1 Timoti 6 - Hano Niu Testamen

¹ Kera be turin rovoga non Kraes, mwa du be rav binihi marahi nora ratahigi huria be atatu vwate sihav avte vai alun ihan God i nonda silo vagahi.

² Ira turin rovoga be nora ratahigi i ira binihimwasigi rasav binihi te marahinira hivhivo huri be kera atat binihimwasigi. Rav lol rovoga lalai nora ratahigi vi tavuha liu, bwatuna be ram bului ira binihimwasigi be ram dabera. Gov vagahi i gov toretore huri ginau kera geki.

Vagahi Tentene i Roso Mwasigi

³ Ihei be mwa lai silo vagahi dolua be mwa hav dadariha tehe mai silo vagahi non nonda Ratahigi Jisas Kraes i silo vagahi be mwa seserai matan halan rovoga mai God.

⁴ Wani gea nu masiri gin sagere i mwa ilo halan ginau vwate, take mwa haro mai doroniva huri vigaigaiana i bwaloana huri avoana. Geki mwa lai binbinihi hantai, bwaloana, avoana vai alun atat dodolua butuana,

⁵ sinombu kera geki ram bigaigai vataha mahavana. Binihira ran hantai i ram salai mwasigi. Ram binihia be lalaḡova lalai tagaro kea hala be rav rosoga.

⁶ Lalaḡova lalai tagaro kea hala vwate be atatu vi rosoga maragai, be tav ron̄oe be mwa mahuri lalai gida gin hano be tan laia huba.

⁷ Tan hav vora tehe mai ginau vai mai lol ureure, kunia mulei tav tabagilu vuroi.

⁸ Take, be gada ginaganiana i gaisagada, tav ron̄ mahuri ginira.

⁹ Kera be ram doron be rai mai gi atat rosoga ran lai ḡoḡo kalkaliana vai alura sibora i ram saḡa alun visi. Ram doron doroniv taltale ivusi be rav lol hantai ginau be ram lol bwarebwarea, i ram lol kaburai sinombu.

¹⁰ Doroniva huri homu mwa bwativugai lalan̄an Vui hantai duluai. Sinombu rituai ram lin̄ binihimwasigi garagusi, bwatuna be ram bwativugai taro ririhai i ron̄ mwahantai lalainira sibora.

Ginau rituai be vi Binihian Dumwi

¹¹ Take giḡo, atat non God gov romaragai nin ginau kera gea. Ninia gea, gov togo la hal vavtutu, lol rovoga lalai God, haḡo binihimwasigi garagusi, lolotabetabe, alen̄ mahuri i alen̄ maḡemu.

¹² Bwalo gin bwaloan tavuha gin binihimwasigi garagusi, ḡamus batugehi alun rahuana kea be mwa du rahurahu vai tuai. Nu uloinigo be gov haḡo rahuana gea batena be gon seserai lua tavuhainia lolmatara kera ivusi.

¹³ La lolmatan God, kea be mwa lai rahuana lalai ginau duluai, i alun Kraes Jisas, nam lai avoan wasi lalainigo. Kraes Jisas nu vev lua tavuhainia batena be nu tu lolmatan Pontus Paelat.

¹⁴ Gov lol hano be nan vevea lalainigo i gov haḡo wasinia vai votu be nonda Ratahigi Jisas Kraes vi mai mulei.

¹⁵ God vi lolia vi loli lol mwasin tarona. Kea n̄ano gaituvwa God gabe nu sabuga. Kea Ratahigi alun Ratahigi i Ratahigi lavoa alun ira Ratahigi lavoa.

¹⁶ Kea n̄an gaituvwa be mwa hav mate tehe. Mwa dogo lol gigita be nu sarisari be atatu sihav van te dum sosoria. Atatu vwate nu hav gita te God, sa ta sav gita te dumwia. Tataro be gogonai i muramura non God vai tuai tuai. Amen.

¹⁷ Vevea lalainira be ram rosoga gin ginau ata lol ureure geki be rasav sasagerega tehe. Vevea lalainira be rav doronhohov lol God, take sihav vora te alun roso be ram len̄a. God mwa hogoi tavuhai hogoi duluai lalai gida gin samsamwara.

¹⁸ Goi vevea lalai sinombu rosoga be rav lol lalaḡov tavuha, be rav rosoga be rasav bugura tehe, i rav lol vatuvwai be rav hogohogo lalai atat dodolua.

¹⁹ Rav lolia kunia, rav lol ḡoḡo mwasin roso hurira sibora gi bwatbwatun ara vatu vainon̄oiha. Vuvuri rav haḡo dum rahuana be mwasin rahuana.

²⁰ Timoti gov gitaḡoro havanau be God nu taua huba alumwa. Gov tu dagai nin alen̄ taltale, avoan hahantai i nin vigaigaiana huri hano be mwa uloiana be, “iloute.”

²¹ Ginia ram bevea be ram “iloute,” rituai ram bahal mwasin binihimwasigi garagusi. Hogoi non God vi togo mai kimiu.