1 Timoti 5 - Hano Niu Testamen

Silo huri Togoan Bulbulu mai atat Dodolua

¹ Gosav avo te gin lolhoro lalai atat metuaga, take avo lalainia kun be kea tamamwa. Gov avo mai ira malaḡelo kun be ira tua.

² Ira vavin metuaga kun be ira ratahi, i ira daulato kun be ira hogosi. Gov lol maira lol hala be nu melmelo tagaro.

³ Gov gitaḡoro ira bwero kera be mwasin ira bwero.

⁴ Take ira bwero be ira nitura sa ira nitun nitura abena, lin̄ira muana rav huhuinia be rav lol nora rovoga lalainira ata lol imwara sibora i rav tavwe ira tamara i ratahira sa nora gitaḡoro. Kea mwa lol God mwa samsamwara.

⁵ Mwasin bwero, be mwa do gahena, mwa dau non doronhohov alun God i mwa dataro ḡaoḡao lalai God bon̄i i lol ute rani mwa hudali buluiana non God.

⁶ Take bwero be lol rahuna mwa lol ginau kun be mwa doron be men ron̄ mwandavuha, kea nu mate mwasigi be mwa rahu radu.

⁷ Vev serae lalai ira binihimwasigi be rav lol ginau kera geki huri be atatu rasav av te vai alura.

⁸ Ihei tehe be mwa hav gitaḡoro te rahun ira havana sibona, liuhage ata lol mwasin imwana, kea mwa ban burigai binihimwasigi garagusi i kea nu hantai liu wani be mwa hav binihi te mwasigi God.

⁹ Iha be vi eno bulus ihan ira bwero, vavine be tauluna n̄avul gaiono mwa hae amare. Vavine be mwa ḡogonai ahoana.

¹⁰ Vi iloana mulei na non rovoga tavuha, rovoga be nu gitaḡoro tavuhai ira nituna, nu laiḡoḡo ira tausala, nu bwaga lolonen atat sinombu non God, nu buluira be ran togo lol taro ririhai, i nu lin̄ rahuna be vi lol lalan̄an rovoga tavuha.

¹¹ Gosav tau te ihan ira bwero be vavin bweihe lol ihara bwero bwatavwe. Ataguna be ram lin̄ira la ihan Kraes, vuvuri ram ban burigainia bwatuna doroniva non rebehira, haḡe ram doron lagiana mulei.

¹² Vi vevegira huri hano be ran tatauleo be rav lolia muana take ram hav lolia tehe.

¹³ Kunia mulei, ram huhuinia be rav sabwelei nora taro, ram batvataha imwa. Ram hav sabwelei te nora taro n̄an take mulei ram dau bwatuna ram hun̄ahun̄a i ram habwe sibora nin atat dodolua be ram daura sibora la rovoga hahavwani, ram bev ginau be mwa du be rasav vevea tehe.

¹⁴ Haḡe nam doronia be ira bwero bweihe rav lagi, rav bav naturirigi, i rav gitaḡoro imwara sibora. Kunia ivwalu halan nora vi sigai be rav av vai alura.

¹⁵ Take rituai ran van burigai huba ram huri Setan.

¹⁶ Haḡe be ihei vavin binihimwasigi, bwero alolon imwana, kea vi gitaḡoroe mau sibona. Mwa hav tu tehe be uloilua vi gitaḡoroe. Haḡe uloilua vi gitaḡoro dumwira be mwasin ira bwero.

¹⁷ Ira tomuai be ram domuai tavuha uloilua rav lai tanon binihi marahi amare liu, liuhage hurira be ram lol rovoga hahavwani gin avoana i silo vagahi.

¹⁸ Bwatuna be avoan sabuga mwa bevea be, “Batena be buluk mwa lol rovoga lol umwan koni gisav gagav te ḡoro bwan̄ona be giv lol ḡoroe be vi gania,” “Atatun rovoga mwa du be vi laiana na tavwena.”

¹⁹ Gisav roron̄tai te ihei be, mwa av vai alun tomuai vaivotu be atatu gairua sa gaitolu ran gitae.

²⁰ Giv vevea lalainira be ram dogo lol bwatigoro be ram bahala. Vevea kunia lolmatan sinombu duluai lol uloilua huria be vi mamatara rituai mulei.

²¹ Lolmatan God i lolmatan Kraes Jisas i ira enjel, nam bev wasinia be gov lol ginau kera geki, gosav lai te mai ihei la hava hala tehe.

²² Gov binbinihi tavuha amua gim siv tau limamamwa alun bwatun ihei tehe, i gosav hovi tehe lol vuro non kera dodolua. Gov gitaḡoro be gov melmelo.

²³ Gosav mwin te wai vuroi, take gov mwin waen kolo be vi bului tabwan̄imwa i vi buluigo lol harova tagaro.

²⁴ Bwatigoro non sinombu rituai nu maron̄ron̄o be vi gitan dumwi vuvuri mwa sivora silo vevegi, take vuron kera rituai vi siv gitan batoi atagu.

²⁵ Haḡe kunia mulei rovoga tavuha nu maron̄ron̄o be vi gitan dumwi, take kera mulei be mwa hav gitana te dumwi rasav hili tehe.