1 Korin 7 - Hano Niu Testamen

Avoan Hudaligi huri Lagiana

¹ Kadogaha nav avoinia huri ginau duluai gabe gon ravae huria lalaiau. Nu tavuha mai atatu be rasav lagi tehe mai vavine.

² Take bwatuna be vuro be bwatigoron lagiana mai rebehi be mwa bulu mai rebehi lol ureure, atatu gaitutuvwai vi vora tasalana sibona mahaḡea i vavine vi vora ahoana sibona mahaḡea.

³ I mwa du be atamwani vi lai dumwia lalai tasalana havanau duluai be nona abena lalai tasalana huria kea haḡea mwasin tasalana. I mwa du be vavine vi lai dumwia lalai ahoana huria be kea haḡea mwasin ahoana.

⁴ Tasalai kea mwa hav muai tehe ḡoro rebehina sibona n̄an gahena; take ahoai mwa bora muai ḡoro rebehina. Ahoai mwa hav muai tehe ḡoro rebehina sibona n̄an gahena; take tasalana mwa bora muai ḡoro rebehin ahoana.

⁵ Gosav bugurai te rebehimwa be gomen hogoinia mai vwaliumwa, vaivotu be kimiru saraḡo giru vi dame haragaituvwa be giru vi togo dagai huba nin rebehin lagiana huri taro vwate; take taro gea n̄an huri tataro. I ataguna gea vi mai bulbulu mulei i setan sihav ḡal te dumwigo sibomwa bwatuna be gom bwalaunigo sibomwa.

⁶ Nam bevea geki be men lai avoan vevsera lalainigo, take nuhav vora te leo horai vwate be gomen lolia kunia.

⁷ Nam doron be atatu duluai ran ḡuniau n̄ano, take atatu gaitutuvwai nora hogoi gaitutuvwai batvatahara, be God nu laia lalainia. Vwate non hogoi dolua i vwate non hogoi dolua.

⁸ I kadogaha hurira be ram hav lagi tehe i huri ira bwero nam bevea haḡe geki nu tavuha be rasav lagi tehe kuniau.

⁹ Take be rasav vwalaui te dumwira sibora, mwa du be rav lagi. Nu tavuha liu be gov lagi ninia be gom onda gin binihivanan bwatigoron lagiana.

¹⁰ Kadogaha nam bev leo horai geki lalai ira atat lagi, geki mwa hav mai te niniau take mwa himai nin Ratahigi: vavin lagi sihav lin̄ te derai dum ahoana;

¹¹ take be kea vi derainia, mwa du be kea sihav mom lagi te dum mulei, sage kea vi dameinia bul mai ahoana. Kunia n̄an mulei ahoai sihav vev te dagai dum tasalana.

¹² Huri hala rituai mulei, inau nam bevea geki, take mwa hav vora te Ratahigi. Be sivora atatun uloilua vwate tasalana abena be mwa hav lai te garuhisabuga radu take kea mwa samsamwara bul maia be men vora ahoana, kunia sihav vev te dagara dumwia.

¹³ I mulei be sivora vavin garuhisabuga vwate ahoan abena be mwa hav vora te atatun uloilua, i kea mwa samsamwara be vi togo maia gi tasalana, kea sihav vev te dagara dumwia.

¹⁴ Ahoai be kea mwa hav vora te atatun uloilua kea mwa lol sabugainia gin binihimwasigi non tasalana. I tasalana gabe kea mwa hav vora te atatun uloilua. Kea mwa lol sabugainia gin binihimwasigi non ahoana. Be geki mwa hav vora te mwasigi, ira nitumiru rasav melmelo tehe, take kadogaha ira nitumiru ran sabuga alolon God.

¹⁵ Take kera gabe ram hav vora te ira binihimwasigi ram binihi tuhi be rav mwalue dagai, lin̄ira ran mwalue. Batena be mwa loli kun geki, atatun uloilua atamwani sage vavine nu tavuha rahurahu mulei. Take God mwa uloi gida be tav togo lol tamwata.

¹⁶ Tasalai gom hav iloe tehe, bisata gon varahu ahoamwa. I mulei ahoai, gom hav iloe tehe, bisata goi varahu tasalamwa.

Togo lol Rahuana kunia be God mwa Uloinigo

¹⁷ Take lol ginau duluai gov rahu kunia gabe God nu taugo be gov rahu la hala be gon togo aluna lol taro be God nu uloinigo. Geki haḡea silo be nam lolia lol imwa tataro duluai.

¹⁸ Be nu tavana na dovon̄a la atatu huba, si hav lol te muleinia. Take be vwate mwa hav tavana tehe radu lol taro be mwa uloinia kea si hav mom davana tehe.

¹⁹ Nu hav vora te ginau vwate be atatu nu tavana sa sigai. Ginau mutai n̄ano be vi gogonainia na avoan dura non God.

