2 Korin 12 - Hano Niu Testamen

Raumatan Vatavuha lol Rahun Pol

¹ Mwa du be nav av ravravwega rahurahu. Sihav bului tehe, take nav avo kadogaha huri visirai i seserai nin Ratahigi.

² Nam ilo atatu lol Kraes kea nu laiana vai lol gaitolun ute ata amare taul han̄vul domwan gaivasi be nu ḡao huba. Nam hav iloe tehe be daga wani gea nu hae mai mwasin rebehina sa nu mwalue nin rebehina, take God mwa iloe.

^3-4 Nam iloe be wani uhu nu hae vai amare Abanoi. Nam len̄a be nu hae mai rebehina sa nu mwalue dagai nin rebehina, take God mwa iloe. Kea nu ron̄ dum ginau be sihav vev te dum halana, ira ginau be vihogoi rasav vev te dum halana.

⁵ Nu av sasagerega huri atatu be kunia, take nasav av te sasagerega huriau siboku, huri noḡu mandamanda n̄ano.

⁶ Take be nav doron be nav sasagerega huriau siboku, nasav vora te daloi, bwatuna be nai vev mwasigi. Take nasav sasagerega tehe huriau siboku. Nam hav doron tehe be sinombu rav binihiau liua be nam bevea.

⁷ Huri be nasav sasagerega tehe huri ginau tavuha kea be ran seserainia lalaiau, ginau vahala be mwa ḡaras maragai rebehi nu hagainia lalaiau. Ginau vahala kea horata nin Setan, nu horana mai be vi haraviau i vi lol ḡoroau huri be nasav sasagerega te liu.

⁸ Nan hudali Ratahigi vatolu be vi lai dagai vahalana geki niniau.

⁹ Take nu vevea lalaiau be, “Noḡu hogoi kea nu dadariha hurigo. Batena be gom mandamanda, noḡu muramura mwa mai melmelo alolomwa.” Kadogaha nam ron̄ mwandavuha be namen vev lua noḡu vahalana, huribe muramura non Kraes vi togo aloloku.

¹⁰ Haḡe nam samsamwara be nav sasagerega huri noḡu mandamanda, ram av leileiau ram lai taro ririhai lalaiau, nam ron̄ḡagarasi, i lalan̄an taro ririhai huri Kraes. Bwatuna be batena be nam mandamanda, vuvuri nam wasi mwasigi.

Binihivwasi non Pol huri ata Korin

¹¹ Nam avo kun daloi, take kimiu haḡea gim lolia nam lolia kunia. Kimiu haḡea be mwa du be gis vev ginau tavuha huriau. Inau nam mai gi ginau vuroi, take kera “ira hala lavoa” be lalavoa ram hav dadariha te n̄an maiau!

¹² Batena be nan togo mai kimiu, nan haḡo alen̄ n̄ava be nan lol ginau be ran dovon̄ainia be inau hala vwate dovon̄ana, ginau dan̄an̄a i lagoan dadaligi.

¹³ Haḡe kimiu gin lai ginau duluai be ira binihimwasigi rituai ram laira. Ginau gaituvwa dolua: Nam hav vora te marahin rovoga lalai kimiu, giv binihi kaburai vuroku huria!

¹⁴ Kadogaha nam lol dautau be nav mai abemiu vatoluna, i nasav vora te marahin rovoga lalai kimiu. Nam hav doron te havanau nin kimiu, take kimiu haḡea. Naturigi mwa hav doron tehe be rav lol ḡoḡo huri be rav hogoi lalai ira tamara i ratahira. Tama i ratahi rasav lol te ḡoḡo huri be rav hogoi lalai ira nitura.

¹⁵ Haḡe nam lol samsamwara be nav lai ginau duluai be noḡu, lalai kimiu, vaivotu inau siboku. Be nav tabe kimiu liu, ke kimiu giv tabeau halatena.

¹⁶ Nu melmelo be nam hav vora te marahin ginau lalai kimiu, take kimiu gim binihia be nam ruruhi kimiu, i nam dentene be nav haḡo batugehi kimiu.

¹⁷ Matu nan ruruhi kimiu be nam hora atatun vevsera rituai vai abemiu? Sigai, gim iloe be nan hav lolia tehe kunia be nan vevea.

¹⁸ Nan hora Taetus be vi mai vai abemiu, i nan hora tuamai maia. Taetus kea nu hav ruruhi te kimiu, sa nu ruruhi kimiu? Gim iloe be Taetus i inau binihimaru gaituvwa n̄ano i alen̄amaru gaituvwa n̄ano?

¹⁹ Gim binihia be gan lol ḡorogoro kamai sibomai lalai kimiu lol taro duluai? Gan avo la ihan Kraes i la lolmatan God. Kimiu sosori maragai gin irubwimai, i ginau duluai be gam lolia be vi lol kimiu giv wasi.

²⁰ Nam binihi gairuruai be batena be nai mai, berevai gim hav vora te kunia be nam binihia be vi vora kunia, i inau nasav vora te atatu kunia be gin doroniau be nai vora kunia. Nam hen binihi gairuruai alolomiu be sigai ta vigaigaiana, binbinihi hantai, lolhoro, bwaloana, bugurana, avoan bibili, hun̄ahun̄a, binihiv sage, i vi len̄len̄aga.

²¹ Nan hen matagu be batena be nam mai vai abemiu mulei, noḡu God vi lolia nai busbusi lol matamiu. Bisata nav ron̄ mwahantai ginia ivusi be ram lol bwatigoro bwatun be ram hav leahi te rahura sa be rai van burigai nin bwatigoro be ram bulu gin rebehira i ginau ivusi be ram lolia.