2 Korin 9 - Hano Niu Testamen

Buluiana lalai ira Binihi Mwasigi

¹ Mwasigi be mwa hav tu tehe be nav rav ravrava lalai kimiu huri buluiana bului sinombu non God.

² Nam iloe be gim doronia be giv bului. Nan av ravravwega huria lalai sinombu Masedonia, nam bevea lalainira be la ḡereḡeren Kris ran lol vatuvwai be rav hogoi lol taul vwate huba. I nomiu doroniva be giv hogoi nu lolira kera ivusi ram lol vatuvwai mulei be rav hogoi.

³ Take gam hora ira tuamai rituai vai abemiu huri nomai avoan lavoai huri kimiu alun ginau sihav vora te avoan vuroi n̄ano. Nam doronia be kimiu giv lol vatuvwai kunia be nan vevea be giv lol vatuvwai.

⁴ Be ira hei nin sinombu ata Masedonia vi mai maiau i vi habwea kimiu gim hav lol te vatuvwai, kamai gav busbusi bwatun be gam binihimwasigi alumiu. (I kimiu mulei giv busbusi!)

⁵ Nam binihia be nav hora ira tuada be rav mai vai abemiu amua kamai gam siv mai. Rav lol vuvuri bavtutui hogoi be mwa mai nin mwasin lolora be gin tatauleo huria vi to dautau gam siv mai. I hogoi be mwa mai nin mwasin lolora nu hav vora te kea be gim barihai didi hagainia.

⁶ Gov binihi dumwia kungeki be: wani be mwa riv biri kolo vi hara kolo, take wani be mwa rav biri ivusi vi hara ivusi.

⁷ Gaitutuvwai alolomiu mwa du be vi hagainia kunia be nu binihi tuhia lol irubwina be vi hagainia kunia. Gosav hogoi tehe lol ron̄ mwahantai, mulei gosav hogoi tehe bwatun be gam ron̄oe kun be ram ḡorogoroinigo huria. God mwa dabe ihei be mwa hogoi gin samsamwara.

⁸ I God vi lai vatavuha ivusi liua be gom doronia. Kunia gov lai ivusi na ginau duluai be vi dadariha huri vataha rovoga tavuha.

⁹ Nu ravana lol avoan sabuga be, “Mwa lin̄ vuroinia lalai ira hiru. Ginau duluai i mwa lolia nu vavtutu be vi tu rahurahu vai tuai.”

¹⁰ God be mwa hogoi biri huri rivu i bereti be vi ganiana, vi laia lalainigo biri duluai be gom doronia i mwa lolia mwa mauri be vi vora harahara gaivua nin nomiu lolotavuha.

¹¹ Vi lol kimiu giv rosoga lol hala duluai huri be tagaro giv hogoi vuroi. I nomiu hogoi sivi kamai vi lol sinombu ivusi be rav lai avkari lalai God.

¹² Rovoga geki be gim lolia mwa hav bului te sinombu non God n̄an, ita mulei mwa lai avkari gaivua lalai God.

¹³ Dovon̄an nomiu binihimwasigi, sinombu ivusi rav vev roroai God bwatuna be kimiu gim ron̄ maḡemu alun Leo Tavuha huri Kraes, Leo Tavuha be gim bevea be gim binihimwasigi i bwatun be gim bete vuroinia maira i mai atat dodolua.

¹⁴ I batena be ram dataro, kera rav doron be ras togo mai kimiu bwatuna be hogoi gaivua non God nu laia huba lalai kimiu.

¹⁵ Avkariana lalai God huri non hogoi be nu tavuha maragai be tasav te ḡoro dumwia gin avoana vwate.