2 Pita 1 - Hano Niu Testamen

Avoanan Tabeana

¹ Nin Saimon Pita, atatun rovoga i hala non Jisas Kraes. Lalai Kimiu be gin lai binihimwasigi garagusi kun kamai, bwatuna be nonda God i Varahuda Jisas Kraes, mwa lol havanau be nu vavtutu.

² Hogoi i tamwata vi laiana lalai kimiu vi mauri vi liu, bwatuna be kimiu mwasigi gim ilo God i Jisas nonda Ratahigi.

God nu lai lalai Gida ira Vatavuha

³ Jisas nu haḡo muramura non God, i kea haḡea nu lai ginau duluai lalai gida be tam doronia huri rahuana i be tav lol rovoga lalai God. Gida tam haḡo ginau kera geki bwatuna be tam iloe. Jisas mwa uloi gida gin non sarisari i non tavuha.

⁴ Sivi ginau kera geki nu lai lalai gida ira tatauleo Wasi i tavuha. Mai hogoi kera geki kimiu giv betea i giv kun God, i ureure sihav lol te dum hantai kimiu mai non doroniv bwatigoro.

⁵ Bwatuna be kimiu gim haḡo ira vatavuha geki, Giv lol raumatan ginau i giv bulusia vai lol rahumiu: be binihimwasigi garagusi mwa dogo huba, giv bulusia gin tavuha, be tavuha mwa dogo huba giv bulusia gin iloute;

⁶ be iloute mwa dogo huba giv bulusia gin binihiv bahivoi; be binihiv bahivoi mwa dogo huba giv bulusia gin maḡemu; be maḡemu mwa dogo huba giv bulusia gin rovoga non God;

⁷ be rovoga non God mwa dogo huba giv bulusia gin alen̄ tavuha lalai ira tuamwa; be alen̄ tavuha mwa dogo huba giv bulusia gin lolotabetabe.

⁸ Kebe ginau duluai geki mwa du alolomiu i ram mauri, kera haḡea rav bului kimiu be giv lol rovoga tavuha lol nomiu ilo ute lol nonda Ratahigi Jisas Kraes.

⁹ Take ihei tehe be mwa hav haḡo te ginau kera geki mwa hav gita te ute be men melmelo. Kea matagara i nu vinihi malioi be kea nu melmelo nin ira vuro ata tuai.

¹⁰ Ira tuaku atamwani i vavine, giv vinihi hahavwani be kimiu mwasigi gin uloiana i gin gitan lua sivi God. Kebe giv lol ginau duluai geki, gisav hovi te dumwi.

¹¹ I kimiu giv lai laiḡoḡo gaivua vai alolon ute ratahigi non nonda Ratahigi i varahuda Jisas Kraes vai tuai i tuai.

¹² Kimiu gim ilo ginau duluai geki, i kimiu gin wasi maragai lol mwasigi, take nav bului kimiu be giv vinihi dumwira.

¹³ Nam binihia be nu mwasigi huriau be nav bului kimiu be nav vinihia lol taro be nam dogo lol rebehi geki.

¹⁴ Nam iloe be mwa abena be namen lin̄ rebehi, kunia be nonda Ratahigi Jisas Kraes nu vagahiau.

¹⁵ Nav lol ron̄oe be kimiu mulei giv to vinihi dum ginau kera geki gaituvwa n̄an ataguna be inau nav vano.

Kamai gan Gitae huba alun Jisas

¹⁶ Lol taro be gan vevea lalai kimiu huri muramuran maiana non Kraes nonda Ratahigi Jisas Kraes, Kamai gan hav vev te vevuri mataisaoga n̄ano be mwa mai nin binihin atatu gaituvwa. Take kamai gan gita ute lavoa non Jisas gin matamai sibomai.

¹⁷ Jisas nu ron̄ silon God, sarisari lavoa, lol taro be nu lai binihi marahi i sarisari nin God tata. Silo mwa bevea be, “Geki nituku, kebe nam dabea, i nam ron̄ mwandavuha ginia.”

¹⁸ Kamai gan ron̄ silo gea nin amare lol taro be gan togo mai Jisas la vusi Sabuga.

¹⁹ Geki haḡea nu lolia mwa melmelo lalai kamai gin roroi be atatun vevsera ran vevea. Nu tavuha hurigo be gov huri sosori hano be ran vevea i kimiu giv huri gigita lol ute meto, vaivotu be gubwen̄i vi tau bwatuna i mahoe vi tomare lol sibwen̄imiu.

²⁰ Liuhage, mwa du maragai be giv ilo ginau geki i Avoan vev sera sigai lol Ravrava Sabuga, lol ravrava be nu mai nin avoana non ira atatun Vev Sera Sibora.

²¹ Avoan vevsera sigai nin atatu be nu doron be vi vevea, take sinombu be Vui Sabuga mwa domuainira ram bev avoana non God.