1 Korin 9 - Hano Niu Testamen

Pol kea kun ira Hala Dodolua

¹ Huri hano? Inau atat vuroi? Inau hala vwate? Nan gita Jisas nonda Ratahigi huba! Kimiu duluai sinombu kea vwain noḡu rovoga lol ihan God.

² Be kera rituai rasav dame te maiau kun gabe inau hala vwate, giḡo gov lolia, huribe gom ilo mwasigi be inau hala vwate non Ratahigi.

³ Lalai atatu be ram bevegiau, nam doron be namen vevea lalainira be,

⁴ “Kun hanigi? Kimiu gim binihia be kamai gasav gan te dum ginau huri nomai Rovoga?”

⁵ Kamai gasav lagi te dum mai ira tasalamai be kera atat binihimwasigi huba, ram huri kamai lol nomai rovoga, take ira hala dodolua mai tuan nonda Ratahigi, mai Pita?

⁶ Ke Banabas n̄ano maiau be garu vi lol rovoga huri nonda togoana?

⁷ Atatun bwaloana vwate sigai be mwa ban huri bwaloana, take mwa bol mulei halana sibona n̄ano gin non homu sibona? Atatun ute loloara vwate sigai be mwa riv taligaon waen take mwa hav gan te dumwia lol bilan uwmwan taligaon waen? Atatun radaiḡoro sipsip vwate si hav gita te ḡoro sipsip ita sihav mwin te hun huhura?

⁸ Kimiu gim binihia be ginau geki be nam bevea mwa mwalue nin rahuda n̄ano? Sigai! Silo non Moses mulei mwa bev ginau kerageki.

⁹ Mwa ravana lol silo non Moses: “lol taro be hos vwate mwa lol rovoga lol ute loloaran biri gosav tabwaḡoro te bwan̄ona be gov lolia si hav gan te ginau.” Lol taro be God mwa bevea kunia, mwa binihi hos n̄ano? Sigai.

¹⁰ Kea mwa avo mwasigi huri gida. Uwe, avoan sabuga gea mwa ravana huri gida, huribe mwa bev rahurahuinia be, atatu be mwa butuvutu i atatu be mwa harahara biri, kera n̄oto ram binihi haragaituvwa n̄ano be rav lai ginaganiana alolon ute lolora gea.

¹¹ Nav tau bwatuna be nav riv birin vui alolomiu. Kun hanigi? Nu vavtutu be gav lai tavwe huri kimiu?

¹² Be atat dodolua rav lai tavwe huri kimiu, kamai mulei gav lai tavwe huria, lalai kamai ginau gea nu marahi liu. Take gam hav lolia tehe. Sigai, gam dau n̄oto ginau sibomai, huribe gasav lol te ḡoro atatu vwate nin non binihimwasigi alun Roroi Tavuha non Kraes.

¹³ Kunia mulei gim iloe be kera be ram lol rovoga lol imwa tataro ram lai gara ginau nin imwa tataro, i kera be ram lol rovoga la batan ginaganianan sabuga, ram lai ududun ginau be mwa laiana i hogoi aia.

¹⁴ La hala n̄an gea, God mwa bevea be kera be ram bev lua Roroi Tavuha rav lai tavwe nin rovoga geki.

¹⁵ Take nam hav haḡo te ira mwasigi kerageki. I nam hav ravae tehe kadogaha be nav lai ginau rituai nin kimiu. Mwa du maragai be nav mate muana! Atatu vwate sihav lol te bwedai dum noḡu avoan tavtavuha!

¹⁶ Noḡu rovoga be nam bev lua Roroi Tavuha mwa hav lai te lalaiau ravwegana. Noḡu rovoga haḡea be nai vev lua Roroi Tavuha, Ratahigi mwa bevea be nav lolia. I vi hantai lalaiau vi liu kebe nasav vev te lua Roroi Tavuha.

¹⁷ Be nav toretore la noḡu doroniva, nav lai tavwe huria. Take be nav toretore hurin doroniva non Ratahigi, bwatuna God nu laia lalaiau.

¹⁸ I hava tavwe haḡea nam laia? Geki haḡea tavweku: lol taro be nam bev lua Roroi Tavuha. Nam hav hudali te tavwe huribe nas lai dum tavwe, take nam hav hudaligi te huria.

¹⁹ Inau atat maribwesi i nam hav vora te turin rovoga huri atatu vwate. Take nam loliau kun gabe turin rovoga lalai atatu duluai be nav rav dum sinombu.

²⁰ Lalai ira Jius nam bora kunira huribe nav lai dumwira, inau siboku vorate silo mwa ḡitaḡoroau. Take kera be ram dogo aten Silo non Moses, nam dogo kun gabe atatu be mwa do aten silo. Nam lolia kunia huribe nav haravira.

²¹ Lalai kera kebe ram hav togo te aten silo, nam lolia mwa hurinia i nam bora kun atatu be silo sigai (take, mwasigi be nam hav togo tehe nin silo non God, nam dogo aten silo non Kraes), nam lolia kunia huribe nav laira be ram hav togo te aten silo.

²² Lalainira be ram mandamanda, inau mulei nam bora kunira, huribe nav lai dum ira mandamanda. Nam mai gi ginau duluai lalai atatu n̄oto huribe nav lol dum rovoga lalainira la hala duluai be vi dumwi.

²³ Nam lolia kunia huribe gin Roroi Tavuha nav lai udun non vatavuha.

²⁴ Gom iloe be lol taron rovoana, atatu n̄oto rav rovo take atatu n̄an gaituvwa be vi lai tabeana. Haḡe giv rovo huribe giv lai tabeana gea.

²⁵ Kera duluai be ram rovo lol taron rovoana, ram n̄aitai gin nora muramura be rav harav ira tuara. Tabeana gea kea ginau n̄ano ata lol ureure be mwa dogo vwelvwele n̄ano, take nonda na tabeana si hav lolian te kaburai dumwi.

²⁶ Bwatun ginau geki, inau nam rovo rahurahu vai lai nogonana. Inau kun atatun bwaloana vwate be mwa dutui take mwa dutui vai la mahava n̄ano mwa hav tutui te ginau vwate.

²⁷ Nam lol vatuvwai rebehiku i nam lolia gi noḡu turi. Inau nam uloi atatu n̄oto huri rovoana geki. Bwatuna gea nas sav lin̄ te atatu vwate be vi rav luae nin rovoana geki.