Filipae 4 - Hano Niu Testamen

Havanau be atatun Kraes rav lolia.

¹ Ira mwasin tuaku, nam dabe kimiu i nam doron be nav gita kimiu. Gin lai samsamwara lalaiau i gim loliau nam sasagerega huri kimiu, i giv tu wasi alun Ratahigi kunia be nan vevea huba lalai kimiu.

² Nam hudali Iuodia i Siutika be raru vi dame la ihan Ratahigi.

³ I nam hudali kimiu, ira tuaku be gin masiri gin binihimwasigi, giv bului ira vavine uhu. Kera ram lol rovoga buluiau be ramen vev Roroi tavuha, kera mai Klemen i rituai mulei be ram lol rovoga maiau, ihara nu ravana lol bukan rahuana.

⁴ Giv masiri gin samsamwara lol Ratahigi tagaro. Nai vev muleinia be giv masiri gin samwarana.

⁵ Giv lin̄ kimiu duluai rav gitae be kimiu atat maḡemu i sine tavuha. Ratahigi vi himai sihav vora te n̄ava.

⁶ Gisav lai te binihiva huri hano be gin doronia, take giv tataro i giv hudali God huri ginau duluai be gim doronia, tagaro giv lai avkari.

⁷ I Tamwata non God, be kea gaivua, tasav ilo te dum huria, vi haḡo ḡoḡo lolomiu i binihimiu lol Kraes Jisas.

⁸ Ira tuaku giv binihi huri ginau be ran tavuha i ran dadariha huri avkariana. Binihi huri ginau be ran mwasigi i binihi marahi i ran vavtutu, i ran melmelo i ran gabwola i mwa ḡogonaiana.

⁹ Giv lol havanau be gin huhuinia huba i gin laira huba niniau, havanau be nan vevea lalai kimiu, i havanau be gin gitau nan lolia. I God kea be mwa lai tamwata vi togo mai kimiu.

Pol mwa bev avkariana lalai ira atatun Kraes

¹⁰ Inau nam ron̄ mwandavuha maragai gin Ratahigi be gin seserai nomiu gitaḡoro huriau mulei take aia hala sigai lalai kimiu be giv seserainia.

¹¹ Inau nam hav vevea tehe lalai kimiu kungeki bwatuna be nam doron ginau vwate. Nan huhuinia be nav lai sine mahuri mai ginau be nam haḡo dumwira huba ram mai lalaiau.

¹² Nam ilo halana be nav rahu kunhanigi batena be nam hiruga, i nam ilo halana be nav togo kunhanigi batena be nam rosoga. Nan huhui hal dahuligi be nav ron̄ mwandavuha vataha taro lol ginau duluai be ram loli, batena be ginau nu dadariha be nav gania i batena be maro mwa ḡasiau, batena nam haḡoe liua be nam doronia i batena be nam hav laia tehe be vi dadariha.

¹³ Nav lol dum ginau duluai sivi Kraes, bwatuna be kea mwa lai hui wasi lalaiau.

¹⁴ Take nu tavuha be gin buluiau la mahavana be nan doron buluiana.

¹⁵ Kimiu ata Vilipae giv binihi dumwia batena be nan toretore huri Roroi Tavuha muana aia. Batena be nan lin̄ Masedonia, kimiu n̄an imwa tataro be gin buluiau.

¹⁶ Gin hora vataha ginau lalaiau vaviha be nan doronira batena be inau Tesalonaeka.

¹⁷ Mwasigi be barabe hurira be nam doron be nav lai hogoi nin kimiu, take nam doron be kimiu giv lai vatavuha nin nomiu hogoi.

¹⁸ I kadogaha nam lai ginau duluai i liu. Nam haḡo ginau duluai be nam doronia, bwatuna be Epavrodaetas nu lai nomiu hogoi lalaiau. Kun hogoi huri ahu bon ḡologolo lalai God, kea be mwa lai ḡoḡo tataroi i mwa ron̄ mwandavuha ginia.

¹⁹ Noḡu God vi haḡo non roso be nu gabwola lol Kraes Jisas be vi laia lalai kimiu ginau duluai be gim doronia.

²⁰ Uloi roron God Tamanda vai tuai i vai tuai Amen

^21-22 Giv helheloi atat non God gaitutuvwai lol Kraes Jisas. Kera be maiau ram hora nora avoan helheloi lalai kimiu, liuhage lalai kera lol imwan Sisa.

²³ Hogoi non Ratahigi Jisas Kraes vi togo mai kimiu duluai.