2 Korin 4 - Hano Niu Testamen

Toretore huri Leo Tavuha

¹ God gin non sine hagavi, nu lai rovoga geki lalai kamai be gav lolia, i gosav lin̄ia tehe.

² Take gan van burigai ginau dahuligi be ram lol hal busbusi. Gam hav lol te hal tentene, i gam leahi te silo vagahi non God. Gam bagahi mwasigi be nu vavtutu, gam seserai kamai lalai sinombu duluai be kamai ira ihei. Vuvuri

³ Be Leo Tavuha be gim doretore hurira binihiva huria mwa hili, mwa hili n̄an lalainira be ram sala.

⁴ Setan be mwa lalaḡoi ureure uhu mwa lol binihiva ram matagaraga. Kera be ram hav binihi te mwasigi. Rasav gita te dum gigitan Leo Tavuha. Leo Tavuha huri sarisarin Kraes, kea gaituvwa n̄an mai God.

⁵ Gam hav toretore te huri kamai sibomai, take gam doretore be Jisas Kraes kea Ratahigi i kamai nomiu atatun rovoga huri Jisas.

⁶ God nu vevea be, “Giv lin̄ gigita vi sarisari lua lol metmeto! Geki God n̄an be nu lol gigita mwa sarisari lol loloda mwa lin̄ gida tam ilo huri sarisarin God kea be lolmatan Kraes.”

Hogoi Tavuha be ram duḡoro lol Tanon Wai be nu Loliana gin Tan Malagoba

⁷ Kamai nomai na hogoi tavuha uhu nin God, take kamai kun tanon wai be tan malagoba be mwa dau ḡoḡo na hogoi tavuha alolona. Geki mwa seserainia be muramura gaivua mwa mai nin God, mwa hav vora te nin kamai.

⁸ Gam habwe taro ririhai vataha ute dalis kamai, take ram hav lai te kamai. Gam len̄a be gav lol hano, take gam hav lin̄ te nomai doronhohov huri rahuana.

⁹ Ram wehi bonogai kamai, take God mwa hav derai te kamai. Vaivusi gam ron̄ mwahantai, take mwa hav lol te kaburai kamai.

¹⁰ Gam datal mateanan Jisas lol rebehimai sibomai huri be rahun Jisas vi gitan dumwi alun rebehimai.

¹¹ Gam rahu radu gam dogo, take huri Jisas tagaro gam habwe taro ririhai huri mateana huri be rahun Jisas vi gitan dumwi alun rebehimai be mwa mate.

¹² Haḡe mateana mwa lol rovoga alolomai, take rahuana mwa lol rovogamai.

¹³ Nu ravana lol ravrav sabuga be, “Nam binihimwasigi, i kunia nam bevea.” Nonda binihimwasigi garagusi kunia mulei. Gam binihimwasigi, i kunia gam bevea.

¹⁴ God nu ragas Ratahigi Jisas nin mateana, i gam iloe mulei be God vi ragas kamai mulei mai Jisas. God vi lai kamai ute gaituvwa mai kimiu, i gida duluai tav tu lolmatana.

¹⁵ Ginau duluai kera geki huri kimiu. Kunia hogoi non God be nu laia lalai sinombu duluai vi lai avkariana gaivua lalai God lol non sarisari.

Togoana lol Binihimwasigi Garagusi

¹⁶ Bwatuna gea binihimai mwa hav hovi tehe, haḡe gam hav lin̄ te rebehimai be rav metuaga i rav mandamanda, take vui alolomai mwa lol kamai gam ḡara vataha gubwen̄i.

¹⁷ Gam habwe taro ririhai kokolo huri mahavana kadogaha, take ram bului kamai be gav lai dum sarisari vai tuai kea haḡea ginau gaivua lalai kamai liu taro ririhai.

¹⁸ Gam hav tau te nomai binihimwasigi alun hano be matamai mwa ḡitae, take alun hano be gam hav gita te dumwia. Hano be tam ḡitara rav tu mahavan vwelvwele n̄ano, take hano be tam hav gitae tehe kea vi rahurahu vai tuai.