2 Timoti 1 - Hano Niu Testamen

¹ Nin Pol, hala non Kraes Jisas hurin doroniva non God. God nu horau be nai vevea huri tatauleon rahuana kea be lol Kraes Jisas.

² Lalai Timoti, kea naturigi tabe lalaiau: Hogoi, sine hahagavi i tamwata lalainigo nin God Tata i Kraes Jisas nonda Ratahigi.

Avoan Dura lalai Timoti

³ Nam avkari God be nam dataro nam sibweri ihamwa, rani i bon̄i, nam lol rovoga huria, nam lol havanau be nam iloe be nu vavtutu kunia be ira sibiku ran lolia.

⁴ Nam binihi dumwia be gon tan̄ihiau, nam doron maragai be nav gitago be nav masiri dum gin samsamwara.

⁵ Nam binihi dum nom binihimwasigi garagusi be nu mwasigi. Binihimwasigi garagusi gea nu togo muana lol tuagamwa Lois i lol ratahimwa Iunis, i nam iloe be giḡo kadogaha gom do mai binihimwasigi gea.

⁶ Geki haḡea huri hano nam basineraninigo be gov haḡo ḡoḡo hogoi be God nu laia lalainigo batena be nan tau limaḡu alumwa.

⁷ God nu hav lai te vui lalai gida be vi lolia tai matagu, take Vui huri muramura i lolotabetabe i sine togonai.

⁸ Haḡe gosav busbusi tehe be gov vevea lalai sinombu huri nonda Ratahigi Jisas, i gosav busbusi tehe giniau, be nam do lol imwa vauvauhi huri Kraes. Take gov ron̄ ḡagarasi maiau huri Leo Tavuha. God, kea be mwa lai muramura lalai gida be tav lolia kunia.

⁹ Nu varahu gida i nu lol gida non sinombu sabuga. Kea mwa hav vora te bwatuna be tan lol ginau vwate siboda, take huri taritari i hogoi non God. Hogoi gea nu laia lalai gida sivi Kraes Jisas amua taro mwa siv bwativuga.

¹⁰ Take kadogaha mwa seserainia lalai gida gin maiana non varahuda Kraes Jisas. Nu lol kaburai mateana, i sivi Leo Tavuha kea mwa seserainia lalai gida hala be tav lai rahuana be sihav lol te kaburaiana.

¹¹ God nu gita luau be nav vev Leo Tavuha i nai vora hala i vagahi.

¹² Nam ron̄ ḡagarasi kadogaha bwatuna be nam bev Leo Tavuha, take nam hav busbusi tehe, bwatun be nam ilo Jisas, wani be alolona nan binihimwasigi. I nam binihimwasigi be kea vi holḡoro havanau be nu taua aluku vai votu Gubwen̄i kea be vi mai.

¹³ Gov huri halan mwasin silo vagahi kea be gon ron̄oe niniau lol binihimwasigi garagusi i lolotabetabe, kea be lol Kraes Jisas.

¹⁴ Gov haḡo wasi ginau tavtavuha duluai be nan taua lol rahumwa. Vui Sabuga be mwa dogo alolomai mwa lai muramura lalainigo huri ginau geki.

¹⁵ Gom iloe be sinombu duluai lol Vanua Esia ran lin̄iau huba, Vijelas i Hemojenes kera mulei.

¹⁶ Nam dataro be God vi seserai sine hagavi lalai ira ata lol imwan Onesivoras, kea tagaro nu buluiau i nu hav busbusi tehe be nan togo lol imwa vauvauhi.

¹⁷ Batena be nu mai vai Rom, nu hiḡe maragaiau vaivotu be nu habweau.

¹⁸ Nam dataro be Ratahigi vi hogoi non sine hagavi lalainia lol Gubwen̄i gea. Gom iloe be nu buluiau lol hala ivusi Ivisas.