2 Korin 1 - Hano Niu Testamen

Pol mwa Bwaliu Avoana be ram mai vai Aluna

¹ Nin Pol hala non Kraes Jisas. Inau horata bwatuna be kea haḡea hano be God mwa doroniau huria. Mulei nin Timoti tuada lol Kraes. Lalai uloilua non God Korin, i lalai sinombu non God duluai vataha ute la ḡereḡeren Kris.

² Hogoi i tamwata lalai kimiu, nin God tamanda i ratahigi Jisas Kraes.

Pol mwa Avkari God

³ Avoan avkari lalai God i lalai taman nonda ratahigi Jisas Kraes. God kea Tata be nu masiri gin sine hagavi i avoan maḡomaḡo.

⁴ Kea mwa lol maḡomaḡo gida vataha taro ririhai, kamai gav av maḡomaḡo dumwira kunia n̄an be God mwa av maḡomaḡo kamai.

⁵ Gam bete lol gagarasi non Kraes ivusi. La hala n̄an gea, lol maḡomaḡo gaivua mwa mai lalai gida sivi Kraes.

⁶ Be tav habwe taro ririhai, kea huri nomiu lol maḡomaḡo i varahuva, be kamai gam lai lol maḡomaḡo kimiu mulei giv lai lol maḡomaḡo. Kea mwa bului kimiu be giv dame ḡoro gin maḡemu ron̄ ḡagarasi be mwa dum kamai.

⁷ Nomai doronhohov huri kimiu nu wasi, gam iloe huri be kimiu gim bete mai kamai nomai ron̄ ḡagarasi duluai be mwa dum kamai i mulei lol maḡomaḡo be gam laia.

⁸ Ira tua, gam doron be kimiu giv ilo huri taro ririhai be ram dum kamai Esia. Gam habwea nu marahi liu aia liu tovotovon nomai muramura. Gam derai kaburai nomai doronhohov huri rahuana.

⁹ Mwasigi maragai be lol irubwimai gam binihimwasigi be gai mate. Take geki mwa loli huri be gasav butu te alumai sibomai take alun God n̄ano, kea nu ragas sinombu nin mateana.

¹⁰ God nu varahu gida huba nin hantai gaivua uhu, i vi varahu rahurahui gida radu. Tam dau nonda doronhohov aluna, i kea vi varahu mulei gida.

¹¹ I kimiu giv bului dum kamai gin nomiu tataro. Vuvuri sinombu ivusi rav lai avoan avkari huri kamai huribe God mwa batavuhai kamai bwatuna be alun nora tataro ivusi.

Taritari non Pol mwa Leahi

¹² Geki hano be gam ron̄ mwandavuha huria, i nai vev dumwia gin binihi melmelo be: lol ginau duluai be gan lolira huba lol ureure, liuhage mai kimiu gan vavtutu i gan mwasigi lol irubwi huri God. Gan lol dumwia gin hogoi non God, nu hav vora te gin mataisao be ureure mwa do maia

¹³ Gam rav ginau n̄an lalainigo be gov vasogoe i gov ilo dumwia.

¹⁴ I nam doronhohov be giv ilo dum ginau duluai huri kamai, vuvuri giv siv doron kamai, kunia kamai gav ilo huri kimiu la hala be Ratahigi Jisas Kraes vi mai mulei.

¹⁵ Nam binihimwasigi geki duluai be nan lol ira taritari be nai votui kimiu amua be giv vatavuha varuana.

¹⁶ Nan lol taritari be nai votui kimiu la halaku vai Masedonia i batena be nav tabagilu. Nan doron buluiana nin kimiu huri halaku vai Judia.

¹⁷ Gim binihia be nan lol taritari tentene? Sa kimiu gim binihia kun be nan lol taritari kunia be ureure mwa lolia, be nai vevea be uwe, uwe kunia mulei nai vev dumwia be sigai.

¹⁸ Take be gim binihimwasigi mulei be hano be gam bevea sihav dumi tehe be uwe i sigai.

¹⁹ Nitun God, Jisas Kraes, kea be Sailas i Timoti i inau nan toretore lalai kimiu nu hav vora te uwe i sigai. Lol Kraes kea uwe n̄ano.

²⁰ Uwe, huri tatauleo non God duluai, kea Kraes, i sivi Jisas Kraes tam bevea be uwe huri sarisari God.

²¹ Giv iloe be, God gaituvwa be nu tau kimiu i kamai tam bulgaituvwa lol rahuana mai Kraes. God nu tau gida non ira sinombu gitalua,

²² i nu tau non dovon̄a aluda, be vi dovon̄ainia be gida bilana, i nu tau non Vui Sabuga lol irubwida be vi vora dovon̄ana huri non tatauleo duluai.

²³ Nam bevea kungeki lalai kimiu, i nan navohi God be kea vivora noḡu matgita be geki mwasigi bwatuna huri hano nan hav tabagilu te mulei vai Korin, huri be gisav lai te vevegi sa ron̄ mwahantai.

²⁴ Gam hav lol te ron̄oe be gav lol ḡoro nomiu binihimwasigi; gam iloe be gim du wasigi lol nomiu binihimwasigi garagusi. Take kamai atatun rovoga mai kimiu huri nomiu ron̄ mwandavuha.