Filimon 1 - Hano Niu Testamen

Turin Rovoga mwa mai gi Atatun Uloilua

¹ Nin Pol atat vauvauhi lol Kraes Jisas, i nin Timoti tuada. Lalai Vilimon, mwasin nonda buluana i atatun rovoga bul mai gida;

² lalai Abia, kea hogosida; i lalai Akibas kea atatun rovoga bul mai gida; i lalai uloilua be mwa ḡoḡo bulbulu lol imwamiu:

³ Hogoi i tamwata na togo mai kimiu nin God. Tamanda i Ratahigi Jisas Kraes.

Lolotabetabe i Binihimwasigi Garagusi non Vilimon

⁴ Vataha mahavana nam avkari noḡu God mahavana be nam bev ihamwa lol noḡu tataro,

⁵ bwatuna be nam ron̄oe huri lolotabetabe be gom lolia huri ira sinombu sabuga non God duluai, i nom binihimwasigi garagusi alun Ratahigi Jisas.

⁶ Nam dataro be binihimwasigi be gom hogoinia vi loligo gov iloe huri vatavuha duluai be gam laia nin Kraes.

⁷ Noḡu samwarana gaivua maragai i lolo tavuha, tuaku, bwatuna be lolotabetabe be gom seserainia lalai sinombu non God mwa lol bamahurinira.

Gov lai mulei Onesimas kun gabe Tuada

⁸ Haḡe kunia lol Kraes inau nav wasi dumwi, i nav tauleoinigo be gov lalaḡoi havanau be nu vavtutu.

⁹ Take bwatuna be nam dabego, loloku mwa hahavwani hurigo. Inau Pol, gabe bwatmetue kadogaha mulei inau atat vauvauhi huri Kraes Jisas,

¹⁰ Loloku mwa onda hurigo, huri nituku Onesimas, gabe nu vora nituku mahavana be inau nan togo lol imwa vauvauhi.

¹¹ Tuai huba kea nu vora atat vuroi lalainigo, take kadogaha kea mwa bora mwasin atatu lalaiau i lalainigo

¹² Inau nam hora muleinia lalainigo, nam hora mwasin irubwiku bulmaia.

¹³ Nan hohovi be nav haḡo bul maiau, huribe lol tanomwa bisata kea vi buluiau mahavana be inau lol imwa vauvauhi huri Roroi Tavuha.

¹⁴ Take nam hav doron tehe be nav lol havanau tehe be nam hav hudalinigo tehe muana, huribe havanau tavuha tehe be gom lolia nu hav vora te huria be nam ḡaroinigo.

¹⁵ Bisata Onesimas mwa haraborae ninigo huri mahavana vwelvwele, i giḡo gov haḡoe muleinia bulmaigo vai tuai

¹⁶ kea sihav mom bora te kun turin rovoga, take vi tavuha nin turin rovoga, kun tabetabe. Nam dabe maragainira, take giḡo gov tabea vi vora liu, saraḡo kun gabe kea turin rovoga i kun gabe kea mwa binihimwasigi alun Ratahigi.

¹⁷ Be giv gitau kunbe inau tuamiu lol rovoga, giv laiḡogo Onesimas kunia n̄ano be giv lai ḡoḡoau.

¹⁸ Be nu lol ginau tehe nu vahala lalai kimiu sage nu haḡo te hano nin kimiu, giv taua gea aluku.

¹⁹ Inau, Pol, nam ravae kunia gin mwasin limaḡu. Nai vol muleinia, i nasav vevea te huri ginau vwate be gin lolia lalaiau huri rahumiu sibomiu.

²⁰ Haḡe tuaku nam navohigo be gov lolia geki lalaiau la ihan Ratahigi: lol samsamwarai irubwiku lol Kraes.

²¹ Nam rav ravrava uhu, nam iloe be gov lol hano be nam hudalinigo huria i gov lolia vi liu.

²² Ginau mulei vwate gov lol vatuvwai vwavwana vwate huriau be nav togo aia, bwatuna be nam doronhohov be God vi vwaliu nomiu tataro i nav mai dumwi vai abemiu.

Nogonan Avoan Helheloi

²³ Epavras, atat vauhi maiau huri Kraes Jisas, mwa hora non avoan helheloi lalai kimiu.

²⁴ I Mak mulei, Aristakas, Dimas, i Luk, kera be ram lol rovoga bulmaiau ram hora nora avoan helheloi.

²⁵ Hogoi non nonda Ratahigi Jisas Kraes vi togo mai kimiu lol nomiu Vui.