2 Korin 8 - Hano Niu Testamen

¹ Kadogaha, ira tua, gam doronia be giv ilo huri hogoi tavuha non God duluai be nu laia lalai ira binihimwasigi Masedonia.

² Nu haḡo ron̄ora gin taro ririhai lalavoa, i ram hiruga. Take ram lai hogoi liu bwatuna be ram samsamwara.

³ Nai vev dumwia lalai kimiu be ram laia liua be rav laia dumwia. Atatu vwate nu hav vevea te be rav lolia kunia.

⁴ Take ran hudaligi i ram doron maragai kamai be gov bete maira lol rovoga non God huri sinombu.

⁵ I kera ram laia la hala be gan hav binihia te be rav lol dumwia. Muana ram mahin̄ainira sibora lalai God i lalai kamai. Geki haḡea hano be God mwa doronia.

⁶ Gan hudali Taetus be vi bului kimiu be giv nogoi raumatan rovoga huri vatavuha be kea nu bwativugainia.

⁷ Gin rosoga gin ginau duluai lol binihimwasigi garagusi, lol avoana, lol iloute, alolona be gin doronia mwasigi be giv bului, i lol lolotabetabe gin huhuinia nin kamai. Lol hala n̄an gea, giv wasi mulei lol vatavuha huri hogohogosi.

⁸ Nam hav lai te avoana lalai kimiu be giv hogohogo. Take nam doron be nav gita nomiu lolotabetabe mwasigi be tav dadarihai kimiu maira dodolua be ram doron mwasigi be rai bului.

⁹ Gim ilo huri hogoi non nonda Ratahigi Jisas Kraes. Gim iloe be Kraes kea nu rosoga, take huri kimiu mwa mai gi atat hiruga huri be la halan hiru be mwa laia kimiu giv rosoga.

¹⁰ Geki hano be nam binihia be gis lolia. Taul vwate kimiu muana be gin doron be giv hogoi, i kimiu muana be gin hogoi.

¹¹ Vuvuri nomiu “rovoga” vi dadariha mai nomiu “taritari be giv lolia.”

¹² Be gom doron be gov lai nom hogoi, God vi dame alun nom hogoi, vi vevegiana vi hurin hano be nomwa abena, take vorate ginau be nomwa sigai.

¹³ Gam hav doron tehe be giv habwea vi ririhai batena be sinombu rituai ram hav lol te rovoga hahavwani, take gam doronia be ginau duluai rav togo alun tovtovo gaituvwa.

¹⁴ Lol taro uhu nomiu ivusi. Havanau be nomiu abena giv bului dum atat dodolua be nora sigai. Vuvuri ataguna, be kera nora ivusi, kera rav bului dum kimiu be nomiu sigai, i kunia nomiu duluai rav dadariha.

¹⁵ Nu ravana lol avoan ata tuai be, “Wani be mwa harae liu mwa hav haḡo te liu, sa kunia mulei be wani be mwa hara gaiviha vi vora nona tiri savele.”

Taetus mai ira Buluina ram Bului

¹⁶ Nam avkari God bwatun be nu hagai lalai Taetus tabeana kunia be nu laia lalaiau.

¹⁷ Taetus nu dame ḡoro havanau be gon hudalinia ginia be vi lolia. Kea nu doron maragai be vi mat abemiu, geki mwasin binihina sibona.

¹⁸ Gam hora Taetus mai tuada vwate kea ira binihimwasigi ram hagai maragainia huri non rovoga mai toretore huri Leo Tavuha.

¹⁹ Mulei tuada uhu ira binihimwasigi ran gita luae be vi van mai gida baten be gav hagai hogoi be vatu. Gam lol rovoga geki be gamen lol roroai Ratahigi i ba seserainia be gam doronia mwasigi be gamen bului.

²⁰ Gan gita ḡoro berevai tuara vwate gim av vai alumai la hala be gam haḡo hogoi gaivua geki.

²¹ Gam lol rovoga hahavwani be gav lol havanau be Ratahigi vi dameinia kun be nu vavtutu kunia.

²² Mulei, gam horae maira tuamai, be kea tagaro mwa lol vatuvwai be vi bului. Nu dovon̄ainia lalai kamai huba la hala ivusi, i kadogaha mwa doron maragai be men bului, bwatuna be mwa binihimwasigi maragai kimiu.

²³ Kadogaha huri Taetus kea vwaliuku, kea mwa lol rovoga bul maia be vi bului kimiu. I huri ira tuada rituai ram matu nin ira binihimwasigi, i ram lai sarisari lalai Kraes.

²⁴ Giv seserainia lalainira dovon̄an nomiu lolotabetabe i huri hano higea be gam sasagerega huri kimiu. Vuvuri ira binihimwasigi duluai rav gita dumwia.