3 Jon 1 - Hano Niu Testamen

Avoanan Tabeana

¹ Nin ira bwatmetue. Lalai mwasin tuaku Kaeas, gabe nam dabea lol mwasigi:

² Tuaku, nam iloe be atmatemiu ram lol rovoga tavuha, i nam dataro be gim lol tavuha la hala duluai i rahumiu vi tavuha la hala duluai i rahumiu vi tavuha i gisav haro tehe.

³ Nam samsamwara maragai be ira tuaku rituai ram mai i ram bevuri lalaiau huri rahumiu i kun hanigi gim huri hala mwasigi.

⁴ Ginau vwate mwa hav lai te samwarana liu lalaiau ninia be namen ron̄oe be ira nituku ram huri halan mwasigi.

Jon mwa Avkari Kaeas

⁵ Tuaku, nu tavuha be gom bului ira atatun Uloilua, vaivotu kera be gom len̄ainira.

⁶ Ram bevea lalai atatun uloilua huri nomiu lolotabetabe. Nam hudalinigo be gov buluira be nora lagoana vi van rahurahu la hala be nu vavtutu i la lolmatan God.

⁷ Ram dau bwatun rovoga mwa mwalue lalai Kraes, i ram hav dame tehe la ginau Vwate nin atatu be vorate mwa binihimwasigi.

⁸ Haḡe tav bului atatu Kunia; lol taro be tav lolia, tam bulbulu lol nora rovoga huri mwasigi.

Diotreves mai Demetrias

⁹ Nam rav ginau Vwate lalai uloilua, take Diotreves, mwa doron be vi vora nora tomuai, mwa hav roron̄tai te Kamai.

¹⁰ Batena be nav mai nav avo huri hano be Diotreves nu lolia huri kunhanigi be mwa dentene i mwa lol ginau hantai huri gida. Take geki barabe nu dadariha huria, kea barabe vi dame huri ira atat binihimwasigi be rav mai, mwa du ḡorora mulei be ram doronbe ramen laira, i mwa lol ron̄oe be men tau dagainira nin uloilua.

¹¹ Tuaku gosav huri te havanau be nu hantai; gov huri hano be nu tavuha. Atatu be mwa lalaḡo tavuha kea bilan God. Take atatu be mwa hav lalaḡo te tavuha mwa hav ilo te hohoi God.

¹² Atatu n̄oto ram bev ginau tavuha huri Demetrias, i mwasigi mwa dame huri hano be ram bevea kamai mulei gam bev tavuhainia i gim iloe be ginau be gam bevea kea mwasigi.

Nogonan Avoan Helheloi

¹³ Ginau ivusi maiau be nam doronbe nav ravae lalainigo, take nam hav doron te didi ravae gin uli.

¹⁴ Nam binibe nav gitago si hav n̄ava tehe i nav avo maigo be tav gitagita gida.

¹⁵ Tamwata lalainigo. Ira tuada teti ram lai nora avoan helheloi lalainigo. Nam hudalinigo be gov helheloi ira tuada aia gaitutuvwai la ihara.