Hibru 11 - Hano Niu Testamen

Binihimwasigi Garagusi

¹ Binihimwasigi garagusi kea havanau be tam doronhohov huria, tam iloe be nu mwasigi len̄len̄a be tam hav gitae tehe.

² Binihimwasigi garagusi, kea haḡea hano be tam binihi dumwia lol taron ira sibida amua.

³ Alen̄a la halan binihimwasigi garagusi haḡe gea mwa lolia tam ḡita batoia be mwasigi, avoana non God n̄ano gabe mwa dau ginau duluai ginia, i mwa lai bisirai ureure gabe tam dogo aluna. Non muramura haḡea mwa lai dum ginau gabe atatu si gita te dumwia, nu tau ginau duluai be tam do tam ḡitae.

⁴ Ebol mwa dogo mwa binihimwasigi garagusi alun God, i bwatuna a haḡe gea non tabeana vwate be mwa laia lalai God nu tavuha maragai nin non tuana Ken. Haḡe bwatuna gabe Ebol mwa binihimwasigi garagusi alun God, bwatuna haḡe gea God mwa uloi tavuhai ihana be kea atat vavtutu vwate, i mwa samsamwara be vi lai non hogoi. Wani gea Ebol nu mate huba, take huria alen̄an non binihimwasigi garagusi, kea mwa dogo mwa avo lalai gida radu.

⁵ I bwatuna gabe Enok nu togo mwa binhimwasigi garagusi alun God, bwatuna haḡe gea kea nu hav mate tehe, God nu lai luae nin ureure i mwa hae lol ute ata amare. Atatu ran hav lai te luae huri be God nu lai dagainia huba. Take mahavana be God nu hav lai te dagainia radu, kea mwa uloi tavuhai ihana, gabe mwa lol God mwa ron̄ mwa davuha ginia.

⁶ Take be atatu sihav binihimwasigi garagusi tehe alun God, sihav lol te dum God be vi samsamwara ginia. Huri be atatu vwate si doron be si mai huri God, kea vi binihimwasigi garagusi be God mwa dogo, i God mwa lolira gabe ram lol ron̄oe be rav habwea ram samsamwara.

⁷ Haḡe bwatuna gabe Noa nu binihimwasigi garagusi alun God, bwatuna haḡea kea mwa ron̄ avoana non God, mahavana gabe God nu vev lua ginau duluai gea lalainia amua raduai mahavana be atatu vwate nu hav gitae te radui. Haḡe bwatuna gea kea mwa dabe silon God, i mwa boha waḡa gaivua gea huri be vi varahu ira varana aluna. I la hala gea kun be God mwa bevegi sinombu, i mwa lol Noa mwa bora atat vavtutu lolmatana bwatuna be mwa binihimwasigi garagusi aluna.

⁸ Bwatuna gabe Ebraham mwa binihimwasigi garagusi alun God, bwatuna haḡe gea kea mwa dabe silon God, lol taro gea be God nu uloinia be vi vano lol ute dolua vwate. Ute gea God nu tatauleo huba lalainia be vi laia lalainia. I Ebraham mwa mwalue nin vanuana, take mwa hav iloe tehe be vanua gara gea mwa dogo halabehe, be kea mwa bano huria.

⁹ Bwatuna gabe kea mwa binihimwasigi garagusi alun God, take kea kun gabe tau sala n̄ano la vanua be God nu tatauleo huria. Kera bul mai Aisak i Jekob gabe God nu lai tatauleo n̄an haḡea kunia lalainira, i kera ram do lol imwa haohao n̄an vuroi, take imwa vuroi sigai.

¹⁰ Ebraham mwa dogo kunia bwatuna be mwa do mwa hohovi be vi vano vai la bwatutun vanua be God mwa lol vatuvwai halana, i mwa haḡo domareinia. I bwatutun vanua gea bwatbwatuna vi tu bavtutu wasigi vataha mahavana.

¹¹ Bwatuna be mwa binihimwasigi garagusi, Ebraham mwa mai gi tama len̄len̄a be mwa bwatmetuaga i Sera mulei mwa bwatavwega. Ebraham mwa dau non butuana alun God i mwa haḡo wasi non tatauleo.

