Hibru 13 - Hano Niu Testamen

Mwasin Alen̄an atat Binihi Mwasigi

¹ Giv tabetabe kimiu kunira huhu gaituvwa.

² Giv vinihi dum silo lai laiḡoḡo tausala la vanuamiu. I atatu rituai ram laiḡoḡo ira enjel vai la vanuara take ram hav iloe tehe.

³ Giv vinihi dumwira gabe ram dogo lol imwa vauvauhi, kun gabe kimiu lol imwa vauvauhi bul maira. I mulei giv vinihi dumwira gabe ram ron̄ ḡagarasi kun gabe, kimiu mulei gim ron̄ ḡagarasi bul maira.

⁴ I atatu duluai rai vinihi marahi silon lagiana, ira ahoai mai ira tasalai, giv togo bavtutu hurin silon lagiana gingin kimiu. God vi vevegi ihei tehe gabe ramuru sura be lagiana sigai, i ahoai mai tasalai be vwate mwa sura mai atatu dolua.

⁵ Giv tu dagai nin doronivanan homu, i giv samsamwara mai doronivanan havanau kolo be gin togo huba maia. Bwatuna be God mwa bevea be, “Nasav lin̄ te derainigo be gov togo gahemwa. I nasav vis te dagai ninigo.”

⁶ Tav tu wasigi, i tav vevea be, “Ratahigi noḡu radaiḡoro, i nasav matagu tehe. Havanau tehe gabe atatu rav lolia lalaiau?”

⁷ Giv vinihi dum nomiu ira tomuai, gabe ran vev avoana non God lalai kimiu. Giv binbinihi mulei alun rahura be ran togo ram lalaḡo i halan mateanara kun hanigi. I giv huri malelera la halan nora binihimwasigi garagusi.

⁸ Jisas Kraes mwa hav leahi te dumwi, alen̄ana kunia n̄an haḡea be tuai mwa botu ninovi, i garigi, i vaigogo mwa bano vai tuai.

⁹ Gisav huri te lalan̄an silo vagahi dodolua be mwa eno dagai nin hal vavtutu. Tav lai silo vagahi alun hogoi non God gabe mwa dabe gida, huria be vi lol wasi gida, take nu hav tavuha tehe be tav togo ba ḡita silo huri ginaganiana be vi lol gida tav wasi huria be ira hei gea be ram huri silo huri gina ganiana mwa hav buluira te n̄an haḡea.

¹⁰ I ira tataroi ata Israel be ram lol nora rovoga alolon tanon nora tataroi, kera rasav lai te dum gara ginau alun olta gea.

¹¹ Lol taro be muai tataroi gea mwa wehi ginau rahu gea huba, mwa lai dagana i mwa hae lol Ute Sabuga Liu mwa lol non tataroi tuntun aluna be men lai dagai vuro; take ira rebehin ginau rahu keragea ran tunura avare nin vanua.

¹² Jisas mulei mwa mate avare dagai nin bwatutun vanua. Bwatun ginau geki dagana mwa lol melmeloi atatu nin vurora.

¹³ Kunia mulei gida tav hiv avare dagai nin bwatutun vanua i tav bete la non busbusiana.

¹⁴ Lol ureure geki bwatutun vanua lavoa vwate sigai be vi tu dum vai tuai, take gida tav atei vanua vwate be vi mai radu.

¹⁵ Tataroi tuntun gea nu vavtutu huribe mwa mwalue nin atatu be ram uloi God be nora Ratahigi.

¹⁶ Gisav vinihi te malioi be giv lol ginau tavtavuha i giv bulubului kimiu huribe ginau kerageki mwasin raumatan ginau be God mwa samsamwara ginia.

¹⁷ Giv ron̄ silon nomiu tomuai, i giv huri nora avoana. Ram gitaḡoro tavuhai kimiu be ram hav mambu tehe. I rav vev ginau n̄oton̄oto lalai God huri havanau be ram lolia. Be giv ron̄ silora kera rav ron̄ mwandavuha lol nora rovoga. Be gosav ron̄ora tehe kera rav ron̄ mwahantai. Ginau gea barabe vi bului dum kimiu.

¹⁸ Giv tataro huri kamai. I lol nomai binihiva gam samsamwara, i gam lol ron̄oe be nomai lalaḡova vi vavtutu vataha mahavana.

¹⁹ I nam doron maragai be kimiu giv tataro be nav siro dum kimiu mulei vilvilehi.

Nogonan Tataro

²⁰ God mwa lol domarei Ratahigi Jisas Kraes atagun mateana. I kadogaha Jisas kea kun Lavoa huri Radaiḡoro Sipsip be Dagana mwa lalaḡoiana be men lol datauleon rahuana vai tuai non God mai bilan sipsip.

²¹ Nam dataro huri be God huri tamwata vi lol kimiu giv lol vatuvwai be giv ron̄oe, i be giv lalaḡo bavtutu vataha mahavana. Nam dataro be Jisas vi bului kimiu be nomiu lalaḡova vi vavtutu lalai God. Lalai Jisas Kraes roroai vai tuai vai tuai! Amen.

Nogonan Avoana

²² Ira noḡu buluana, nam rava letasi vwelvwele geki be namen avdura kimiu, i nam hudali kimiu be giv roron̄tai tavuhai huri havanau be nan vevea lalai kimiu.

²³ Kadogaha giv ilo didininia be nonda buluana Timoti nu mwalue huba nin imwa vauvauhi. I be kea vi votu teti vilvilehi. Nav laia maiau mahavana be nai mai be namen varahi ron̄ kimiu.

²⁴ Nam navohi kimiu be giv lai noḡu avoan helheloi lalai nomiu ira tomuai mai ira sinombu non God duluai. Ira non atatun rovoga Itali mulei, ran lai nora avoan helheloi lalai kimiu.

²⁵ Inau nam dataro be hogoi non God vi togo mai kimiu duluai.