1 Tesalonaeka 1 - Hano Niu Testamen

¹ Nin Pol, Sailas, i Timoti. Lalai ira ata lol uloilua Tesalonaeka, i ata lol uloilua non God Tata i Ratahigi Jisas Kraes: Hogoi i tamwata lalai kimiu.

Binihimasigi Garagusi non ata Tesalonaeka

² Kamai tagaro gam avkari God huri kimiu duluai i gam dau kimiu lol nomai tataro.

³ Gam binihi dumwia tagaro lolmatan God Tamanda ginau duluai be gin lolia huba, bwatuna nomiu binihimwasigi garagusi i rovoga be gin lolia bwatuna nomiu lolotabetabe. I gam avkaria be gim wasi radu bwatun nomiu doronhohov lol Ratahigi Jisas Kraes.

⁴ Ira tuaku, God mwa dabe kimiu, i gim iloe be nu gita lua kimiu,

⁵ bwatuna be Roroi Tavuha be gan laia vai abemiu nu hav vora te gin avoana n̄ano, take gin muramura, non Vui Sabuga, i mai binihimwasigi wasi be kea mwasigi. Mulei gin iloe be gon togo kun hanigi batena be kamai abemiu be gai bului kimiu.

⁶ I kimiu gin mai kun kamai i kun God. Gin ron̄ ḡagarasi maragai, take gin dame ḡoro silo vagahi gin samwarana be mwa mai nin Vui Sabuga.

⁷ Kunia gim mai gi malele lalai ira binihimwasigi duluai Masedonia i Kris.

⁸ I silo vagahi non Ratahigi God mwa bataha ute sivi kimiu, i nu vano vai Masedonia i Kris mulei, take kadogaha nomiu binihimwasigi garagusi alun God mwa iloana vataha ute. Kadogaha mwa hav tu tehe be gamen vev havanau huria.

⁹ Sinombu vataha ute ram bevurinia be gin lai ḡoḡo kamai batena be kamai aia mai kimiu. Ram bevurinia be kun hanigi giv lin̄ ira nunvatu i gim bavora gim lol rovoga huri God rahu i God mwasigi.

¹⁰ I gim hohovi huri nitun God be vi mai nin ute atamare, kea be God Tata nu ragasia nin mateana. Kea Jisas, be nu varahu gida nin silo vevegi non God be mwasigi vi mai.