1 Pita 5 - Hano Niu Testamen

Vatugigi non God

¹ Kadogaha nam do mai ginau vwate be nav vevea lalai ira bwatmetue lol nomiu vatugigi. Inau mulei nam bora bwatmetue. Nan gita ron̄ ḡagarasi non Kraes duluai, i nav bete lol sarisari be vi seserai nia lalai gida. Nam hudali kimiu mulei,

² ira gitaḡoro i vatugigi non God, i hurira be gim ḡitaḡorora. Giv gitaḡorora bwatuna kimiu mulei gim doron, mwa hav vorate bwatuna be ram ḡaroi bonogai kimiu. Geki haḡea kun hanigi God mwa doronia. Giv lolia bwatuna be kimiu gim ron̄ mwandavuha be giv bulbului kimiu, mwa hav vorate huria be gim doron homu.

³ Gisav vora te tomuai lololhoroga ḡoro sinombu be gim gitaḡoro, take giv vora malel tavtavuha lalainira.

⁴ I lol taro be Kraes, muai radaiḡoro, vi mai, kimiu giv lai gaisosorin bwatu sarisari be sihav vano te dumwi na gabolanana.

⁵ La hala n̄an gea, ira mwalaḡelo gara mwa du maragai be giv togo halaten ira bwatmetue. I kimiu duluai mwa du maragai be giv binihi bahivoi kimiu gaitutuvwai. “God mwa avo vai alun ravwegana, take mwa lai vatavuha lalai ira lolo maḡemu.”

⁶ Giv lin̄ maḡemu halaten liman God gabe nu muramura huribe vi tomarei kimiu lol mwasin tarona be vi mai.

⁷ Giv lai nomiu binbinihi bovonosi duluai lalai nia, bwatuna kea mwa ḡitaḡorogo.

⁸ Giv tuḡoro kimiu sibomiu i giv gitaḡoro! Atmate, nomiu ivwalu, be mwa bataha ute kun abe Laion gangani mwa hiḡe atatu be men gania.

⁹ Gisav lin̄ te kimiu lalainia, giv tu wasigi gin nomiu binihimwasigi garagusi. Gim iloe be ira atatun Kraes duluai dalis ureure ram haḡo ron̄ ḡagarasi n̄an gaituvwa.

¹⁰ I ataguna be giv ron̄ ḡagarasi huri taro vwelvwele gea, God, gabe mwa lai hogoi duluai, vi lol ginau tavuha duluai rav vavtutu. Kea vi lol kimiu giv wasi i vi tu wasigi mai kimiu bereva gim hovi. Mwa uloi kimiu be giv bete mai sarisari lol Kraes, sarisari be vi tu rahurahu vai tuai.

¹¹ Muramura duluai nona vai tuai i tuai. Amen.

Nogonan Avoan Helheloi

¹² Nam rav avoan vwelvwele geki mai buluiana non Sailas, kea nam iloe be atat binihimwasigi lol Kraes. Nam ravae be nav lai avoan dura lalai kimiu i nav vevea lalai kimiu be geki haḡea mwasin hogoi nin God. Giv tu wasigi lol vatavuha gea.

¹³ Imwa tataro Babilonia, be nu gita luana kun kimiu, mwa hora lalai kimiu avoan helheloi Mark, nituku lol Kraes, mwa lai ḡoḡo kimiu mulei.

¹⁴ Giv bulbul tagai kimiu gaitutuvwai gin lolotabetabe non God lol taro be gim bisogari. Tamwata lalai kimiu duluai be gim dogo lol Kraes.