2 Timoti 4 - Hano Niu Testamen

¹ Pol mwa bevea be, nam lai avoan wasi lolmatan God i Kraes Jisas, kea be vi harahara lalainira ran rahu radu i lalainira be ram mate huba, gin non maiana i non Ute Ratahigi.

² Inau nam hudalinigo be gov toretore huri Leo Tavuha. Lol vatuvwai vataha taro, i vevea lalai sinombu havanau be mwa du be rav lolia. Vevea lalainira lol taro be ram bahala. Av durara gin sine maḡemu gaivua, i silo vagahi vavtutu.

³ Bwatuna be taro vi mai, batena be sinombu tasav mom roron̄tai tehe huri silo vagahi mwasigi. Rav huri havanau be nora doroniva mwa doronia sibora. Ram hiḡehiḡe huri ira vagahi dodolua, be ram bev ginau lalainira vataha ginau be kera ram doronia huba.

⁴ Rasav mom doron tehe be rav roron̄tai huri mwasigi i rav tau bwatuna ba huri silo vagahi tentene.

⁵ Take giḡo gov togonainigo sibomwa vataha taro duluai. Dame ḡoro taro ririhai duluai. Gov lol rovoga be, gov toretore huri Leo Tavuha, i lol haraharai rovoga duluai be non atatun rovoga non God.

⁶ Rahuku nan hagainia huba kun be hogoi lalai God, i taro nu mai huba be nav lin̄ rahuana geki,

⁷ Nan bwalo gin bwaloan tavuha, nan nogoi rovoan viluslusi, nan haḡo batugehi binihimwasigi garagusi.

⁸ Kadogaha, gaisosorin bwatu mwa do dautau hohoviau. Gaisosorin bwatu be God nu tau bavtutuiau maia. God be mwa harahara bavtutu, kea vi lai gaisosorin bwatun gea lalaiau la Nogonan Gubwen̄. Sihav vora te lalaiau gaheku take lalainira duluai be ran hohovi gin lolotabetabe huria be vi mai mulei.

Avoana non Pol lalai Timoti

⁹ Gov lol ron̄oe be gov mai vai abeku be vi dumwi vilvilehi.

¹⁰ Bwatuna be Dimas, be nu tabe maragai ureure uhu, nu lin̄iau mwa ban vai Tesalonaeka. Kresens kea nu van vai Kelesia, i Taetus nu van vai Dalmatia.

¹¹ Luk gahena n̄an mwa do radu maiau. Lai Mak vi mai maigo be goi mai, bwatuna be kea vi bului dumwiau mai noḡu rovoga teti.

¹² Nan hora Tikikas vai Ivisas.

¹³ Batena be inau nan togo Troas, nan lin̄ noḡu gaisagan ute hohoga aia mai Kapas. Batena be gov mai, lai muleinia ba mai lalaiau, mai noḡu buka rituai, liuhage kera be nu ravana alun vinun sipsip.

¹⁴ Aleksanda be atatun rovoga vwate be nu lol ginau hantai ivusi lalaiau. God vi vevegia huri hano be nu lolia.

¹⁵ Giḡo mulei gov gitaḡoro berevai gim sinego, bwatuna be kea mwa bwal wasi ḡoro nonda silo vagahi.

¹⁶ Muan taro be nan bwalo ḡoroau siboku, tuara vwate mwa hav turau tehe; kera duluai ran romaragai niniau. Nam dataro be rav lai binihi kaburai.

¹⁷ Take Ratahigi mwa dogo maiau i mwa lai muramura lalaiau be nai vev dum duluai Leo Tavuha lalainira be ram hav vora te ata la varan Israel. Kunia be nu varahuau nin bwan̄on laeon.

¹⁸ God vi varahuau lol taro be ihei mwa doronia be vi lol ḡagarasiau, i vi lai rahurahuiau vai lol non Ute Ratahigi amare. Uloi roroi God vai tuai i vai tuai! Amen.

Nogonan Avoan Helheloi

¹⁹ Nam lai avoan helheloi lalai Prisila i Akwila i ata lol imwam Onesivoras.

²⁰ Erastas kea mwa do Korin i nam lin̄ Trovimas huribe mwa haro mwa do Miletas.

²¹ Gov lol ron̄oe be gov mai vai abeku amua gim siv vora taron ute hohoga. Iubulus mwa hora non avoan helheloi lalainigo. Mulei Puden, Linus, Klodia, i ira tua lol Kraes ram helheloinigo.

²² Ratahigi vi togo mai nom Vui. Hogoi non God vi togo maigo.