1 Pita 1 - Hano Niu Testamen

Avoanan Tabeana

¹ Nin Pita, hala non Jisas Kraes. Lalai ira atat gita lua non God gabe ram dogo dagai nin tanora i be ram dogo dedeorai dalis bwatun Vanua Pontas, Kelesia, Kapadosia, Asia, i Bitinia.

² God nu lol dautau kimiu amua be vi gitalua kimiu i vi lol kimiu giv vora non atat sabuga, gabe rovoga non vui. God mwa doron be kimiu giv ron̄oe i giv melmelo gin dagan Mateanan Jisas Kraes. Hogoi i tamwata vi vora nomiu i vi liu.

Kamai nomai Doronhohov N̄ava

³ Uloi roroai lalai God i Tata non nonda Ratahigi Jisas Kraes. Lol ihan God lavoa sine hagavi kea nu lolia be tav vora mulei vai lol doronhohov lol rahuan n̄ava, bwatuna be Jisas Kraes nu tomare nin mateana.

⁴ Kadogaha tam hohov ira vatavuha be God mwa do maia huri ira nituna. Ira vatavuha, gabe sihav lol te dum kaburainia sage sihav lol te dum bwarebware i sihav vano te dumwi na nora ute mutai, ram dogo lol ute atamare huri kimiu.

⁵ Muramura non God mwa ḡitaḡorogo sivi nomiu binihimwasigi garagusi vaivotu be giv gita nomiu varahuva lol nogonan gubwen̄.

⁶ Ginau geki mwa lol kimiu gim ron̄ mwandavuha maragai, n̄ano be kadogaha taro mwa bwelvwele lalan̄an ginau hahantai vi lol dum kimiu giv ron̄ mwahantai.

⁷ Ginau hahantai geki ram mai be ramen gitae be nom binihimwasigi garagusi nu melmelo. Melmelo non binihimwasigi nu marahi liu vatan̄oga, Gabe vi Seserainia gin gabi be nu melmelo i vi nogonogo dumwi. Take nomiu binihimwasigi garagusi vi lai lalai kimiu uloi roroai i binihimarahi lol taro be Jisas Kraes mwa seseraiana lalai kimiu.

⁸ Kimiu gim hav gita te Kraes, take gim dabea radu. Gisav gita te dumwia Kadogaha, take gim binihimwasigi nia. Haḡe kimiu giv masiri gin samwarana be sihav veveana te dumwi, samwarana be nu masiri gin sarisari.

⁹ I kimiu gim lai vatlegiga non nomiu binihimwasigi garagusi i varahuva huri vui.

¹⁰ Ira atatun vevsera ran hiḡe halan varahuva geki i ran lol ron̄oe be rav habwea. Ran vev sera huri vatavuha be vi mai lalai kimiu.

¹¹ Vui non Kraes nu togo alolon ira atatun vev sera, nu vev daua huri ron̄ ḡagarasi non Kraes i huri sarisari be vi huri ron̄ ḡagarasi gea Ira atatun vev sera ran lol ron̄oe be rav hiḡehiḡe huri havanau be Vui Sabuga mwa bagahira, lol taro be ginau kerageki ran loli, i havanau haḡea ureure vi kunia lol taro gea.

¹² God nu seserainia lalainira be nora rovoga nu hav vorate hurira Sibora take huri kimiu, lol taro be nu veveana na ira mwasigi be gim ron̄oe kadogaha. Kera be ram doretore huri Roroi Tavuha lalai kimiu ran vev ginau kerageki mai buluiana non Vui Sabuga gabe nu horana nin ute atamare ginau alolona gabe ira enjel ram doronia be rav gitae.

Uloiana huri Rahuan Sabuga

¹³ Giv lol vatuvwai binihimiu huri rovoga i giv gitaḡoro rebehimiu. Nomiu doronhohov duluai sivora non hogoi huri vatavuha be vi vora nomiu lol taro be Jisas Kraes vi visirai abemiu.

¹⁴ Kadogaha be gim bora naturirigi tavuha non God gisav mom dogo tehe kunia be gin togo tuai Gin hav ron̄ te batoia, i gin lol ginau hahantai be gin doronia.

¹⁵ Take giv sabuga lol ginau duluai be gim lolia, kun God n̄ano, kea be nu uloinigo nu sabuga.

¹⁶ Nu ravana lol Ravrava Sabuga be: “Gov vora atat sabuga, bwatuna nan sabuga.”

¹⁷ Gov tataro lalai God i gov uloinia gi Tata, i nu harahara huri rovoga non atat gaitutuvwai n̄an gaituvwa i lol taro be gim dogo lol ureure, giv lol ron̄oe be giv togo gin binihimarahi huri God.

¹⁸ Gim iloe be amua gin togo lol rahuan garagusi, la hala be mwa rovo atagu nin atatu be ran togo amua ninigo. Take gin rahu nin rahuan hantai. Nu vol kimiu, kun ginau be vi nogonogo dumwi kun vatlegiga, i vatan̄oga,

¹⁹ take mai dagan Kraes, gabe nu vora kun sipsip mwalkeloi.

²⁰ Kraes nu gita luana amua mwa siv tau ureure, take kea nu vagahiana lalai ureure lol nogonan taro geki huri kimiu.

²¹ Sivi Kraes gim binihimwasigi God, gabe nu tomarei Kraes nin mateana i nu lai lalainia ute Sarisari. Nomiu binihimwasigi garagusi i nomiu doronhohov mwa do alolon God.

²² Kadogaha be gin lol rahumiu ram melmelo ginia be gim dabe mwasigi, gov haḡo dum tabean mwasigi huri ira tuamwa atamwani i vavine lol Kraes. Giv tabe kimiu gaitutuvwai liu mai lolomiu duluai.

²³ Kimiu gin vora mulei, i rahuan gara geki nu hav mai tehe nin ginau be nu mate, take nin ginau be mwa hav mate te dumwi. Kimiu gin vora mulei sivi roroi non God be mwa du rahurahu.

²⁴ Avoana Sabuga mwa bevea be, “Atatu duluai ran ḡun mwanea, i sarisarira duluai ran ḡun virangain ute vono. Mwanea ram ḡoru i Virangai ram hovi,

²⁵ take avoana non Ratahigi vi togo rahurahu vai tuai.” I geki haḡea avoana be nu veveana lalai kimiu.