¹² Atatu vwate be Ebraham mwa sosori gin mateana, take varana vwate gabe mwa ivusi maragai huba, i atatu vwate sihav vului te dumwira. Kera ivus daltalei kun visiu lol mahao, i kun one antahi.

¹³ Atatu kera gea ram binihimwasigi garagusi alun God, take mahavana be ram mate, ram hav lai te dum ginau gea radu gabe God nu tatauleo be vi laia lalainira. Kera ram ḡita ginau kera gea kun gabe ram do hautu radu ninira, take ram samsamwara mulei huri be ramen gitara. I kera ram du ram bev luae lol ute melmelo be, kera ram dogo lol ureure geki take mwa du kun be kera tausala n̄ano, ureure geki mwa hav vora te mwasin tanora.

¹⁴ I mahavana atatu ram avo kunia, ram lolia mwa melmelo be, ran siro ute vwate radu gabe mwasin tanora.

¹⁵ Nora binihiva mwa hav lai te muleinira vai lol tanora gabe ram mwalue huba ninia. Be kera ras to be binihia kunia, bisata ras tabagilu mulei vai lol ute gea, take ram hav tabagilu te mulei.

¹⁶ Kera gea ram doron ute dolua vwate gi tanora gabe nu tavuha liu, i ute lol ute atamare n̄ano. I huria gea busbusiana sigai mai God, huria be kera ram bevea be kea nora God, huria be God mwa lol dautau bwatutun vanua vwate huba huria.

¹⁷ Haḡe bwatuna be Ebraham mwa binihimwasigi garagusi alun God, i mahavana gabe God mwa lol ron̄oe, take kea mwa lol dau huba be vi wehi nituna Aisak, be vi hogoi ginia lalai God. God nu lol tatauleo kera gea lalai Ebraham, i Ebraham nituna n̄an gaituvwa. Take mwa lol dau be vi wehia i vi hogoi ginia lalai God.

¹⁸ God nu vevea huba lalainia be, “Sivi Aisak, varamwa vivora ivus daltalei, huria be rav haḡo ihamwa.”

¹⁹ Take Ebraham mwa binihi dumwia be God vi lol dum atatu be mwa mate vi rahu mulei nin mateana. I kea mwa lai mulei dum nituna Aisak, nu abena kun be nu tomare mulei nin mateana.

²⁰ Haḡe bwatuna be Aisak mwa binihimwasigi garagusi alun God, vuvuri kea mwa batavuhai Jekob mai Iso, be ginau tav tavuha vi ḡauhira.

²¹ Haḡe bwatuna be Jekob mwa binihimwasigi garagusi alun God, i mahavana be mwa abena be men mate, kea mwa batavuhai ira nitun Josep vatvatahara. Kea mwa dataḡoi gaisigona i mwa du amare mwa dataro lalai God.

²² I bwatuna be Josep mwa binihimwasigi garagusi alun God, i mahavana gabe mwa abena be men mate, mwa avo huri taro gabe ata Israel rav mwalue nin Ijip. I mwa do mwa av durara mulei mwa bevea be, kera rav lolia kunia alun rebehina.

²³ Haḡe bwatuna be Taman Moses mai ratahina ramuru binihimwasigi garagusi alun God, kunia mahavana be Moses mwa bora, ramuru dahulinia huri vula gaitolu. Haḡe bwatuna be ramuru gitae be kea naturigi tavuha vwate, i kunia ramuru hav matagu tehe be raru men lol salil silo non ratahigi lavoa.

²⁴ Bwatuna be Moses nu binihimwasigi garagusi God, bwatuna haḡea, mahavana be kea mwa ḡaivuaga vuvuri mwa hav doron tehe be rav uloinia be kea nitun vavin daulato be nitun Vero.

²⁵ Kea mwa hav doron tehe be vi ron̄ mwandavuha lol alen̄an vuro be huri taro kolo n̄ano. Take ke mwa ron̄ mwandavuha be vi bulu mai ira atat non God ba ron̄ mwahantai maira.

²⁶ Nu ḡunia n̄ano be nu vevea be, be kera ras manuhi Wani Vurai gabe God vi horae vi himai, ta kea sihav busbusi tehe. Kea mwa ron̄ mwa davuha maragai alun ginau gea, ninia be mwa ron̄ mwandavuha gin ginau tavuha alun rahuana lol vanua Ijip. Kea mwa ron̄oe kunia huria be kea mwa ḡitae tagaro alun tavwe be God vi laia lalainia.

