2 Tesalonaeka 3 - Hano Niu Testamen

Giv Tataro huri Kamai

¹ I kadogaha ira tuaku, giv tataro huri kamai be silo vagahi non God vi tu rahurahu i vi lon̄ahi vilvilehi ute i sinombu rav lol gogonai ira silo vagahi keragea, kunia be nu loli maigo.

² I giv tataro be gav tu wasigi nin ira vui son̄son̄o i atat vuroga, huribe mwa hav vora te atatu n̄oto be ram binihimwasigi.

³ Ta nonda Ratahigi kea nu mwasigi i vi lai lalainigo muramura i vi gita ḡorogo nin Vui son̄son̄o.

⁴ God mwa lol kamai gam ilo bavtutuinia, kimiu gim lol ginau duluai be gam bevea lalai kimiu i be giv lol rahurahui ginau be gam bevera.

⁵ Nam dataro be Ratahigi vi to muai irubwimwa vai lol lolotabetabe non God i tamwata non Kraes. Atatu rav lol rovoga huribe rav lai gara ginau.

⁶ Ira tuaku, lol roron̄o non ratahigi Jisas Kraes, gam bevea lalainigo be gov tu dagai nin atat binihimwasigi be mwa hav doron te didi lol rovoga i mwa hav huri te silo vagahi be gam laia lalainigo.

⁷ Giḡo kimiu sibomiu gim iloe be giv togo la rahuana kunia be kamai gam dogo aluna. Kamai varate gan bwatiḡoruga lol taro be gan togo mai kimiu.

⁸ I la mahavana be gam ḡan ginau gan atatu dolua, gam bolia duluai. Gam lol rovoga wasi bon̄i i rani huribe gasav vol te ginau nin vwate alolomiu.

⁹ Nomai mwasigi be gav hudali kimiu be giv bului kamai, ta gam lol rovoga be gav gitaḡoro kamai sibomai huribe gav tau malele tavuha lalai kimiu be giv huria.

¹⁰ Lol taro be gam dogo mai kimiu, gam lai lalai kimiu silo geki: “Ihei be mwa hav doron te didi lol rovoga kea si hav gan te ginau.”

¹¹ Gam ron̄oe be atatu rituai alolomiu ram barihai didi lol rovoga. Ram hav lol te ginau vwate ta ram lol hahavwanira gin rahun atatu dodolua.

¹² Gam basinerani atatu kerageki i gan hudalinira lol ihan Ratahigi Jisas Kraes be rav lol rovoga ḡoḡonai huri rahura sibora.

¹³ Ta kimiu ira tuaku, gisav bwatiḡoruga tehe be giv lol tavuha.

¹⁴ Mandovai be atatu rituai rasav gogonai te hano gam bevea lalainigo lol ravrava geki, gov tau nom binbinihi alura. Gosav lol te ginau vwate bul maira huribe rav busbusi.

¹⁵ Gosav lolira tehe kunbe ira ivwalu. Gov lolira kunbe atat binihimwasigi.

Nogonan Avoana

¹⁶ Kadogaha nam dataro be Ratahigi Tamwata vi lai lalainigo tamwata i la hala duluai Ratahigi vi togo mai kimiu n̄oto.

¹⁷ Inau Pol, nam lol nogonogoi ravrava geki gin noḡu ravrava siboku. Noḡu ravrava duluai kun geki n̄oto be vi seserainia be ram mai niniau. Geki haḡea hala be nam ravrava.

¹⁸ Nam dataro be hogoi non Ratahigi Jisas Kraes vi togo mai kimiu duluai.