2 Timoti 3 - Hano Niu Testamen

Nogonan Gubwen̄i

¹ Gov vinihi dumwia geki be! lol Nogonan Gubwen̄i vi vora taro ririhai ivusi,

² bwatuna be sinombu rav tabera sibora, rav tabe homu, avoan sasagerega, i ram binihi sagera. Rai vev ginau hahantai vai alura rituai, rasav ron̄ te maḡemu alun ira tamara i ratahira sage ram hav avkari tehe sa ram hav vinihi te dum God.

³ Rasav tabe te atat dodolua, rav lol bwarebware atat dodolua, rai vora atatu be mwa bwalbwalo, i rav lololhoroga. Ram barihai ginau n̄oto be nu vavtutu.

⁴ Rai van burigai atatu be ram mwemwearu bulu i rav lol ginau dadaloiga be rasav lai te binihiva huria. Rav lol nora doroniv hahantai sibora, rav tabe nora doroniva sibora lol tanon God.

⁵ Rav lolia kun be ram lol rovoga huri God take rasav haḡo te dum non muramura. Gov to hautu nin atatu kera gea.

⁶ Rituai alolora ram haroro alolon imwa rituai be ira vavin mandamanda, be ran masiri gin lalan̄an bwatigoro i ram doron maragai lalan̄an ginau hahantai.

⁷ Vavine uhu tagaro ram huhui silo vagahi gara, take ram hav haḡo te batugehi mwasigi be rav ilo halana.

⁸ Kun Janes i Jambres kera raru vanburigai Moses. Atatu kera geki ram banburigai mwasigi. Nora binihiva mwa hantai, i ram hovi ram lol ron̄oe be rav huri binihimwasigi garagusi.

⁹ Take rasav van te sivigi dumwi lol hano be ran lolia, bwatuna be Janes i Jambres atatu duluai rav gitae kun be ram daltale.

Giv Tabe ira Silo Vagahi

¹⁰ Take giḡo gon huri hano be nan vagahia, hala be nam dogo, noḡu hala. Gon huri noḡu binihimwasigi garagusi, noḡu ron̄ mwan̄ava, i lolotabetabe, i gom iloe be nan hav lin̄ia tehe,

¹¹ gom iloe be ran lolia nam habwe taro ririhai, i nan ron̄ ḡagarasi. Gon ilo hano be nu loli lalaiau Antiok, Okiniam i Listra. Nan ron̄ ḡagarasi take Ratahigi nu varahuau nin taro ririhai kera gea.

¹² Kera duluai be ram doron be rav togo kunia be God mwa doronia, lol Kraes Jisas, rav ron̄ḡagarasi.

¹³ Take sinombu be ram hantai i ram ruruhi rituai rav tau bwatuna rav hantai i rav hantai liu. Rav ruruhi rituai, take mulei rav ruruhira sibora.

¹⁴ Take giḡo mwa du be gov huri rahurahui silo vagahi be gon huhuinia. Gom iloe be kera silo vagahi mwasigi, bwatuna be gom butu alura be ran vagahigo.

¹⁵ La mahavana be giḡo naturigi gon ilo Avoan Sabuga kea be mwa domuainigo vai lol varahuva sivi binihimwasigi garagusi lol Kraes Jisas.

¹⁶ Avoan sabuga duluai God nu hagainia i ran tavuha huri silo vagahi, huri be rav seserainia lalai sinombu havanau be nu vahala lol rahura, be vi vavtutui vahalana duluai, i be vi vagahi kun hanigi be atatu vi to bavtutu.

¹⁷ Haḡo avoan sabuga, atatu be mwa lol rovoga lalai God vi lol dumwia, vi lai duluai hano be mwa doronia be vi lol rovoga tavuha duluai.