1 Pita 2 - Hano Niu Testamen

Jisas kea Vatun Rahuana

¹ Mulei, giv togo dagai nin ginau hahantai duluai, tenteneana duluai, bugurana, binihiv hahantai, i avoan hahantai.

² Kunia be naturirigi be ram siv vora ram doron huhu, kimiu mwa du maragai be giv doron vagahi melmelo i vagahi maron̄ron̄o. Ninia gov mauri i gov habwe rahuana,

³ bwatuna be giḡo gom iloe huba i gom ḡitae kun hanigi haḡea Ratahigi nu tavuha.

⁴ Mai vai aben Ratahigi Jisas, “Vatu” be mwa dogo. Sinombu ata lol Ureure ran hav doron te vatu geki, take kea haḡea vatu be God nu gita luae, i kea nu tavuha.

⁵ Kimiu mulei gin ḡun vatun rahuana, i giv lin̄ kimiu sibomiu ba lol tanon tataroi sabuga i be giv ḡun lalaḡo sabuga gabe mwa lai tataroi tuntun sabuga lalai God. Kea vi lai ira tataroi geki sivi Jisas Kraes.

⁶ Ravrava sabuga mwa bevea be: “Nav tau vatu vwate lol tano Jerusalem. Ginau duluai vi loliana lol raumatan vatu geki. Ihei tehe be mwa binihimwasigi nia sihav matagu te dumwi.”

⁷ Vatu geki vat binihi marahi lalainigo be gom binihimwasigi. Take lalainira be ram hav vinihi te mwasigi, “Vatu gabe kera be ran vohae ram barihainia mwa mai gi bwatbwatun Siguna.”

⁸ Mulei, Kea haḡea, “Vatu be mwa lol atatu ram daturai, Vatu be mwa lolira ram hovi.” Ram daturai bwatuna be ram hav tabe te havana be God mwa bevea, Kea haḡea havanau be God nu lol vatuvwai nira be vi loli lalai nira.

⁹ Take kimiu haḡea atat gitalua, houn lalaḡo ata la ratahigi lavoa, bwatun vanua sabuga, atatu huri rovoga non God sibona. Kimiu gin gitalua huri lalaḡov tavuha huri God, gabe nu uloi lua kimiu nin ute meto vai lol gigita.

¹⁰ Tuai kimiu gin hav vorate atatu, take kadogaha kimiu haḡea atat non God. Tuai kimiu gin hav lai te sine hagavi, take kadogaha gim lai sine hagavi non God.

Gida Atatun Rovoga non God

¹¹ Ira tuaku, kimiu gin ḡun atat mai i tausala lol ureure geki. Nam doron be giv lin̄ ginau hahantai be rebehimiu mwa doronia be vi lolia be mwa bwalo vai alun vui rahu.

¹² Ira len̄len̄aga ran masiri i ram dogo dalis kimiu i rav vev dumwia be kimiu gim lol ginau hantai. Giv togo lol togoana tavuha huribe rav gita ginau tavuha be gim lolia i vi lai roroai lalai God lol taro be Kraes vi mai mulei. Ron̄ maḡemu huri roron̄o non atatu duluai.

¹³ Huri Ratahigi, giv ron̄ maḡemu lalai sinombu gabe nora roron̄o lol ureure: ratahigi lavoa Kea gabe non muramura gaivua,

¹⁴ i ira tomuai gabe Kea nu horara be rav vevegi kera be ram lol alen̄ hantai i be rav uloi roroai kera be ram lol alen̄ vavtutu.

¹⁵ God kea mwa doronia be gin alen̄ vavtutu kimiu mwa du maragai be giv tuḡoro atat hahantai be ram bev avoan taltale huri kimiu.

¹⁶ Giv lin̄ kamai gi atat maribwesi, take gisav haḡo te nomiu maribwesi kun be ginau vwate be gimen lol alen̄ lete. Giv togo kun abe turin rovoga non God.

¹⁷ Giv to binihi marahi atatu duluai: Giv tabe ira atamwani i vavine nin ata lol imwan God, giv binihi marahi God i giv lin̄ maḡemu lalai ratahigi lavoa.

Giv huri Malelen Kraes

¹⁸ Ira turin rovoga, giv lin̄ maḡemu lalai ira ratahigi mai roron̄o gin binihimarahi, Vorate Kera n̄ano be ran Vavtutu i ran tavuha, take kera mulei be ram hav vev te mwasigi.

¹⁹ Atatu vi ron̄ dum ḡagarasi n̄ano be ginau mwa hav tavuha tehe, take kebe kea vi vinihi God i vi tuḡoro dum gagarasi, God mwa ron̄ mwandavuha.

²⁰ Kebe giḡo gom wehiana huri nom ute lete, hala vwate sigai lalainigo be gov uloi roroainigo huri alen̄ maḡemu lol nom silo vevegi. Take be gov ron̄ ḡagarasi huri nom vavtutu, i giḡo gon maḡemu, kea God mwa ron̄ mwandavuha.

²¹ Geki haḡea hano be nu uloinigo be gov lolia, bwatuna Kraes nu ron̄ ḡagarasi hurigo i nu tau malele be gov huria. Mwa du maragai be gos lolia kunia be nu lolia.

²² “Kea nu hav vuroga te hohoigi, i kea nu hav tentene tehe hohoigi.”

²³ Sinombu rav vev hantai Kraes, take kea nu hav vev te hantai mulei nira. Kraes nu ron̄ ḡagarasi, take nu hav ḡele te muleinia kea nu mahin̄ai God, kea gaituvwa be mwa bevegi la hal tavuha, gitaḡoroe.

²⁴ Kraes nu tatal vuroda alolon rebehina la volovolo i gida mwa du be tas lin̄ rahuan vuroga i tav tau bwatuna ba rahu lol rahuan vavtutu. I gida tam rahu bwatuna halan duru alun volovolo.

²⁵ Kimiu gin kun sipsip be mwa la dadaligi, take kadogaha gin mai mulei vai aben radaiḡoro huri sipsip be kea haḡea atatu be mwa gitaḡoro huri rahumiu.