Hibru 4 - Hano Niu Testamen

Ira Atatun God rav Mambuharai

¹ God nu taua huba lalai gida be tav lai dum mambuana gea be nu tatauleo huba huria lalai gida. Gida atatun God tav gitae be vwate aloloda sihav vahal te tarona be vi haroro lol mambuana non God.

² Bwatuna be gida tam ron̄ avoana huri Roroi Tavuha kunira. Kera ran ron̄ roroi, take ran hav leahi tehe la hala be nu vavtutu, huri be mahavana be ran ron̄oe, ran hav dara tehe aluna la nora binihimwasigi garagusi.

³ Gida gabe tam binihimwasigi, gida haḡea tav lai dum mambuana be God nu tatauleo huria. Kunia gabe kea nu vevea be, Inau nan lolhoro i nan lol noḡu tatauleo ḡaragara be: “Atatu kera gea rasav haroro te dum huri mabuana bul maia gubwen̄ vwate! ‘God nu vevea kungeki lol mahavan taro be nu harai rovogan ureure.’ ”

⁴ Huria be avoana vwate alolon buka Baebol gabe mwa bevea be, “La gaibitun gubwen̄i God mwa mabuharania huri rovoga gea be nu harainia.”

⁵ Avoana geki mwa bev mulei avoanan mambuana n̄an haḡe gea be mwa bevea be, “Kera gea rasav mom haroro te dumwi mulei be rav mambu dum maiau.”

⁶ Kera gabe rav ron̄oe huri Roroi Tavuha muana, ran hav lai te dum mambuana bwatuna be ran hav vinihi te mwasigi. Take atatu rituai mulei abena be ram lai dum mambuana mai God.

⁷ Haḡe bwatuna haḡe gea, God mwa dov mahavan taro dolua vwate gubwen̄ dolua, i taro haḡe gea gubwen̄i be gida tam dogo alolona garigi. Taulu ivusi nu nogo huba God mwa bevea lalai Deved, la buka Baebol be nan vevea huba, gabe mwa bevea be, “Garigi, be kimiu giv ron̄ avoana non God, gisav mom lol te bwatwasi.”

⁸ Tam iloe be Josua nu hav tomuai te atatu vai lol mambuana huribe God mwa avo mulei huri gubwen̄ dolua.

⁹ Take mwa hav vora te kunia. Haḡe bwatuna gea, tarona radu huri sinombu non God be rav haroro huri mambuana la hala n̄an gea be God nu lolia amua, gabe nu mambu harainia la gubwen̄ gaibituna.

¹⁰ Bwatuna be ira hei tehe be rav haroro huri mabuana aben God, rav mambu harainira dum nin nora rovoga, la hala n̄an haḡe gea be God nu mambuharainia gin non rovoga la bwativuna.

¹¹ Haḡe bwatuna gea gida tav lol ron̄oe be tav haroro dum huri mambuana aben God. I sihav tavuha te maragai be vwate nin gida vi lolia kunira tuai be ran hav tabe te silon God, i rasav haroro te dumwi.

Avoana non God nu Muramura

¹² Avoana non God ginau rahu, i mwa lol rovoga, kun gabe bua mamagani, take liu nin buan bwaloana gabe mata daldali. I vi van sivigi dum lol ute be binihin atatu mai rahuna mwa bulu aia, kun gabe buan bwaloana mwa ban sivigi lol ute bulbulun hui alolon wain hui. Avoana non God vi lol bavtutui dum ginau n̄oto lol binihin atatu i ginau be atatu mwa doronia.

¹³ Ginau vwate mulei sigai be vi hili nin God, dagai nin tanon limana duluai. Havanau tehe mwa ḡigilaga n̄an duluai, la lolmatan God. I gida duluai tav seserai lua rahuda i nonda lalaḡova duluai la lolmatana.

Jisas kea nonda Muai Tataroi

¹⁴ Gida tav haḡo wasi nonda binihimwasigi garagusi gabe tan vev luae huba. Huribe nonda muan Muai Tataroi gabe mwa hae i mwa du la lolmatan God sibona, kea Jisas nitun God.

¹⁵ Nonda Muai Tataroi, nu hav vora te kun ira muai tataroi dodolua be mahavana be gida nonda muramura sigai, i gida tam hovi lol bwatigoro, take rasav hagav te dum gida. Take nonda Muai Tataroi gea mwa hagav maragai gida, huria be ginau kera gea be ram ḡal gida atagu take rav ḡalia muana. Kea haḡea dolua i vurona sigai.

¹⁶ Bwatuna gea tav tau nonda binihimwasigi aluna, i tav mai la lolmatan God bwatun non hogoi vataha mahavana. Aia tav lai sine hagavi i tav habwe hogoi be vi bului gida lol taro ririhai.