2 Korin 5 - Hano Niu Testamen

¹ I tam iloe huba be rebehida kea kun imwa haohao be tam do alolona teti lol ureure vi lolian kaburai. Take batena be vi nogo, God kea vi lol imwa vwate lalai gida. Sihav vora te imwa be liman atatu vi lolia: Lol tanon rebehi gea vi vora tanoi vwate amare be vi togo vai tuai.

² Take kadogaha tam ron̄ mwahantai lol imwa gea. Tam doron be God vi lai tanoi gea lol ute ata amare lalai gida.

³ Bwatuna be vi vora gavuda, i tasav to te vuroi.

⁴ La mahavana be tam do lol rebehi geki, tam habwe taro ririhai, i tam ron̄oe. Tam hav doron tehe be tav to vuroi, take tam doron be tav saga ḡoro gida lol rebehi ata amare. Vuvuri rebehi geki be vi mate vi gagavu gin rahuana.

⁵ Geki haḡea huri hano be God nu lol gida, i nu lai lalai gida Vui kun be tatauleo huri rahuan gara geki.

⁶ Tav tu wasi, tam iloe be tam dogo lol rebehi uhu, gida hautu nin God.

⁷ Tam rahu alun havanau be tam binihimwasigi garagusi aluna, take mwa hav vora te alun hano be tam ḡita dumwia.

⁸ Pol mwa bevea be, tasav matagu tehe. Tam doronia mwasigi be tav mwalue nin rebehi uhu i tav togo lol mwasin imwanda aben God.

⁹ Gatavada gaituvwa n̄an be tav lol samsamwarai God be tam do teti sa amare.

¹⁰ Bwatuna be gida duluai tav tu la lolmatan Kraes be vi harahara lalai gida. Gida gaitutuvwai mwa du be tav lai havanau mwa du be tav lai dumwia, tavuha sa hantai huri ginau be tan lolira teti lol ureure mai rebehida.

Tav mai gi Atat Tavuha non God

¹¹ Huri be tam iloe huba huri binihiva be rav gogonai God, tan lol ron̄oe be tai bului sinombu be rav lai ḡoḡo mwasigi huri gida. God mwa ilo didinigi gida, i nam doronhohov be lol lolomiu kimiu mulei gim iloe.

¹² Gam hav lol ron̄oe tehe be gamen habwe seserai kamai mulei sibomai, take gam bev kamai sibomai lalai kimiu. Huri be giv ron̄ mwandavuha gin kamai. Kunia kimiu nomiu avoan vwaliu abena, lalainira be ram av lavoai huri ginau n̄an be ram ḡita dumwia take ran hav lai te binihiva maragai alun ginau ata lol irubwi.

¹³ Be binihimai ran sala, kea huri God. Take be binihimai mwa bavtutu, kea huri kimiu.

¹⁴ Lolotabetabe non Kraes mwa haḡo bul gida, bwatun be gam iloe be kea nu mate huri atatu duluai. Kera duluai rav mate lol Kraes.

¹⁵ Kraes nu mate huri atatu duluai, be kera be ram rahu rasav togo te hurira sibora tagaro. Kraes nu mate hurira i nu tomare mulei nin mateana huri be rav rahu huria.

¹⁶ Nin kadogaha mwa bano gam hav binihi te huri ihei kunia ureure mwa binihia. Amua gam binihia huri Kraes kunia be ureure nu binihia, take kadogaha gam hav mom binbinihi te kunia.

¹⁷ Be ihei kea bilan Kraes, kea mwa mai gi atat gara. Rahuan ata tuai mwa nogo. Ginau duluai ram mai gara.

¹⁸ Ginau duluai kera geki ram mai nin God. Sivi Kraes, God mwa lol tamwata lol davolada maia sibona, i mwa lai lalai gida rovoga be tai vevea lalai atatu duluai huri tamwata be tav laia nin God.

¹⁹ God kea lol Kraes, mwa lol tamwata lol davolan ureure i kea sibona. Lol Kraes, God nu hav haḡo te wasi ureure be vi ron̄oe be mwa bahala lol bwatigoro, i nu lai lalai gida roroi geki huri tamwata.

²⁰ Gam bora horata be gai vevuri huri Kraes. Kea kun be God mwa uloi kimiu sivi kamai. Kamai gam avo huri Kraes: batena be gam hudali kimiu be giv to lol tamwata mai God.

²¹ Kraes kea non bwatigoro sigai, take God nu lolia mwa mai kun be atat bwatigoro huribe sivi Kraes tav mai bavtutu dum mulei mai God.