²⁰ Kimiu gaitutuvwai giv rahu kunia be God mwa uloi kimiu.

²¹ Be gon vora turin rovoga lol taro be God mwa uloinigo, gosav vinihia tehe. Take be gov mwalue dumwi, gov gitaḡoro tavuhai nom mwasigi.

²² Kera be ran vora ira turin rovoga lol taro be God nu uloinira kera ram bora maribwesi lolmatan God. La hala n̄an gea, atat maribwesi be Kraes nu uloinira ram bora non turin rovoga.

²³ Kimiu duluai nu vol marahi kimiu, i gisav vora te turin rovoga non atatu.

²⁴ Ira tuaku, kimiu duluai giv togo aia mai God. Take be gida turin rovoga sage gida atat maribwesi, take lol binihimwasigi tam dogo vavtutu n̄ano.

Avoan Hudaligi huri Vavine be mwa hav Lagi Tehe mai ira Bwero

²⁵ Gon ravae lalaiau huri atatu mwa hav lago tehe i geki haḡea noḡu avoan vwaliu. Nam hav lai te avoan wasi vwate nin God, take nav vev dum binihiḡu siboku huribe Ratahigi nu tavuha maiau i nu hagaviau huba, huribe gom binihimwasigiau.

²⁶ Taro geki take taro ririhai, take nam binihia be nu tavuha lalainigo be gov togo kunia be gam dogo.

²⁷ Be tasalamwa abena, gosav lol te ron̄oe be gomen lago dagai ninia. Be gom hav lagi tehe gosav lol te ron̄oe be gov habwe tasalamwa vwate.

²⁸ Take be gom binibe gov lagi, kea vorate gom buroga. Kebe daulato vwate vi vinihia be men lagi, kea vorate mwa buroga. Take kera be ran lagi rav habwe taro ririhai lol rahuana, take nam doronbe giv togo dagai nin taro ririhai.

²⁹ Ira tuaku, geki haḡea binihivanan hano be nam bevea: Taro vwelvwele huba mwa du lalai gida. Mwa dau bwatuna kadogaha, kera gabe tasalara abena rav togo kun gabe tasalara sigai.

³⁰ Kera gabe ram dei rav togo kun gabe ram hav dei tehe. Kera gabe ram samwara rav togo kun gabe ram hav samwara tehe. Kera gabe ram bol vataha ginau rav togo kun gabe nora ginau sigai.

³¹ Kera gabe ram haḡo ginau ata lol ureure rav togo kun gabe ram hav haḡora tehe, huribe ureure lol taro geki be mwa du si hav n̄ava tehe vi vano.

³² Nam doronbe giv togo dagai nin binbinihi. Atatu be mwa hav lagi tehe kea haḡea mwa du be vi lol doroniva non Ratahigi, huribe mwa lol ron̄oe be men lol doroniva non Ratahigi.

³³ Take atatu be nu lagi mwa lol rovoga hahavwani lol ureure, be men lol doroniva non tasalana,

³⁴ i binihina mwa hurin hala gairua. Vavine sage daulato be mwa hav lagi tehe kea mwa lol rovoga hahavwani huri God. Mwa doronbe vi sabuga lol rebehi i lol vui. Take vavin lagi mwa lol rovoga hahavwani huri ginau ata lol ureure, huribe vi lol doroniva non ahoana.

³⁵ Nam bevea kungeki be men buluigo, be gosav votui te tovtovo vwate. Take nam doronbe giv rahu la hala be nu vavtutu, be giv lai mulei kimiu lalai God be gisav vinihi tehe huri ginau dodolua.

³⁶ Be atatu vi vinihia be mwa hav lol te ginau vavtutu mai vavine be nu tauan ḡoro huria, be tauluna nu dadariha huri lagiana i mwa ron̄oe be si hav lagi tehe maia, kea vi lol hano be mwa doronia. Kera raruvi lagi i kea mwa hav vora te vuro.

³⁷ Be atatu mwa iloe lol binihina be si hav lagi tehe, i non ron̄ova be mwa bwalaunia, i mwa binibe si hav lagi tehe mai vavine be ran tau ḡoroe huria, kea mwa lol ginau vavtutu.

³⁸ I atatu be mwa lagi vavine gea, kea mwa lol vavtutu, take atatu be mwa hav lagi tehe vi lol tavuha liu.

³⁹ Vavine vi togo mai ahoana lol rahuana duluai. Take ahoana vi mate, kea nu tavuha n̄ano be vi lagi atamwani hei tehe be mwa doronia, take atamwani n̄ano lol uloilua.

⁴⁰ Take vavine vi samwara liu lol taro be si hav mom lagi tehe. Geki binihiḡu, take nam binihimwasigi be nam haḡo Vui Sabuga non God.