2 Korin 7 - Hano Niu Testamen

¹ Ira tuaku, tatauleo uhu lalai gida nin God, tav lol gida siboda be tai melmelo tai maribwesi nin ginau be rav lol rebehida mai atmateda rav bibili. Tav lol ron̄oe be tav sabuga la hala be tam dogo aluna, bwatun be tam binihi marahi God.

Samsamwara non Pol

² Giv havan̄ irubwimiu lalai kamai. Kamai gam hav lol te bahal havanau lalai tuamiu vwate, i gan hav lol te hantai binihimwasigi non kimiu vwate, i gan hav tentene tehe lalai kimiu vwate.

³ Nan hav vevea te kunia be namen av vai alumiu. Nan vevea lalai kimiu amua be nam dabe maragai kimiu be gav togo mai kimiu sa gav mate mai kimiu.

⁴ Nam ron̄oe mwasigi huri kimiu be nam sasagerega huri kimiu. Gim lai lol maḡemu lalaiau, i lol nomai taro ririhai duluai, gan lai samsamwara gaivua.

⁵ Batena be gan mai vai Masedonia gan hav mambu tehe. Gan habwe taro ririhai nu tu dalis kamai. Gan bwalo avare i alolomai gan matagu.

⁶ Take God, be nu lol maḡomaḡora be ran habwe taro ririhai, kea nu lol maḡomaḡo kamai baten be Taetus nu mai.

⁷ Gan lai lol maḡomaḡo, nu hav vora te huri non maiana n̄an take mulei nomiu avoan maḡomaḡo be gin laia sivinia. Taetus nu vevea lalai kamai huri nomiu doroniva be gim doron be gimen gitau i be gim ron̄ mwahantai maragai huri havanau be gin lolia. Kea mulei nu vevea huri gita ḡoro gaivua huriau, i baten be nan ron̄oe, nan samsamwara liu.

⁸ Be noḡu ravrava vi lol kimiu giv ron̄ mwahantai, nam hav ron̄ te mwahantai, huri be mwa lolia gim ron̄ mwahantai, take gim ron̄ mwahantai n̄an huri mahavan vwelvwele.

⁹ Kadogaha inau nam ron̄ mwandavuha, mwa hav vora te huri be nam lolia gim ron̄ mwahantai, take huria be nomiu ron̄ mwahantai mwa lolia gim leahi rahumiu. Gim ron̄ mwahantai la hala be God nu doronia be giv vora kunia, i nu hav vora te kamai be gam lolia be giv ron̄ mwahantai la hala gea.

¹⁰ Lalan̄an ron̄ mwahantai be God mwa doron be vi lol sinombu rav leahi irubwira i rahura. Geki vi tomuainira huri rahuana, i mwa du be gisav ron̄ te mwahantai huria. Take lalaiau ron̄ mwahantai kea be ureure mwa lai mateana.

¹¹ Giv gitae be geki hava ron̄ mwahantai be God nu doronia be giv laia nu lolia lalai kimiu: Nu lol kimiu gim doronia be giv dovon̄ainia be gin hav vahala tehe. Nu lolia gim doron be giv gitau. Nu lolia gim ḡitaḡoro. Nu lolia gim doron mwasin ginau be vi loliana. Mwa dovon̄ainia be gin melmelo ginau vahala sigai.

¹² Nan rav ravrava geki, barabe huri wani be nu lol vahala, sage wani be nu lol vahala lalainia. Take nam ravae be namen lol melmeloinia lolmatan God, huri gitaḡoro gaivua be gim haḡoe huri kamai.

¹³ Bwatuna higea gan ron̄oe i lolomai mwa do mahurigi. Nu hav vora te huria n̄an be alolomai nu samsamwara maragai, take gan samsamwara maragai be gan gita Taetus kea mulei nu samsamwara. Kimiu duluai gin lolia mwa ron̄ mwandavuha maragai.

¹⁴ Nan av ravravwega lalai Taetus huri kimiu, i kimiu gin seserainia be nam bev mwasigi. Ginau duluai be gan vevea lalai kimiu nu mwasigi, i kimiu gin dovon̄ainia be havanau be gan av ravravwega huria lalai Taetus huri kimiu, i kimiu gin seserainia be nan vev mwasigi.

¹⁵ I non lolotabetabe huri kimiu mwa wasi batena be mwa binihi dumwia be gim lol dautau be giv ron̄ maḡemu. Gin lai ḡoḡoe mai binihi marahi i mataguana.

¹⁶ Nan samsamwara maragai be noḡu binihimwasigi alumiu mwa masiri.