia, nonda muai tataroi gea mulei mwa du be vi hagai ginau lalai God.

⁴ Be kea si togo radu teti lol ureure, kea sihav lai te iha be tataroi, huria be ira tataroi ran tu huba be rav lai tataroi gi tabeana lalai God, kunia gabe silo non Moses mwa bevea.

⁵ Rovoga gabe ira tataroi ran lolia, kun gabe nunun ginau gabe ram loli lol ute amare. Geki mwasigi huri be tuai God nu vevea lalai Moses be vi haḡo Imwa Haohao gea gi tanon tataroi nu vevea be “Gov gita ḡoro tavuhainia be gomen lol ginau duluai kera geki, hurin halana duluai be nan vev seserainia lalainigo, amare la vusi.”

⁶ I take tam ḡitae be rovoga gea be ira tataroi tuai ran togo ram lolia. I la hala n̄an mulei kunia, tatauleo non God be Jisas nu lai bisirainia lalai atatu, kea mulei nu tavuha maragai liu tatauleo gea ata tuai, huri be avoanan ginau rav tavuha liu, be vi lol wasinia vi tu.

⁷ Be si vora kunia be muan tatauleo sigai aluna, kunia mwa hav mom du tehe be vi mom bora tatauleo vwate mulei.

⁸ Take God mwa habwe vahalana ivusi alolon non sinombu, kunia gabe buka Baebol mwa bevea be, God mwa bevea be, “Gubwen̄i mwa du mwa mai, inau nav tatauleo gara lalainira ata Israel i lalainira Juda.

⁹ Tatauleo geki dolua ninia be nan lolia maira sibira amua lol taro be nan haḡo limara i nan lai luara nin Ijip. Kera ram hav haḡo te wasi tatauleo be nan lolia maira i ran hav roron̄tai tehe hurira.”

¹⁰ Geki haḡea tatauleo gara be nav lolia maira. Nav tau noḡu silo lol binihira i rav ravae lol irubwira. Nai vora nora God i kera rai vora noḡu sinombu.

¹¹ Atatu vwate sigai be vi vagahi te tuana sage ata la vanuara, “Giv iloe huri God.” Bwatuna be kera ram iloau huba, be nu tau bwatuna la naturirigi mwa botui la lalavoa.

¹² Nam binihi kaburai vurora i nam hav vinihi te dum nora vahalana.

¹³ Batena be God nu avoi tatauleo gara, kea nu lol muan tatauleo mwa maleiga i ginau be ram maleiga sihav n̄ava tehe rav nogonogo.