²⁷ Huria be Moses mwa binihimwasigi garagusi alun God, i bwatuna gea kea mwa mwalue nin Ijip, i kea mwa hav matagui te ratahigi lavoa gea be mwa lol horo maragai. Kea sihav van te burigai be men mom bano mulei, take mwa du bavtutu la hala be mwa huria, kun gabe matama mwa dutu la God gea gabe atatu sihav gita te dumwia gin mwasin matana.

²⁸ Huria be kea mwa binihimwasigi garagusi alun God, bwatuna gea kea mwa dau bwatun Halbisḡalau. Kea nu vevea lalai ata Israel be rav tau dagan sipsip la gai duluai la gatavan imwara. Kera ram lolia kunia huria be Enjel gea be God mwa horai be vi wehi atatu sihav wehi te dum nora muai bwana.

²⁹ Haḡe bwatuna be ata Israel ram binihimwasigi garagusi alun God, bwatuna gea ram bano dum n̄andu Tahi Memea la ute mamaha. I mahavana be kera ata Ijip mulei ram doron be ramen van n̄adua, tahi mwa bosabulu alura vuvuri kera duluai ram mwinu.

³⁰ I mulei bwatuna be ata Israel ram binihimwasigi garagusi alun God, bwatuna gea aran bwatutun vanua Jeriko mwa mwaruru. Kera ran dalis bwatutun vanua gea huri gubwen̄ gaibitu.

³¹ Gin binihimwasigi garagusi haḡea mwa lol atatu be ram hav dabe te silon God ram hav wehi te vavinen rovrovoi homu Rehab; huribe mwa bului atat gita surai ata Israel.

³² Take nasav mom bev te mulei avoana gea non Kidion mai Barak i Samson mai Jepta, mai Deved i Samuel i ira atatun Vev Sera.

³³ Bwatun nora binihimwasigi garagusi bwalo mai ata la vanua dodolua, i ram muramura ḡorora. Kera ram lalaḡo vavtutu, i ram lai dum ginau tavuha be God mwa datauleo be vi laia lalainira. Mahavan rituai kera ram duḡoro bwan̄on laeon.

³⁴ Mahavana rituai ram haru bamate dum gabi tabwalue be nu wasi maragai, i mahavan rituai ram romaragai gin atatu be ram doron be ramen wehira gin buan bwaloana. I nora muramura sigai, take God mwa lai muramura lalainira, i kera ram muramura maragai lol taron bwaloana, i ram muramura nin atatun bwaloana non vanua dodolua.

³⁵ I bwatuna be vavine rituai ram binihimwasigi garagusi alun God, bwatuna gea God mwa lol barahu mulei nitura be ram mate huba. Take atatu rituai ram barihai didi maribwesi, i ram lin̄ nora ivwalu ram lol ḡagarasira maragai lol rebehira, ram mate lol rahuan tavuha.

³⁶ Atatu rituai atatu ram manuhi hantainira, i ram bivilisira. I atatu rituai mulei kunia atatu ram bauhira gin gao talai ram daura lol imwa vauvauhi.

³⁷ Atatu rituai mulei atatu ram bohara gin vatu, i rituai mulei atatu ram soara gi n̄adun gairua. I atatu rituai ram wehira gin buan bwaloana. I rituai gaisagara sigai, take ram sagasagai vinun sipsip mai nani. Vataha mahavana ram habwea mwa ririhai, i atatu ram mwaloinira ram ḡorora i ram lol hantainira.

³⁸ Ureure nu hav dadariha tehe be vi bulu dum maira. Take ram la ram lol tanora lol ute son̄son̄o n̄ano, la vanua vuroi, la vusi i lol malan̄a, i lol lulu lol tano.

³⁹ Bwatuna gabe kera geki ram binihimwasigi garagusi alun God, kunia kea mwa lai iha tavuha lalainira gabe sihav vano te dumwi. Take kera gea ram hav lai te dum ginau tavuha radu gabe God nu tatauleo be vi laia lalainira,

⁴⁰ huria be God nu lol non taritari vwate huba be vi lol tavuhai gida liu. I lol bininhiva non God gea, nu vinihia be vi tarihoura mai gida amua, huria be vi lolira rai vavtutu tavuhai.