Hibru 6 - Hano Niu Testamen

¹ Huri ginau geki si tavuha maragai be tas van bavtutu la avoana be mwa lol gida tam mituaga huba lol nonda binihimwasigi garagusi. Tasav mom lol te mulei bwatbwatun imwa. Gim ilo ginau kera geki huba. Mwa hav tu tehe be gisav mom lol te mulei alen̄a gea be tamen avoinia be gida tav leahi rahuda nin alen̄a ata tuai be nu salai gida nin God.

² Mwa hav tu tehe be tav avoi avoanan garuhisabuga mai vatavuhai bwatu. Kimiu gim iloe tomarean mulei i silo vevegi vai tuai lol gubwen̄i be vi mai.

³ Huri ginau kera geki kun be bwatbwatun imwa n̄ano, take tai van rahurahu. Be God vi mahin̄ainia lalai gida, tav lolia kunia.

⁴ Kera gabe ran tabagilu huba, halara sigai, bwatuna be kera gea ran mai lua alolon gigita non God. Ran lai tabeana gea huba gabe nu himai nin ute atamare, i Vui Sabuga nu himai huba aluna mai atatu dololua mulei.

⁵ Kera ran habwea huba be avoana non God nu tavuha maragai, i ran ron̄oe huba huri muramuran ureure gara gea be vi visirae n̄an darihou.

⁶ Take ataguna ran lai tagunai nora binihimwasigi garagusi i ram bano mulei. I kadogaha hala vwate mulei sigai be vi mom lai dabagilui muleinira rai mai bilin̄ai nin vurora. Bwatuna be ran lol hala gea kun be ram boha Nitun God vai la volovolo mulei, ram lol busbusinia lolmatan sinombu.

⁷ Be si vora tavihen tano vwate be si uhe tavuhai aluna, kunia ririvuana si mauri tavuhai i ginaganiana si lulu aluna, i kea si bului tavuhai lalainira gabe nora tano gea. Kea kun gabe God mwa batavuhai tavihen tano gea.

⁸ Take be tavihen tano gea si eno kun be gao ḡauli laso mai bwatmwanea hantai ras mauri alolona kunia tavihen tano gea kun be nu hav mom davuha te n̄an haḡea. Nu abena kun be tas vev dumwia be avoana hantai non God mwa dogo lol tavihen tano gea, i nogonana God vi tumus kaburai non vataha ginau kera gea lol gabi.

⁹ Ira noḡu buluana bisata kamai gam avo lalai kimiu kunia take, bisata nomai binihiva mwa hav hovi tehe huri kimiu n̄an haḡea. Kamai gam iloe be gim lai dum hala gea be God mwa lalaḡo aluna be vi lai varahuva lalai kimiu.

¹⁰ Huri alen̄an God vataha mahavana nu tavuha n̄ano. I kea sihav vinihi te dum malioi rovoga duluai gea be gin lolia. I kea vi vinihi dumwia be kimiu gim dabea lol nomiu doroniva liu, i be gin bului raduinira atatun uloilua dodolua, i gin bului raduinira.

¹¹ I kamai gam doron maragai be nomiu binihiva vi tu wasigi tagaro, i giv lai dum ginau gea be nomiu doronhohov mwa du wasigi aluna.

¹² I gan hav doron tehe be giv bwatiḡoruga. Take kamai gam doron be giv huri alen̄ara gea be ram binihimwasigi wasigi i nora binihiva n̄an̄ava, i rav lai dum havanau be God nu tatauleo be vi laia lalainira.

Tatauleo non God sihav Hovi te Dumwi

¹³ Mahavana be God nu tatauleo lalai Ebraham tuai, i bwatuna atatu vwate mulei sigai be amare liu ninia, kea mwa avoi ginau duluai gi ihana n̄an sibona huri be vi lol wasi ihana.

¹⁴ Kea nu tatauleo lalai Ebraham mwa bevea be “I nav lolia vi tavuha liu lalainigo i nav lol sinombu vi lulu la varamwa.”

¹⁵ Kunia Ebraham mwa lol non binihiva mwa n̄ava, i la hala gea, kea mwa lai dum ginau be God nu tatauleo huria.

¹⁶ La alen̄anda atatu, mahavana be atatu mwa doron be vi lol non avoana vi wasi, vi avo la ihan atatu vwate be amare liua. I mahavana be atatu mwa lol non avoana mwa wasi kunia, avoana mulei sigai atagu.

¹⁷ God nu lol non tatauleo huba, i mwa doron be vi lolira kera gea be rav lai dum ginau be nu tatauleo huria, i ram iloe be non binihiva sihav leahi te dumwi. Haḡe bwatuna haḡe gea mwa avo alun ihana sibona, be men lol non tatauleo sibona gim wasi mulei. I kadogaha avoana non God gairua, i avoana gea non tatauleo, mai avoana gea be men lol non avoana gim wasi.

¹⁸ Avoana gairua kera gea, raru sihav leahi te dumwi, i alun avoana gairua gea God sihav tententene tehe dumwi. Gida gabe tam habwe ute tavuha huba, avoana gairua gea ramuru lol nonda binihiva mwa wasi liu, i tav haḡo wasi alen̄a gea be God nu laia huba lalai gida, gabe tam dau nonda doronhohov be mwa du wasigi alun non tatauleo.

¹⁹ Alen̄a gea be tam dau nonda doronhohov mwa du wasigi huria be tav lai dum ginau gea, kun gabe marahin waḡa be vi haḡo rahuda. Doronhohov vwate be nu saga mwasigi, be sihav rihu te dumwi. Doronhohov mwa ban sivi gavu gabe mwa du huba lol ute gogona non God.

²⁰ Jisas nu haroro huba aia la ihada, huria be men havan̄ matan halada. Kea nu mai gi Muai Tataroi huba vai tuai, kun muai tataroi gea Melkisidek tuai.