2 Tesalonaeka 2 - Hano Niu Testamen

Ginau Hahantai rav Loli

¹ Ira tuaku, ginau vwate be nav vevea huri maiana non ratahigi Jisas Kraes i taro be tav visvisogari vatuvwa maia.

² Gosav lol te binihimwa vi lalan̄aga sa gosav matagu tehe be gov ron̄oe be gubwen̄i non ratahigi nu mai huba. Atatu vwate vi vevea kungeki lol toretore sa lol roroi sage lol ravrava vwate be ran vevea kunabe kamai gan ravae.

³ Gosav mahin̄a tehe be atatu vwate vi vataltalego la hala vwate. Gubwen̄in ratahigi si hav mai tehe vai votu be rav van burigai nin God i atatun vui son̄son̄o be mwa lago la halana vai lol ute meto vi visirai.

⁴ Kea si hav ron̄ te hano be vi veveana i vi taua sibona amare la ginau duluai gabe mwa uloiana be god sage havanau be sinombu ram uloi roroainia. I vuison̄son̄o gea vi haroro mulei lol imwa gogonai non God i vi togo aia i vi vevea be kea God.

⁵ Nan vevea lol taro be nan togo mai kimiu be ginau n̄oto geki vi loli. Gim hav vinihi te dumwia?

⁶ I kadogaha gim ilo hano be mwa duḡoro atatun vui son̄son̄o vi visirai la mwasin tarona.

⁷ Muramura dahuligi non atat vuroga mwa lol rovoga huba lol ureure, take atatu vwate mwa duḡoro muramura gea. I kea vi tuḡoro rahurahuinia vaivotu be vi laian lua nin hala.

⁸ I atatun vui son̄son̄o vi visirai, i ratahigi Jisas vi wehia gin mambuha be mwa mai nin bwan̄ona i vi lol kaburainia gin sarisarin non maiana.

⁹ Atatun vui son̄son̄o gea vi mai gin muramura non Setan. Kea vi muramuraga i kea vi lol ginau dan̄an̄a tentene ivusi, ira dovon̄a, i ginau dan̄an̄a.

¹⁰ Kea vi lolia gin hal lete ivusi be men sasaruhira gabe ran sala. Kera rav mate, huribe ram barihai didi huri hal mwasigi. (Kebe ras doron mwasigi, kera ras rahu.)

¹¹ Bwatuna haḡea geki God mwa hora lalainira ginau muramura be mwa lolira ram bano dagai nin mwasigi huribe rav binihimwasigi tenteneana.

¹² Kera n̄oto gea rav lai silo vevegi wasi, kera ram hav binihimwasigi tehe, ta ram samsamwara be ramen lol ginau lete.

God nu Gita Luago huri Ginau Tavuha

¹³ Ira tuaku, kimiu gabe God mwa doron kimiu, God nu gita luago la bwativuna be gov rahu. I gida duluai tav avkari God vataha mahavana hurigo. Giḡo gom rahu gin Vui Sabuga be mwa loligo gom sabuga gin nom binihimwasigi garagusi lol mwasigi.

¹⁴ God mwa lol Roroi Tavuha be gam doretore huri be men uloinigo be gomen rahu huribe gov rahu dumwi lol sarisari non nonda ratahigi Jisas Kraes.

¹⁵ Ira tuaku, giv tu wasigi i giv binihimwasigi ira silo vagahi be gam laia lalainigo lol nomai avoana i nomai ravrava tuai.

^16-17 Nam dataro be nonda ratahigi Jisas Kraes sibona i God tamanda vi av durago i vi lol muramurago lol ginau tavuha n̄oto be gom lolia i gom bevea. God mwa dabe gida, i sivi non hogoi mwa lai lalai gida doronhohov tavuha i avoan dura be mwa rahu vai tuai.