2 Korin 11 - Hano Niu Testamen

Pol maira Hala Tentene

¹ Nam binihia be gis haḡo alen̄ maḡemu maiau gaituvwa batena be nam dadaloiga tirigi, take gim lolia huba kunia.

² Nam ḡitaḡoro kimiu gi gita ḡoro be mwa mai nin God. Nan tatauleo be nav hagai kimiu lalai Kraes, kun be kea n̄an ahoai. Nam doron be nav hagai kimiu be vavin melmelo.

³ Take nam matagu be binihimiu rav sala dagai nin halamiu mwasigi i hal melmelo be gim huri Kraes kunia be teltele nu ruruhi Iv mai non hal hahantai.

⁴ Gim haḡo alen̄ mahuri mai ihei be mwa mai vai abemiu i mwa doretore huri Jisas dolua nin vwate be kamai gam toretore huria. Kimiu gim doron maragai be giv damei Vui sa Roroi Tavuha be dolua nin Vui i Leo Tavuha be gin laia huba nin kamai.

⁵ Nam hav binihia tehe be kera, “ira hala lavoa” kera ran tavuha liuau.

⁶ Mandovai nan hav huhui te halan avoana, take nam ilo ute. Gan seserainia geki nu melmelo lalai kimiu la hala duluai.

⁷ Nan toretore huri Leo Tavuha non God lalai kimiu voliku sigai. Nan lolia siboku kun be nan hav vora te muai atatu be kimiu giv vora muai atatu. Gim binihia be kunia nu vahala?

⁸ Nan dame huri volimiu ira binihimwasigi dodolua, nan lai nora na vatu huri be nav lol rovoga mai kimiu.

⁹ Be nas doron ginau batena be inau mai kimiu, nan hav lol te bidoi kimiu. Ira tuada be ran mai nin Masedonia kera ran lai ginau duluai be nan doronia. Nan hav doron tehe be nav butu alumiu la hava hala tehe i nasav butu tehe alumiu.

¹⁰ Atatu vwat sigai la ḡeren Kris be vi tuḡoroau be nasav av te sasagerega huria. Geki nam bevea gin mwasigi non Kraes aloloku.

¹¹ I huri hano be nam hav butu tehe alumiu? Gim binihia be bwatun be nam hav tabe te kimiu? God mwa iloe be nam dabe kimiu.

¹² I nav lol rahurahui havanau be nam lolia kadogaha, bwatun be nam doron be nav tu ḡoro sinombu kera gea be ram sagera. Ram doron be rai vevea be rovoga be ram sasagerega huria kun nomai n̄ano.

¹³ Kera gea ram hav vora te mwasin ira hala take kera atatun rovoga be ram dentene. Ram leahira sibora gitanara kun be ira hala non Kraes.

¹⁴ Geki mwa hav lol te kamai be gav dan̄an̄a. Matu Setan nu leahia sibona gitanana kun enjel huri gigita.

¹⁵ Mwa hav lol te kamai be gav dan̄an̄a, be Setan atatun non rovoga mulei rav lolira sibora gitanara sibora rai vora kun atatun rovoga non vavtutu. Take nogonana rav lai vevegi huri hano be tam lolia.

Pol mwa Bevea huri non Ron̄ Ḡagarasi

¹⁶ Pol mwa bevea be nam bev muleinia lalai kimiu: ihei sihav binihia tehe be inau taltaleana. Take be giv binihia kunia, giv laiḡoḡoau kun be gis lai ḡoḡo daloi vwate. Vuvuri inau nav av ravravwega tiri kolo mulei.

¹⁷ Batena be nam av ravravwega, bwatuna be nam ron̄ batoia aloloku siboku, nam hav avo te kun be Ratahigi si avo take kun be daloi vwate.

¹⁸ Sinombu ivusi lol ureure ram av ravravwega huri rahura lol ureure. Haḡe inau mulei nav av ravravwega.

¹⁹ Kimiu gin mataisaoga, i giv samwara be gimen haḡo alen̄ n̄ava mai daloi!

²⁰ Matu gim haḡo dum alen̄ n̄ava maira be ram hora kimiu gim dalisi, sa ram haḡo kimiu, sa ram ruruhi kimiu, sa ram binihia be kera ran tavuha liu kimiu, sa ram dutui kimiu lolmatamiu.

²¹ Ginau busbusi lalaiau be nai vevea kunia, take gav “mandamanda” maragai be gav lol ginau kera gea lalai kimiu! Take be ihei tehe be nu muramuraga dadariha be vi sasagerega, kunia, inau mulei nav butu i nav sasagerega. (Nam avo kun be daloi)

²² Matu kera ata Hibru? Inau mulei? Matu kera ata Israel? Inau mulei. Matu kera nin varan Ebraham? Inau mulei.

²³ Matu kera atatun rovoga non Kraes? Inau nam lol rovoga huria liu. Nam av daltale kungeki, nam lol rovoga hahavwani liura. Nan togo lol imwa vauvauhi tagaro liu. Ran lol ḡagarasiau vaivusi liua be ran vivilisiau. Nu abena be nai mate vaivusi.

²⁴ Valima be, varan ira Jius ran vivilisiau gin gao n̄avul gaitolu domwan gaisivo.

²⁵ Vatolu be ran taliau gin gai. Vatuvwa be nu abena be ras voha bamateau gin vatu. Vatolu nan togo lol waḡa be ran hae la mwalo, i lol taro vwate alolora be nan togo lol tahi bon̄i hava mwa rani.

²⁶ Vaivusi lol lagoana lol taro hantai nin wailuluvi, nin ira atat surasura, nin mwasin noḡu sinombu, nin ira Lolobon̄i. Nan habwe taro hantai lol ira bwatutun vanua, lol vanua vuroi, i lol tahi i taro hantai mai ira binihimwasigi tentene.

²⁷ Nam lol rovoga be nu ririhai i nu savsavi, i vaivusi nan hav maturu te dumwi. Maro nu gasiau i nan mandou, i vaivusi be nan hav gan te dum ginau nan maturu vuroi. Nan hohoga i gaisagaku nu sigai.

²⁸ Gin ginau duluai kera geki, vataha gubwen̄ binihiva huri ira binihimwasigi duluai marahin binihiva huria mwa do amare aluku.

²⁹ Batena be tuara vwate mwa beuga inau mulei nam ron̄ mwahantai, i nam lolovono tagaro be atat vwate mwa hovi lol bwatigoro.

³⁰ Be mwa du be nav av sasagerega, nav av ravravwega huri ginau be mwa seserainia be inau nam mandamanda.

³¹ God mwa iloe be nam hav vora te tenteneana. Kea God i Taman Ratahigi Jisas Kraes, i kea haḡea be vi lai avkari vai tuai.

³² Batena be inau Damaskas, lavoa ḡoro halaten King Aretas nu doronia be vi vwirihiau, haḡe nu tau ira gitaḡoro daldalis bwatutun vanua.

³³ Take ira tuaku ran lin̄iau alolon gete gao volae sivi lulu la ute bwatun aran bwatutun vanua. Haḡe nam rov maragai nin Lavoa ḡoro.