1 Korin 6 - Hano Niu Testamen

Vahalana non ira Binihimwasigi lol Uloilua

¹ Lol taro be gom bidebideo mai atatun Uloilua mulei vwate, kunhanigi haḡea be gomen lai muleinigo vai aben vevegi len̄len̄aga be kea mwa hav vora te atatun uloilua be nuhav vavtutu te mai God? Hurihano haḡea be gom hav lin̄ te sinombu non God be ramen binbinihi aluna be ihei haḡea nu vavtutu?

² Mwasigi haḡea gom iloe be sinombu non God rai vevegi ureure. Haḡe be giḡo goi vevegi ureure, matuke gosav vevegi te vahalana kokolo mulei?

³ Gom iloe be vai non̄oiha gida tai vevegi ira enjel. Haḡe mwasigi be gida tai vevegi dum ginau vurovuroi ata lol ureure geki.

⁴ Be nom vahalana kokolo abena, huri hano gom lai atatun vevegi be atatun uloilua ram hav vinihi te marahinia?

⁵ Kimiu gis busbusi gin kimiu mulei! Atatu mataisaoga vwate sigai lol uloilua be vi vevegi lol davolamiu lol ira binihimwasigi.

⁶ Huri hano be atat binihimwasigi gairua ram bevegira lolmatan ira sinombu duluai be ram hav binihi te mwasigi.

⁷ Alen̄a be gim ban lol tanon vevegi be gimen vavtutui nomiu videvideo, ginau gea mwa lolia mwa ḡigilaga be kimiu gin vahala huba. Hurihano kimiu gim hav lin̄ia tehe lalai atatu vwate n̄an alolomiu be men lol hantai lalai kimiu? Hurihano gim hav lin̄ia tehe be vwate alolomiu men surai kimiu? Kea nu tavuha maragai nu liu alen̄amiu.

⁸ Take kimiu gingin kimiu gim lol bahala lalai kimiu mulei i gim surasurai mulei kimiu i mulei nin ira tuamiu.

⁹ Nam bev mwasigi lalai kimiu be atatu ram lalaḡo bahala rasav haḡo te dum houn ute Ratahigi non God. Gosav dadaloiga tehe. Kera gabe ram bulu alun rebehin vavine mai atamwani ram buroga gin bwatigoron lagiana ram ḡogonai nunu buhiga take ram bulbulu alun rebehin lagiana sage ira atamwani gabe ram bol mulei rebehin atamwani dolua ram bulu maia,

¹⁰ i kera gabe ram bugura i ram sura, i ram mwin wai taltale, i ram duli tenteneana vai la atat dodolua, sage ram sura atatu kera geki rasav haḡo te dum houn ute Ratahigi non God.

¹¹ Lol taro tuai huba, kimiu rituai haḡea kunia, take nu bwaga melmeloi kimiu huba. I nu lol sabugai kimiu, i nu tau bavtutui kimiu mai God lol ihan Ratahigi Jisas Kraes i mai Vuin nonda God.

Lalaḡoi Rebehimwa huri Lolroroai God.

¹² Atatu rituai ram bevea be, “Mahavana lalaiau be nav lol dum ginau duluai.” Uwe, take ginau duluai nuhav tavuha tehe be nav lol dumwia. Take inau nav vev dumwia be, “Mahavana lalaiau be nav lol dum ginau duluai,” take nasav lin̄ te ginau vwate be men loliau gi non turin rovoga.

¹³ Atatu vwate vi vevea be “Ginaganiana kea huri tabwan̄i, i tabwan̄i huri ginaganiana.” Uwe, take God vi lol kaburai saraḡora. Rebehi mwa hav vora te huri vuron bwatigoro take huri Ratahigi, i Ratahigi kea mwa ḡita ḡoro rebehi.

¹⁴ Gin non muramura God nu lol domarei Ratahigi nin mateana i kea vi lol domarei gida mulei nin mateana.

¹⁵ Mwasigi haḡea gim iloe be rebehimiu haḡea udun rebehin Kraes sibona. Kunia inau nasav lai te dum rebehin Kraes be men bulu mai rebehin vavinen rovrovoi homu. Sigai, si hav dumwi tehe!

¹⁶ Mwa ravae lol ravrava sabuga be, “Atatu gairua raru vi vora rebehi gaituvwa.” Haḡe kunia mwa du be gov iloe be ihei tehe be mwa bulu mai vavinen rovrovoi homu, kea mwa bora rebehi gaituvwa mai atat bwatigoro.

¹⁷ Take atatu be mwa bulu gi rebehi gaituvwa mai Ratahigi kea vuin rebehi gaituvwa mai Ratahigi.

¹⁸ Haḡe kunia gov rov maragai nin bwatigoron rebehi mai rebehi. Bwatigoro dodolua duluai gabe sinombu mwa lolia kea dagai avare nin rebehi, take kera n̄an gabe ram buroga mai bwatigoron rebehi be nu hantai mai mwasin rebehira sibora.

¹⁹ Mwa du maragai be gov iloe be rebehimwa kea imwa tataro non Vui Sabuga gahena mwa dogo alolomwa. Gon lai Vui Sabuga huba nin God. Haḡe kunia giḡo gom hav mom bora te bilamwa sibomwa,

²⁰ bwatuna be God nu tavwego gin volimwa la tovtovo i kunia gov gogonai God gin rebehimwa.