2 Korin 6 - Hano Niu Testamen

¹ I gam lol rovoga bul mai God, i gam hudali kimiu be gisav lin̄ te hogoi be gin laira huba nin God be rai van sabwelei.

² Giv roron̄tai God: “Lol taro be taro vi mai be nav lol tavuha lalai kimiu, Nan ron̄ nomiu tataro; Gubwen̄i vi mai be nav varahu kimiu, nan bului kimiu.” Giv roron̄tai! Geki taro be God vi lol tavuha mai kimiu; garigi gubwen̄i be God vi varahu kimiu.

³ Gam hav doron tehe be ihei vi habwe vahalana lol nomai rovoga, be havanau be gam lolia vi mai gi taro ririhai lalai ihei tehe.

⁴ Take la hala duluai gam seserainia be kamai atatun rovoga non God: aluna be gam damei ginau ririhai, i lol hal ririhai lalavoa.

⁵ Ram bivilis kamai i ram dau kamai lol imwa vauvauhi. Gam bisogari maira be ram barihai kamai i ram dau bwatun bwaloana. Gam lol rovoga hahavwani, i mahavan rituai gam hav maturu te dumwi i ginaganiana sigai.

⁶ Gam seserainia be kamai atatun rovoga non God gin rahumai be nu melmelo, nomai iloilon halan ginau, nomai ron̄ mwan̄ava i alen̄ tavuha non Vui Sabuga, gin mwasin lolotabetabe,

⁷ gin avoan mwasigi, i gin muramura non God. Gam haḡo rahuana vavtutu mwa bora tutuḡoro huri kamai sibomai ḡoro ginau duluai.

⁸ Atatu rituai ram dul bonogai vai alumai. Atatu ram bev ginau hahantai vai alumai, take rituai ram bev ginau tavuha. Rituai ram bevea be kamai atatun tenteneana, take kamai gam bev mwasigi.

⁹ Kun be kamai ram hav ilo te kamai, take kera ram ilo tavuhai kamai. Gitanana kun be gai mate, take gam rahu radu. Ram bevegi kamai, take gam hav mate tehe.

¹⁰ Gam habwe ron̄ mwahantai be gaivua, take tagaro gam samsamwara. Gam hiruga, take gam lol sinombu ivusi ram rosoga lol binihimwasigi. Nomai na ginau mwa sigai, take mwasigi be ginau duluai nomai abena.

¹¹ Hano mwa hav tu te ḡoro kamai be gav avo Korin i gam havan̄ rahumai lalai kimiu.

¹² Nomai lolotabetabe huri kimiu mwa hav mambu tehe, take kimiu gim haḡo batugehi nomiu ron̄ova be giv lolotabetabe kamai.

¹³ Nam av mai kimiu kun be kimiu ira mwasin nituku. Giv lolia lalai kamai kunia be gan lolia giv havan̄ rahumiu lalai kamai.

Avoan dau hurira be ram hav Vora te Atatun Kraes

¹⁴ Kimiu gis hav vora kunira be ram hav binihi te mwasigi. Gisav bulu te sibomiu maira. Tavuha mai hantai ramuru hav to te ute gaituvwa. Gigita i metmeto ramuru hav bul te gaituvwa.

¹⁵ Kun hanigi be Kraes i Belial be atmate, raru vi dame ute gaituvwa? Hanigi atat binihimwasigi vi damei ginau mai wani be kea mwa hav vora te atat binihimwasigi?

¹⁶ Imwan God sihav damei te dum mai nun Vatu, i gida imwan God rahu. God nu vevea be, “Nav togo maira i nav lago maira, Nai vora nora God, i kera rai vora noḡu sinombu.”

¹⁷ God mwa bevea kunia, “Giv visdagai nin sinombu kera gea, i giv hara bora. Gisav sibweri te hano be ran hav melmelo tehe, kunia inau nav laiḡoḡo kimiu.”

¹⁸ “Inau nai vora Tamamiu, i kimiu giv vora ira nituku, God mwa bevea kunia.”