Hibru 5 - Hano Niu Testamen

¹ Haḡe ira muai Tataroi duluai, sinombu ran gita luae i ram daria be vi lalaḡo lalai God hurira duluai, huri be men hagai udun bilara lalai God gin tataroi huri vurora.

² Nonda Muai Tataroi kea nu mandamanda. Bwatuna gea, kea nu maron̄ron̄o lalainira be ram bahala.

³ Haḡe bwatuna be kea sibona mandamanda, i batena be kea vi hagai Tataroi hurira, take huri vurona mulei.

⁴ Atatu vwate mwa hav gita te lua muleinia sibona be kea vi vora Muai Tataroi. Take kea uloana non God be mwa uloi lua atatu vwate be men vara muai tataroi, kunia be Aron nu vora muai tataroi.

⁵ Haḡe la hala n̄an haḡea mulei kunia, be Kraes nu hav lai te tanoi roroa gea vai aluna be men vora muai tataroi. Take God nu vevea lalainia be, “Giḡo Nituku. Garigi inau nam bora Tamamwa.”

⁶ Haḡe mwa bevea lol ute vwate mulei be, “Giḡo goi vora tataroi vai tuai, kun tataroi gea Melkisidek.”

⁷ Lol taro be Jisas nu rahu teti lol ureure, lol mahavan non tataro mwa hudaligi gin deiana gaivua i mataruana mwa duturu lalai God. Huria be God nu muramura be vi varahua atagun mateanana. Haḡe bwatuna be alen̄ana nu vavtutu i nu maḡemu bwatuna gea God mwa ron̄oe.

⁸ Take gaituvwa n̄ano be kea Nitun God, take nu huhuinia sivi non ron̄ ḡagarasi be vi lin̄ maḡemu.

⁹ Mahavana be kea mwa bavtutu, i mwa bora gi bwatun varahuva be mosmosianana nu sigai huri kera be ram dabea.

¹⁰ God mwa huri ihana be kea Muai Tataroi kun Muai Tataroi gea tuai Melkisidek.

Giv Mauri Haehae

¹¹ Ginau ivusi radu be vi melmelo lalai kimiu huri be nomiu binihiva mwa ravrava maragai be giv lai tuhia.

¹² Tarona radu abena be kimiu giv vora vagahi, take gim doron vagahi be atatu vi vagahi kimiu gin muan silo vagahi huri roroi non God. Kunia be tarona be gisav gan te ginau wasi radu, take mwa du be giv huhu radu.

¹³ Ihei tehe gabe mwa huhu radu kea naturigi radu, dagai nin binihivanan vavtutu i lete.

¹⁴ Hala vwate huri ginaganianan wasi gea huri atat lalavoa n̄ano, be ran lalaḡo huba tuai i ram ilo hala huri vavtutu i lete.