1 Tesalonaeka 5 - Hano Niu Testamen

Lol Vatuvwai huri Maiana non Ratahigi.

¹ Kadogaha, ira tuaku, gam hav doron tehe be gav ravae lalai kimiu huri tarona i gubwen̄ina be vi mai mulei.

² Gin ilo tavuhainia be gubwen̄ be Ratahigi vi mai mulei vi vora ginau haraḡo, kun be susurana be mwa mai bon̄i.

³ La mahavana be sinombu ram bevea be, “Gam dogo lol tamwata i gam rahu,” kera vi lol kaburainira. Vi vora kun gagarasi be mwa mai vilvilehi lalai vavine be mwa bav naturigi. Kera gea rasav romaragai te dumwi.

⁴ Take kimiu, ira tuaku, gim hav togo tehe lol ute meto, i gubwen̄ gea sihav lol te butugai kimiu kun atat surasura vwate.

⁵ Kimiu sinombu duluai be ata lol gigita i ata lol rani. Gida tam hav vora te ata lol bon̄i sa metmeto.

⁶ Haḡe gida tasav vora te kun atat dodolua be ram maturu, take tav mamata i tav haḡo sine togonai.

⁷ Kera be ram maturu, ram maturu bon̄i. Kera be ram mwinmwin daltale, ram mwinmwin daltale lol ute bon̄i.

⁸ Take gida ata lol gigita, mwa du be tav togonai gida siboda. Mwa du be tav saga binihimwasigi garagusi i lolotabetabe be vi tuḡoro gida, i doronhohov huri varahuva kun gaisagan bwatu.

⁹ God nu hav gita te lua gida be tav ron̄ ḡagarasi gin non lol horo take be tav lai varahuva sivi nonda Ratahigi Jisas Kraes.

¹⁰ Jisas nu mate huri gida be tav togo ute gaituvwa dum bulmaia, gaituvwa be tam rahu sa tam mate batena be vi mai.

¹¹ Haḡe giv turatura kimiu gaitutuvwai i giv hagai muramura lalai kimiu gaitutuvwai, kunia kebe gim lolia kadogaha.

Nogonan Avoan Vagahi i Helheloi

¹² Kadogaha, ira tuaku, gam hudali kimiu be, giv binihimarahi kera be ram lol rovoga hahavwani mai kimiu, kera be ram domuai kimiu vai lol Ratahigi i ram bagahi kimiu.

¹³ Binihi marahinira gin mwasin lolotabetabe bwatuna be huri rovoga be ram lolia. Giv togo lol tamwata mai kimiu gaitutuvwai.

¹⁴ Gam hudali kimiu, ira tua be, giv vasinerani kera be ram hav lol te rovoga. Giv tura sinombu be ram matagu. Bului kera be ram beuga. Giv haḡo sine mahuri hurira duluai.

¹⁵ Giv gitae be ihei sihav vwaliu te vahalana gin vahalana. Take tagaro giv lol ron̄oe be giv lol hano be nu tavuha lalai kimiu gaitutuvwai i lalai sinombu.

¹⁶ Giv samsamwara tagaro.

¹⁷ Giv tataro ḡaoḡao,

¹⁸ i giv lai avoan avkari huri havanau te be mwa loli gaituvwa be loli. Kea haḡea havanau be God mwa doronia be vi loli lalai kimiu lol Kraes Jisas.

¹⁹ Gisav vamate te rovoga non Vui Sabuga.

²⁰ Gisav vev te hantai avoan non atatu be God nu laia lalainia.

²¹ Take giv lol ron̄ ginau duluai. Giv tau ḡoḡo havanau be nu tavuha,

²² i giv to dagai nin ginau duluai be ram hav tavuha tehe.

²³ Kadogaha nam dataro be God sibona, God huri tamwata, vi lol kimiu giv melmelo giv vora huria n̄ano. Nam dataro be rahumiu duluai lol Vui, atmatemiu, i rebehimiu vi to rahurahu i vahalana sigai batena be nonda Ratahigi Jisas Kraes vi mai.

²⁴ Giv butu be kea be mwa uloi kimiu mwa lolia kunia lalai kimiu.

²⁵ Ira tuaku, giv tataro huri kamai.

²⁶ Giv helheloi ira binihimwasigi gin walharaḡo sabuga.

²⁷ Nam bevea lalai kimiu mai roron̄o non Ratahigi be giv vasogo ravrava uhu lalai ira binihimwasigi duluai.

²⁸ Hogoi non nonda Ratahigi Jisas Kraes vi togo mai kimiu.