1 Pita 3 - Hano Niu Testamen

Ira Ahoai i ira Tasalai

¹ La hala n̄an gea, kimiu ira ratahi mwa du maragai be giv lin̄ maḡemu lalai ira ahoamiu. Be, ira tata rituai rasav tabe te vagahi non God, kera rav garoinia be rav binihimwasigi i atatu vwate sihav vev te avoana vwate lalainira. Kera rav togo kunia be ira tasalara ram dogo.

² Ira ahoamiu rav gita e be rahumiu nu melmelo i gim dogo mai binihimarahi huri God.

³ Nu hav vorate ilu be gim gabuinia gin gao, gaihurin bihu, sage gaisaga bwaro be vi lol kimiu giv tavuha.

⁴ Sigai, tavuha gea si mai alolomiu tavuhan Vui be mwa dogo ḡoḡonai i sihav lol te kaburai dumwi i nu tavuha liu, lolmatan God.

⁵ La hala n̄an geki ira vavin sabuga be ran togo tuai i ran tau nora doronhohov alun God i ran lolira sibora ram davuha liu, ran lin̄ maḡemu lalai ira ahoara.

⁶ Sera nu lin̄ maḡemu lalai Ebraham, ahoana, i nu uloinia be non ratahigi. I kimiu ira vavine haḡea ira mwasin nitun sera kebe giv lol havanau n̄an be nu tavuha i gisav matagu tehe.

⁷ La hala n̄an gea, kimiu ira ahoai mwa du be giv togo mai ira tasalamiu la hala be mwa ḡita batoiana, Be kera ran mandamanda liugo. Take giv vinihi marahi nira, bwatuna God mwa lai vatavuha n̄an gea lalainira kebe nu laia lalainigo vatavuha be mwa lai rahuan mwasigi. Giv lol ginau kera geki bwatuna be ginau Vwate sihav tu te ḡoro nomiu tataro.

Ron̄ Ḡagarasi huri Lolian Mwasigi

⁸ Nogonana, kimiu duluai gis togo lol dameana, giv ilo kimiu gaitutuvwai, giv tabetabe kimiu kun abe ata lol imwa gaituvwa, giv maḡemu i giv tavuha.

⁹ Gisav lol te hantai be vi vol mulei hantai, i gisav av te hantai be vi vol mulei avoan hantai lalainigo. Take giv vol mulei mai vatavuha bwatuna be kimiu sibomiu gin uloiana be giv lol ginau geki huribe kimiu giv lai vatavuha.

¹⁰ Ravrava Sabuga mwa bevea be, “Atatu mwa du maragai be vi lol ginau kera geki rav ron̄ mwandavuha i rav togo lol gubwen̄ ron̄ mwandavuha ivusi. Kea sihav vev te avoan hantai, i kea sihav tentene tehe.

¹¹ Mwa du maragai be kea vi nogo nin ginau hahantai i vi lol ginau tavuha. Mwa du be kea vi hiḡe tamwata i vi lol rovoga huria.

¹² Matan Ratahigi mwa ḡita atat tavtavuha Bwerona mwa ron̄ nora tataro. Take Ratahigi mwa lai dagai lolmatana ninira be ram lalaḡo hantai.”

¹³ Kebe gom binihi hahavwani be gov lol tavuha, atatu vwate sihav lol te ḡagarasigo.

¹⁴ Take gaituvwa n̄an be gov ron̄ ḡagarasi huri lolian tavuha, giḡo gom lai vatavuha. “Gosav matagu te hano be ram mataguinia; gisav Virururu tehe gin ginau Kerageki.”

¹⁵ Take giv vinihi marahi Kraes kun abe Ratahigi sabuga lol lolomiu. Giv lol vatuvwai tagaro be giv vwaliu atatu duluai be ram hudaligi be giv vevea huri nomiu doronhohov,

¹⁶ take giv vwaliua gin alen̄ maḡemu i binihi marahi. Binihimiu vi melmelo huribe kera be ram bev avoan hahantai huri nomiu rahuan tavuha lol Kraes rav busbusi.

¹⁷ Nu tavuha be tav ron̄ ḡagarasi huri be tan lol ginau tavuha ninia be tas lol ginau hantai be kea haḡea God mwa doronia.

¹⁸ Kraes sibona nu ron̄ ḡagarasi huri Vuro vatuvwa n̄an huri sinombu duluai. Kea nu hav matagu tehe be vi lai kimiu vai aben God. Rebehina nu wehiana, take kea nu rahu alolon vui.

¹⁹ I lol vui kea nu vano mwa doretore lalai ira vui be ran togo lol Imwa vauhi,

²⁰ be ran varihai didi lin̄ maḡemu huri God tuai lol taron Noa. God nu hohovira lol maḡemu lol taro be Noa mwa boha waḡa. Atatu n̄an gaiviha, gaivwelu lol tatan̄ana ram rahu gin wai.

²¹ I wai gea nu ḡun garuhisabuga be kadogaha mwa barahugo, i nu hav bwaga te dagai han̄ora nin rebehi, take tatauleo be nu loliana lalai God nin binihiv tavuha. I geki huribe Jisas Kraes nu tomare nin mateana.

²² Kadogaha Jisas nu vano vai lol ute atamare i mwa dogo la mwatuan God i mwa ḡitaḡoro ira enjel, ira roron̄o i ira muramura.